The Definitive Guide to Living in the Capital , Cairo , Egypt

الصورة الرئيسية لفندق مينا هاوس

 

من فترة صنف دليل السفر العالمي “الكوكب الوحيد” مدينة “القاهرة” كواحدة من أفضل 10 وجهات سياحية في 2020، وده كان سبب في فتح مجال واسع لسياح كتير من مختلف دول العالم إنهم يرتبوا زيارة للقاهرة في أقرب فرصة.

النهارده محررة موقع دويتشه فيله الألماني “عائشة الكيلاني” قررت تزور القاهرة من وسط عواصم كتيرة علشان تتعرف على أهم الأسباب اللي خلتها تكون ضمن تصنيف أفضل الوجهات السياحية في العالم، وزارت أماكن كتير وكتبت عن تجربتها في رحلتها للقاهرة، وفي السطور اللي جاية هننقل لكم أهم 3 معالم اختارتهم “دويتشه فيله” علشان يكونوا سبب في تميز القاهرة عن غيرها من مدن العالم، وخلاها في صفوف الوجهات السياحية العالمية جمب واشنطن وبراغ وغيرهم من المدن العالمية:

الأهرامات:

صحيح إنكم تشوفوها بس ده كفاية، لكن كمان ممكن تحضروا عروض “الصوت والضوء” اللي بتتقدم على سفح الأهرامات بالليل بمواعيد محددة مسبقًا، وبيحكي فيها الراوي عن قصص الفراعنة وأدواتهم وإخلاصهم للآلهة القديمة على مدار 3000 سنة، وإزاي الأهرامات اتبنت، وإيمان المصريين القدماء بالحياة الآخرة بعد الموت.

أما لو قررتوا تزوروها الصباح، فممكن تستمتعوا بميزة الدخول جواه الأهرامات، وتشوفوا التوابيت الجرانيت، وتركبوا جمال وخيل، وتتصورا صور جميلة للذكرى.

مشروع بناء الأهرامات بدأ في عهد الملك “خوفو” من الأسرة الرابعة، وهو اللي بنى أكبر هرم من 4600 سنة فاتت، ويقال إن الهرم الأكبر كان متغطي بالجير الأبيض، لكنه اختفى مع عوامل الجو والتغيرات المناخية، جه بعده ابنه “خفرع” وحفيده “منقرع” وبقى لكل هرم من دول قصة مختلفة، عن حقبة زمنية مختلفة.

أنسب أوقات الزيارة هي اليومين دول، وده علشان تستمتعوا بشمس الشتاء ووجود سائحين من مختلف الجنسيات حواليكم.

المتحف المصري:

على بعد خطوات من ميدان التحرير هتلاقوا المتحف المصري بلونه الوردي المميز، واللي بيضم أكتر من 120 ألف قطعة أثرية معروضة، كل مجموعة منهم بتحكي عن حقبة ملكية أو أسرة فرعونية معروضة بشكل خاص ومميز عن القطع اللي قبلها أو اللي بعدها، وأشهرهم آثار حقبة الملك “توت عنخ آمون” من الأسرة الـ 18، واللي اكتشفت مقبرته سنة 1922، ورغم إنه مات في عمر 19 سنة إلا إنه خد شهرة عالمية من بعد اكتشاف مقبرته وقناعه المصنوع من الدهب، والتابوت بتاعه اللي أبهر العالم.

مش هنتكلم كتير عن مقتنيات المتحف المصري، لكن لازم تزوروه وتستمتعوا بجمال وفن القدماء المصريين، اللي كان سبب لحد النهارده في إن مصر تبقى رائدة في عالم السياحة.

خان الخليلي:

نقدر نقول بالبلدي كده إن اللي يروح خان الخليلي هيغرق في حب الجمال المعماري، وهيسافر في رحلة عبر الزمن للقرن الـ 14، والدليل إن مفيش سائح بيزور القاهرة إلا ولازم يزوره،  سواء للقعدة أو التسوق أو التصوير والاستمتاع بجمال السوق المبدع ده، واللي هتلاقوا فيه كل حاجة محتاجينها سواء كتذكار أو كهدايا زي “ورق بردي، سجاد يدوي، مرمر، توابل، عطور، ملابس مصرية تقليدية” وغيرهم كتير من آلاف المنتجات، لكن المهم إنكم تفاصلوا على قد ما تقدروا.

القاهرة لسه فيها كتير من الأماكن اللي تخليها من أفضل الوجهات السياحية في العالم، لكن الـ 3 مزارات اللي قولناهم دول هما المزارات اللي كان ليها شهرة وصدى على مستوى العالم، وكانت سبب في اعتماد دليل السفر العالمي للقاهرة كواحدة من أفضل 10 وجهات سياحية في 2020.