The Definitive Guide to Living in the Capital , Cairo , Egypt

الصورة الرئيسية: Bogdan Nanescu

السفر تجربة حلوة، ولو كنت من الناس اللي بتحب الهدوء والاستمتاع بالطبيعة والتأمل، يبقى أكيد مش هتحب تسافر في العيد وزحمته، علشان كدة لو بتخطط لإجازة مميزة الأيام الجاية، يبقى مافيش أجمل من مدينة شرم الشيخ، اللي تعتبر من أجمل الأماكن السياحية في منطقة البحر الأحمر وفيها حياة وترفيه مميز وهتستمتعوا هناك بكل لحظة، وفي السطور الجاية هنقول لكم على كل اللي محتاجين تعرفوه عن سفرية شرم الشيخ بداية من التخطيط وحتى العودة بالسلامة.

 

بداية يفضل أنكم تتابعوا الأرصاد الجوية علشان تعرفوا درجات الحرارة هتكون ايه خلال توقيت زيارتكم، وده هيترتب عليه حجز عدد الأيام والملابس وتحديد أماكن الانتقالات وغيرها، وبعد كده هتحددوا الفترة المناسبة لكم لزيارة مدينة شرم الشيخ وهتدخلوا على مواقع حجز الفنادق أو الشاليهات سواء بشكل مباشر لو عارفين المكان اللي هتختاروه، او تختاروا من عروض مواقع الحجز اللي بنرشح لكم منها موقع بوكينج أو تريفاجو، ومن خلال المواقع دي هتختاروا الفترة اللي ناويين تروحوا فيها وتفاصيل الفندق زي “على البحر – كام نجمة – شامل وجبات ولا لأ.. إلخ”، وبكده تكونوا خلصتم أول خطوة لحجز رحتلكم.

السفر لشرم الشيخ حاليًا بياخد 6 ساعات، ولو هتسافروا بعربية خاصة لازم يبقى معاكم مياه وعصائر ومستلزمات الطوارئ اللي خاصة بالعربية زي الاستبن وطفاية الحريق وغيرهم، ولو هتسافروا عن طريق شركات النقل البري من القاهرة فهتلاقوا رحلات كتير جدًا متاحة من خلال الشركات الخاصة والحكومية زي “جو باص – شرق الدلتا – أتوبيسي – وايت باص – جولد باص – سويفل – أوبر”، وغيرهم كتير من الشركات، وكمان تقدروا تسافروا طيران في ساعة واحدة بس من مطار القاهرة الدولي بمتوسط سعر تذكرة 2000 جنيه تقريبًا.

ودي قائمة بشركات سفر مميزة للمدن السياحية المصرية.

كده خلصنا مرحلة التخطيط للوصول وبعد ما توصلوا بالسلامة تقدروا تعملوا تشيك إن جوا الفندق اللي حجزتوه وترتاحوا شوية من عناء السفر، وبعدها تنطلقوا في يوم ترفيهي تزوروا المشاية في نعمة باي أو تنزلوا السوق القديم تاكلوا أكلة سمك حلوة، وحتى متاح أنكم تحضروا حفلة مميزة في المكان الترفيهي المتكامل ألف ليلة وليلة، لأن بما أنكم مرهقين فمش هتستمتعوا بأي أنشطة اليوم ده، ولكن من تاني يوم تقدروا تاخدوا مركب زجاجبة تشوفوا الشعب المرجانية، أو تطلعوا رحلة غطس، ولو بتحبوا الصحراء تقدروا تروحوا في رحلة بسيارات الدفع الرباعي للتخييم هناك وترجعوا بعد العشاء البدوي واللي بيكون وسط الموسيقى والرقص تحت النجوم.

كمان تقدروا تزوروا المركبة الغارقة وبيت الدولفين ومسجد الصحابة وخليج القرش والميركاتو ونافورة سوهو سكوير ومتحف البرديات ومحمية نبق وراس محمد وتيران وصنافير والووتر واي، وغيرها من الأماكن المميزة اللي هتستمعوا بكل لحظة فيها.

وماتنسوش في خلال زيارتكم لشرم الشيخ تزوروا مدينة السحر “دهب” اللي بتبعد عنها ساعة واحدة بالسيارة، وهناك هتستمتعوا بأشهى المأكولات والأجواء والحالة المختلفة من الهدوء والروقان، والأهم أنكم تقدروا تزوروا بلو لاجون أجمل مكان في العالم تقدروا تغطسوا فيه.

وأثناء العودة ماتنسوش تحجزوا قبلها بفترة وكمان تشتروا الهدايا التذكارية لكم وللأحباب والحمد لله على السلامة!