The Definitive Guide to Living in the Capital , Cairo , Egypt

تصوير: عبد الرحمن سماحة

لما بنقول حديقة الأسماك، أو حديقة الجبلاية بالزمالك، بييجي في بالنا على طول مشاهد الحب المنتشرة في كل جزء من أجزاء الحديقة، لكن الحقيقة “الأسماك” مش مجرد حديقة للمواعيد الغرامية، دي قيمة تاريخية مهمة، وكل جزء منها بيحكي حكاية عن تاريخ القاهرة لما كانت أحلى من.. باريس!

 

حديقة الأسماك موجودة في الزمالك، في شارع الجبلاية بالقاهرة، أنشأها الخديوي إسماعيل في سنة 1867، وبتعتبر من أفضل الحدائق التي أنشئت في عصر الخديوى في القاهرة. الحديقة فتحت أبوابها للجمهور لأول مرة رسميًا في 21 نوفمبر 1902، وبتبلغ مساحتها مع مجموعة الحدائق النباتية المجاورة لها حوالي 9 أفدنة ونصف الفدان.

الحديقة فيها أكتر من 40 حوض، معروض فيهم أنواع مختلفة من الأسماك المتنوعة والنادرة، بتنعكس عليها أشعة الشمس عبر فتحات علوية، ومنها الأسماك النيلية والبحرية وأسماك الزينة، ده غير بانوراما عرض الأسماك المحنطة، وقسم عرض السلاحف والزواحف البحرية، كمان موجود في واجهة الحديقة حوض كبير معروض فيه أسماك مفترسة.

تصميم الحديقة

تم استخدام مواد بناء محلية جدًا في تصميم الحديقة، وأهمها الطين الأسوانلى المخلوط بمادة الأسروميل والرمل الأحمر بالإضافة للطوب المصنوع من خليط من الطين الأسوانلي والمواد الداعمة الصلبة لإنشاء تكوينات معمارية على هيئة خياشيم الأسماك، وده اللي خلى تصميم الجبلاية بيشبه السمكة.

المنظر العام للجبلاية في منتهى الروعة والجمال، وبتتكون من مدخل من فتحتين زي فتحة خياشيم السمك وخلفها منطقة البهو، وفي جانب الفتحتين هتلاقوا زعنفتين جانبيتين وراهم ممرات الحديقة الأربعة.

أما الجبلاية من الداخل فتم تصميمها على شكل ممرات أو تجاويف داخل شعاب مرجانية في عمق البحر، ولو بصيت لسقف أي ممر هتحس وكأنه مصنوع من الأمواج، والمدهش إن التصميم ده كان السبب في إن الممرات بتعزف ألحان عند مرور الهواء بها، وده بيشبه إلى حد كبير حركة الماء.

كمان هتلاقوا خارج الجبلاية ممرات بتفصل بين مسطحات خضراء بتحتوي على أشجار نادرة جاية مخصوص من مدغشقر وأستراليا وتايلاند، وفي الاماكن المظلمة من الممرات بيتم تسليط النور الكهربائي بطريقة فنية رائعة.

الحديقة فيها كمان 4 صوب لتفريخ السمك إلى جانب مفرخ رئيسى وصوبتين لمعالجة المياة اللازمة لحياة آلاف الأسماك اللي بتضمها أحواض كبيرة.