Mohammed Sabry
المتاحف التاريخية موجودة في كل مكان في القاهرة. وكل واحد منها له طابع خاص، بيميزه عن غيره. ومن ضمن المتاحف المميزة في القاهرة، متاحف قصر عابدين. اللي بتاخدك للحقبة الملكية، بكل ثرائها وفخامتها.
إحنا في السطور اللي جاية، هناخدكم في جولة خاصة، جوة متاحف قصر عابدين، علشان نتعرف عليها بالتفصيل، حسب ما نشرها “الشرق الأوسط”.
هتبدأ جولتنا من مدخل زوار القصر والمتاحف، في شارع باب باريس. في الجهة اليمنى مكان لركن العربيات، ومبنى صغير علشان تذاكر الدخول، وتذاكر التصوير بسعر رخيص. وبعد كده نروح للمتاحف:
متحف الأسلحة
فيه هتشوف عدد من البدل العسكرية اللي بترجع للعصور الوسطى. وكمان بدل عسكرية من عصر المماليك، مصنوعة من حلقات حديدية متداخلة اسمها “الزرد”. في المتحف دواليب لعرض الخناجر، بكل مراحل تطور صناعتها. والخناجر المهداة من الملوك العرب. بعدها دواليب عرض الأسلحة النارية المتنوعة. ومن الأسلحة المبهرة في المتحف، سيف (العدل والتتويج). اللي تم تتويج قيصر روسيا الأول به.
متحف النياشين والأوسمة
ده بيتكون من قسمين، الأول بيضم مقتنيات أسرة محمد علي. والثاني بيضم مجموعة متنوعة من الأوسمة والنياشين والميداليات. وموجود ورا القسم ده، خزنة المجوهرات السحرية المسلحة. لو حد حاول يفتحها من غير كود خاص بها، بتضرب عليه نار.
متحف الفضيات
بيشمل أدوات وأواني من الفضة والكريستال والبلور الملون والصيني. هتلاقي قطع وأدوات المائدة، المصنوعة مخصوص للأسرة المالكة. أطباق الفاكهة وأواني الحساء الضخمة. ومن أورع القطع، هتشوف تحف “الجالييه” من الإزاز الملون، عليها مناظر طبيعية بالرسم البارز.
متحف الوثائق التاريخية
تم افتتاحه سنة 2004، وبيحتوي على مجموعة من الوثائق النادرة والفرمانات، اللي بتحكي تطور أحداث مصر السياسية والاقتصادية والاجتماعية، خلال الحكم الملكي.
متحف السلام
ده اتأسس في عهد الرئيس مبارك، وفيه عدد من الهدايا والمقتنيات الخاصة، اللي أهداها له رؤساء وملوك الدول، وكبار ضيوف الدولة. واتضافت له مقتنيات الرئيس عدلي منصور والرئيس عبد الفتاح السيسي. ومنها: مجسم الحرم النبوي من السعودية – واحة تتوسط ساعة من الشيخ خليفة بن زايد آل نهيان – مجموعة مصاحف من ملوك الدول العربية
وتقدر تختم جولتك في قصر عابدين، بدخول قاعة عرض سينمائي على الطراز الملكي. وحواليك التحف الذهبية الملكية من كل مكان. أو ممكن تشرب الشاي أو القهوة في حديقة القصر.
مقترح
صحة ولياقة
فاكهة بطعم الذكريات وفوائد ما تتعدش.. اعرف ليه لازم تجرب التين الشوكي من عربيات الشارع!
أكلات الشارع المصري تين شوكي +7
معالم وسياحة
