The Definitive Guide to Living in the Capital , Cairo , Egypt

معالم وسياحة

استعد للويك إند.. 4 متاحف في القاهرة يستحقوا الزيارة

المتحف الزراعي متاحف القاهرة متاحف منسية متحف أم كلثوم متحف محمد محمود متحف محمد ناجي
استعد للويك إند.. 4 متاحف في القاهرة يستحقوا الزيارة
بواسطة
Mohamed Talaat

الصورة الرئيسية لواحدة من مقتنيات متحف الفنان محمد ناجي.

القاهرة فيها متاحف كتير، منها اللي بتوثق لعصور وثقافات مختلفة، زي الفرعوني واليوناني وغيرهم، ومنها اللي بتوثق لعوالم مختلفة زي عالم الحيوانات، وعالم الزراعة، ومنها كمان اللي بيوثق للفنون، زي الفني والشمعي، والحديث، وغيرهم، وعلشان أهمية المتاحف دي، إحنا بنشجعكم دائمًا على زيارة كل أنواع المتاحف في القاهرة وباقي المحافظات المصرية، علشان تتعرفوا على كل تاريخ بلدنا الغني، وحضارتنا اللي مافيش زيها في العالم، والنهاردة هنعرفكم على 4 متاحف في القاهرة، منسيين بدرجة كبيرة، وماحدش يعرف عنهم معلومات كتير، والنتيجة إنها فاضية طول الوقت، رغم إن زيارتها هتبهركم وهتنبسطوا فيها جدًا، وكمان هتستفيدوا فعلًا وهتسافروا لعوالم وعصور مختلفة.

متحف الفنان محمد ناجي

هو متحف للفن التشكيلي، وبيعتبر واحد من أجمل وأقيم المتاحف التاريخية اللي مبنية على التراث الحديث، وتم بناءه عام 1952 ومكانه كان في مرسمه بمنطقة حدائق الأهرام، واللي وقتها كان المكان ده منعزل تمامًا عن صخب القاهرة، وكان سبب اختياره لده علشان ينهي لوحته الأشهر والأهم “مدرسة الإسكندرية” واللي بدء رسمها عام 1939، وتم تحويل المرسم لمتحف بعد وفاته وافتتح سنة 1968.

الرسومات الفنية الموجودة في المتحف، هتجذبكم لعالم محمد ناجي بشكل مختلف، وهتشعروا بروح الماضي من خلال 1200 لوحة، فيها سحر وجمال مايتوصفش، وكمان فيه ممتلكات خاصة بالفنان زي الكرسي الهزاز اللي كان بيستخدمه وصندوق البدل بتاعه، والشيفونيرة التاريخية المشهورة بتاعته.

العنوان: 9 شارع محمود الجندي – حدائق الأهرام – الجيزة.

متحف أم كلثوم

ملابس مميزة ونظارة مطعمة بالألماس وبروش نادر، ده غير المنديل وبانوراما صور وأوسمة ونياشين بتزين متحف أم كلثوم في قصر المنسترلي، وكمان موجود في المتحف جهاز جرامافون ومكبر صوت وأسطوانات أغاني نادرة، وشنط يد وأحذية مصنوعة خصيصًا لكوكب الشرق، وميكروفون الإذاعة المصرية وأغاني مكتوبة بخط اليد لمؤلفين كبار، و100 مجلد للصجف اللي نشرت أخبار عنها.

اتأسس متحف كوكب الشرق أم كلثوم عام 1998، وفيه مجموعة كبيرة من رسائل الماجستير في الغناء لطلاب أكاديمية الفنون ومعهد الموسيقى العربية، ده غير قاعة عرض السينما، واللي بتعرض فيلم تسجيلي عنها ومقتطفات من حياتها، و4 أفلام لها وحفلات وكلهم مترجمين بالإنجليزية والفرنسية.

العنوان:   قصر المنسترلي – روضة المنيل – مصر القديمة – القاهرة.

متحف محمد محمود خليل وحرمه

من أهم المتاحف الفنية في مصر، واللي فيه أروع أشكال الفنون على مساحة أكتر من 500 متر، وتم بناءه على الطراز الفرنسي سنة 1915، وكان بيمتلكه الفنان محمد محمود خليل وحرمه،  وبيحيط بيه أكبر حديقة لمتحف بمساحة 2400 متر، وفيه مجموعة من الأعمال الفنية النادرة.

وأشهر اللي موجود في متحف محمد محمود  876 من أعمال الفنانين في القرن الـ19 في أوروبا، وأعمال الفنانين من المدرسة الرومانيتكية والمدرسة الكلاسيكية، وكمان فيه قاعة “أفق واحد” اللي بتضم أكبر العروض المتحفية في الفن التشكيلي، وهي أكبر قاعة متخصصة في الشرق الأوسط للفن التشكيلي.

العنوان: 1 شارع كافور- بجوار مجلس الدولة – الدقي- الجيزة.

المتحف الزراعي

كان الغرض من إنشاء المتحف الزراعي في مصر هو توثيق الذاكرة الزراعية، وكمان إنشاءه علشان يكون مركز ثقافي زراعي، وتم تدشينه في 1930، وكان اسمه متحف فؤاد الأول الزراعي، وهو متحف متكامل فيه 8 متاحف على مساحة 30 فدان.

المتحف فيه آلاف المقتنيات اللي بترصد تاريخ مصر الزراعي من أيام قدماء المصريين، وكمان فيه نباتات نادرة اختفت من حياتنا زي “البرساء” وهونبات كان مقدس عند قدماء المصريين، وفيه نماذج لآلات زراعية تاريخية زي المجرش أو آلة طحن الغلال، وده كله غير الصور الفوتوغرافية وأعمال الزيت اللي بتحكي تطور أساليب الزراعة للفلاح وشكل الحياة القروية عبر التاريخ.

العنوان: الدقي – بالقرب من وزارة الزراعة المصرية.

مقترح