The Definitive Guide to Living in the Capital , Cairo , Egypt

“فى السفر سبع فوائد”.. الأمثال القديمة علمتنا الحكمة دى، واكتشفنا بعد سنين طويلة أن فى السفر أكثر من سبع فوائد كمان، وسواء كان السفر للمتعة أو للعمل، التكنولوجيا الحديثة قدرت تخلى السفر أسهل وأمتع، وبالتأكيد أرخص، كايرو 360 بتقدم لكم موضوع عن أفضل تطبيقات حجز تذاكر الطيران والفنادق على مستوى العالم علشان تضمنوا سفر أسهل وأرخص وأكثر تنظيمًا.

Expedia:

واحد من أشهر وأكبر تطبيقات  السفر على الهواتف المحمولة، ممكن تحميله لمستخدمى نظام IOS أو مستخدمى نظام الأندرويد، وممكن طبعًا الدخول مباشرة لموقعهم الإلكترونى.

استعملنا إكسبيديا على الـ iPhone قبل فترة من صدور آخر تحديث له، بعد التحديث النهائى للتطبيق حسينا أن شكله أصبح أكثر شياكة وسهولة من غير ما يتنازل عن المبدأ الأساسى له فى توفير كل الإمكانيات فى شكل واحد، وبمجرد فتح التطبيق هيتم سؤالك أنت عاوز حجز الفنادق ولا الطيران، لو دخلت على حجز الطيران هيسألك عن مطار المغادرة ومطار الوصول والتاريخ للذهاب والعودة بأسلوب ذكى وسريع وسهل لأى مستخدم، بالإضافة لسهولة وسرعة البحث على كل مطارات العالم.

قسم الفنادق فيه ميزة جميلة هى إمكانية البحث عن أقرب الفنادق وفقًا لموقعك الجغرافى، ودى كويسة لو كنت فى بلد غريب ومش عارف أقرب فندق لك، أما عن ترتيب نتائج البحث تقدر تختار الأرخص أو الأقرب أو الأكثر فخامة.. إلخ، وبيمتاز أسلوب عرض النتائج (خصوصًا نتائج رحلات الطيران) بالسرعة والسهولة، وتقدر تدفع ثمن تذكرة الطيران أو حجز الفندق مباشرة من الفيزا الخاصة بك أو تتابع أى حجز قديم قمت بعمله قبل كده، من الآخر حجز سريع ودقيق.

Kayak:

من التطبيقات المشهورة فى المجال السياحى لأنه تقريبًا بيقدم كل شىء! حجز طيران وفنادق وسيارات وخدمات داخل المطار قبل السفر وبعده، وتقدر من خلاله تعرف أدق التفاصيل عن سفرك حتى سياسات الوزن المستخدمة فى شركات الطيران المختلفة.

كاياك  من أهم تطبيقات السفر والسياحة، وقسم متابعة الرحلات متميز على التطبيق ده لأن بمجرد ما تعرف بعض المعلومات القليلة عن أى رحلة طيران ممكن تشوفها على شاشة التليفون أو التابلت وهى مسافرة أمامك، ودى ميزة جميلة لو عاوز تشارك قرايبك تجربة سفرهم وأنت قاعد فى مكانك أو للاطمئنان على خط سير الرحلة وظروفها، طبعًا تقدر تعمل Share لحجوزاتك على مواقع التواصل الاجتماعى، لكن ما تنساش الخصوصية علشان ما تقعش فى مشاكل، والتطبيق متاح للتحميل على IOS أو أندرويد على حد سواء.

Flightaware:

بما أننا بنتكلم على متابعة رحلات الطيران لا يُعلى على تطبيق “Flight Aware” لمتابعة رحلتك الجوية أنت أو أى حد يهمك أمره.. من اللحظة الأولى لفتح التطبيق المدعوم على IOS وأندرويد هتعرف أنه شبه متخصص فى متابعة حالة الطيارة، بمجرد البحث عن رقم الطيارة أو مطار الإقلاع والهبوط أو حتى خط سير الرحلة هتقدر تشوف الطيارة على شاشة تليفونك وتعرف ارتفاعها وحالة الجو ومعلومات كثير بتتحدث لحظيًا بمجرد تغيرها.

الأمتع فى التطبيق -وجربناه بنفسنا- أنه ممكن يستكشف الطائرات اللى موجودة فى محيط قريب منك، ويعطيك نبذة مختصرة عنها! ورغم أن الـ option ده مش مفيد بشكل عملى إلا أنه من الممتع أننا نعرف وإحنا بـ نكتب الموضوع ده أن فيه طائرة لمصر للطيران بـ تمر من فوقنا، وأنها متجهة إلى جدة! زى ما قولنا هى حاجة مش مفيدة بشكل عملى لكن ممكن نعتبرها نوع من  أنواع “استعراض العضلات” من التطبيق اللى بيحظى بنسب تحميل عالية وبيتميز الموقع بالتنظيم والدقة.

Booking:

طالما بنتكلم عن التخصص فى تقديم الخدمات نقدر نقول أن تطبيق Booking.com المتاح للتحميل على أندرويد وIOS متخصص لدرجة كبيرة فى الفنادق، الإعلان الرسمى للتطبيق بيفتخر أنه بيقدم لك أكثر من 333 ألف فندق فى جيبك!

لو بنتكلم عن التطبيق بالأرقام أكثر هنقول أنه بيحتوى على أكثر من 8 مليون صورة لفنادق، و22 مليون مقال نقدي من نزلاء حقيقيين للفنادق وممكن نقول بسهولة أن التطبيق عبارة عن شبكة اجتماعية للفنادق وتقييمها، ولازم تبص عليه قبل ما تعمل حجز فى أى فندق علشان تأخذ معلومات أوضح وأشمل عن الفندق اللى هتقيم فيه مدة سفرك.

Priceline:

تطبيق سريع وسهل، وبيمتاز أنه الأسهل والأسرع فى الفتح والتعامل، لكن علشان تدخل على حجوزاتك لازم تعمل اشتراك مجانى فى الموقع الأول، وده يعتبر من عيوب التطبيق المتاح للتحميل على IOS وأندرويد.

Trip Advisor:

تطبيق وموقع بيتميز بألوانه الصريحة ومحاولة جمع كل ما يتعلق بالسفر والأجازات، يعنى تقدر من خلاله تجهز لكل حاجة خاصة بالرحلة بتاعتك وأنت قاعد فى مكانك، بداية من حجز الطيران والفندق والعربية اللى هتنقلك أو هتنتقل بها بالإضافة لحجز المطاعم وكمان بيقدم لك مقالات نقدية عن المطاعم والفنادق وخدمات الطيران مقدمة من باقى العملاء، تقدر تحمل التطبيق على IOS أو أندرويد بالإضافة لبعض التطبيقات اللى بتقدم لك معلومات عن المدن والمطارات والحياة الليلية وكل حاجة ممكن تحتاجها فى سفرك.