The Definitive Guide to Living in the Capital , Cairo , Egypt

خلال إجازة عيد الفطر 2024 يحلى السفر، وللسفر فوائد كتير أهمها تنشيط الجسم وتحسين الموود وتغيير الجو، خاصةُ أن العيد جاي مع بدايات فصل الربيع، وده هيخلي للسفر خارج القاهرة متعة كبيرة، وماتنسوش أهم حاجة أنكم تستعدوا كويس للسفر وتكونوا مخططين هتسافروا إزاي وفين وتحجزوا فنادق ولا شاليهات ولا شقق، لكم لحظة؟ إيه هي الأماكن الممتعة لو قررت تسافر خارج القاهرة؟

شرم الشيخ ودهب

خلال عدة ساعات بالسيارة أو ساعة بالطيارة تقدروا تزوروا شرم الشيخ، واللي هتقدروا فيها تحضروا عشاء بدوي في قلب الصحراء داخل خيمة مخصصة وفقرات فنية مختلفة، وكمان تقدروا تزوروا المارينا والمشاية وتلعبوا مع الدولفين في بيت الدولفين بالهضبة وتستمتعوا بفقرات فنية مختلفة في ألف ليلة وليلة وتشوفوا التحفة الفنية “مسجد الصحابة” وتلعبوا في أكبر أكوا بارك، وتتسوقوا في الميركاتو وتحضروا حفلات السمر المنتشرة في خليج نعمة وخليج القرش، وتقدروا تزوروا المركب الغرقانة وتغطسوا في الأماكن المميزة.

من القاهرة مباشرة خلال ساعات أو من شرم الشيخ خلال ساعة بالسيارة تقدروا تزوروا مدينة دهب اللي مليانة بالمطاعم والمحلات والشواطئ المدهشة، وبالتأكيد الغطس والسباحة في بلو لاجون أجمل مكان في العالم طبقًا للتصنيفات العالمية، وماتنسوش رحلات السفاري وحفلات السمر المميزة.

 

مرسى علم

من أهم المناطق السياحية المميزة في مصر، وتقدروا تسافروا لها طيران أو بالأتوبيس أو السيارة، وفي مرسى علم أنشطة كتير مميزة زي أنكم تزوروا شواطئ زي حنكوراب المميز بالمياه الفيروزية النقية والرمال الذهبية وتقدروا تغطسوا هناك وتشوفوا الشعب المرجانية، والنيزك اللي المياه فيه دافئة طول السنة، وتقدروا تسبحوا مع الدلافين في ستايا ريف، أو الغطس مع السلاحف وبقر البحر بشاطئ أبو دباب.

سوما باي

الجو في سوما باي مشمس وجميل وخلال ساعات بالسيارة تقدروا تزوروا المكان اللي قريب من الغردقة، وهناك ممكن تزوروا منتجع الأكواتونيك اللي بيقدم العلاج بالاسترخاء الفاخر من خلال العلاجات المائية داخل حمامات السباحة المالحة أو مياه التونيك، وخدمات التدليك اللي بتساعد على الاستشفاء والاسترخاء، وكمان مايفوتكمش التزلج الشراعي وركوب الأمواج في تجربة مختلفة داخل كيت هاوس، وهتلاقوا هناك ركوب خيل في الصحراء أو السباحة مع الأحصنة في إسطبل ياسمين، وخلال أيام العيد هيكون فيه مهرجان الربيع المميز بفقراته الفنية الكتيرة داخل سوبار رووف توب، وتشوفوا الشعب المرجانية عند رصيف “ذا جيتي” وتغطسوا هناك كمان وسط السلاحف، ولو أنتم محظوظين هتشوفوا قرش الحوت المقيم هناك واللي اسمه “وولي”.