The Definitive Guide to Living in the Capital , Cairo , Egypt

كتير مننا بيتقل عن الحركة والتنقل والسفر بس علشان عنده مشكلة مع البعد واستهلاك وقت طويل في الانتقال من وإلى الوجهة بتاعته، يمكن ده فسر شوية ليه رحلات الفيوم دايمًا الرجل جارية عليها في كل وقت ومن كل الفئات.. مسافة قريبة، برنامج مريح، أنشطة مباشرة، مزارات لطيفة.. وشكرًا على كده..

لكن رغم كتر التردد على الفيوم إلا أنها لا زالت مدينة غير مكتشفة بالكامل، ده لأن معظم الرحلات اللي بتطلع بتقولك بجملة الاستقراب يعني ونخلينا في بحيرة قارون ووادي الريان والشلالات وبارك الله فيما رزق.. وإحنا بقى عايزين نقول لكم هنا أن الفيوم مش الحاجات دي وبس، بالعكس، الحاجات دي ممكن نعتبرها بالبلدي كده “مسح زور” بالعافية يعني..

إنما الفيوم فيها مزارات تانية كبيرة ومهمة جدًا جدًا ومش واخدة حقها معانا خالص، ولو عرفناها وركزنا معاها حبة هنلاقي نفسنا فتحنا نفسنا على اختيارات تانية أوسع لأماكن وأنشطة منوعة وغنية جدًا جدًا في نفس النطاق الجغرافي.. يللا بينا نلف لفتنا وناخد فكرة.

منطقة جبل المدورة والـ”Magic Lake”:

المنطقة دي من المناطق اللي مش واخدة حقها خالص رغم روعة المنظر وجودة الصور اللي ممكن تتاخد هناك.. أي نعم مافيش نشاط محدد تقدر تمارسه هناك لكن القمة المقوسة لجبل المدورة بتخليك واقف على نقطة عالية نسبيًا وكل ما حولها فراغ، وبالتالي ففرص اللعب بالإضاءة والخلفية في الصور بتكون عالية جدًا، علشان كده معظم المصورين بيعتبروه مكان مثالي لأخد الصور الـ”سلويت” أو صور الخيال اللي بيبقى الضوء فيها جاي من ضهر الجسم فيظهر الجسم مظلم تمامًا كأنه خيال لكن حدوده تفضل واضحة كويس.. ده غير أن البحيرة السحرية أو الـ”Magic Lake” ممكن برضه تعتبر مشهد عظيم وتقدر تستغلها في صور مستقلة أو كخلفيات لصور تانية، والـ”Magic Lake” اتسمت بالاسم ده لأنها ذات سطح سميك وعالي الكثافة وبالتالي بيكون ساكن تمامًا ومافيهوش أي اهتزازات أو تموجات زي ما بيبقى في أي مسطح مائي تاني، وده بيخلي شكل البحيرة من بعيد كأنها لوحة مرسومة مش كبحيرة حقيقية.. منظر ساحر فعلًا!

قرية تونس:

قرية تونس من الأماكن اللي الواحد بيخلع فيها توب التكلف بتاع الحياة المدنية، وبيرجع فيها لجمال الحياة الأولية السهلة اللي بتراعي كل احتياجاتك النفسية والروحية بجانب احتياجاتك الإنسانية الأخرى، البساطة هي الوصف اللي بينطبق على كل حاجة بدايةً من المباني والمرفقات لحد الناس اللي بتتعامل معاهم هناك.. القرية برضه تعتبر سوق واسع للمنتجات اليدوية البسيطة باختلاف أنواعها، وتعتبر كمان مجمع صغير لاستضافة ورش تعليم الحرف التقليدية.. الكلام عن “قرية تونس” كتير وماينفعش ينضغط في مساحة صغيرة زي دي، علشان كده هنكتفي بالخطوط العريضة اللي ذكرناها ونسيبكم لمقالنا السابق عن المكان (هنا) لو عايزين تعرفوا تفاصيل أكتر.

محمية وادي الحيتان:

محمية وادي الحيتان تعتبر جزء من محمية وادي الريان، وهي محمية ذات أهمية عالمية وتعتبر منطقة تراث إنساني، ده بسبب طبيعتها الجيولوجية اللي عبارة عن صحراء مبسوطة مليانة تكوينات صخرية طبقية بتمثل دليل مادي على فترة من تاريخ الأرض كانت فيها بعض المساحات اليابسة مغمورة كليًا بالمياه، كمان تم العثور على هياكل حيتان وكائنات بحرية أخرى تعود أعمارها لعشرات الملايين من السنين، وبعض الكائنات دي كانت بتمثل حلقات وسيطة في خط تطور الأحياء على الأرض.. المحمية بتشتمل على متحفين، المتحف المفتوح وهو عبارة عن طريق مفتوح في الصحراء وعلى جانبيه موجودة هياكل لبعض الكائنات اللي اتكلمنا عليها في نفس الأماكن اللي تم العثور عليها فيها، والمتحف التاني هو المتحف المقفول وهو عبارة عن قاعة دائرية كبيرة تم نقل الهياكل الكبيرة المتماسكة ليها، وهتلاقي على جدران المتحف لوحات شارحة لكتير من أسرار الحياة اللي بيمثل “وادي الحيتان” جزء منها، وكمان في قاعة عرض “فيديو” ملحقة بالمتحف بيتعرض فيها فيلم تسجيلي قصير عن تاريخ المكان وأهميته وبيشرح طبيعته البيولوجية والجيولوجية.. المحمية كمان بتعتبر مكان مثالي لرحلات الرصد الفلكي لأنها بعيدة جدًا عن أضواء المدينة وبالتالي بيكون التلوث الضوئي فيها منعدم تقريبًا وبكده بتكون السماء شديدة الوضوح والصفاء.. اللي ماراحش قبل كده أكيد اكتشف دلوقتي أنه فايته كتير!

الآثار المبهرة:

الفيوم مدينة غنية بالمباني والمعالم الأثرية اللي بتنتمي لحضارات مختلفة، من الآثار الفرعونية مثلًا أهرام: “هوارة” و “سيلا” و “اللاهون” و”ميدوم” أو “سنفرو”.. ومن الآثار اليونانية: “قصر قارون” اللي حجمه صغير نسبيًا لكن تصميمه المعماري ساحر جدًا، وأثبتت ملاحظات المتخصصين مؤخرًا تعامد الشمس عليه في أحد أيام الثلث الأخير من ديسمبر من كل عام ميلادي.. وأيضًا من الآثار اليونانية-الرومانية مدينة “كرانيس” الأثرية اللي تم اكتشاف العديد من المباني والمنشآت والمعدات والتماثيل والتوابيت وحتى المقابر الأثرية.. ومانقدرش ننسى كمان مدينة “ماضي” الأثرية اللي بتضم آثار فرعونية ورومانية.

الآثار الدينية:

الفيوم تعتبر مدينة ممثلة لمصر بشكل جيد جدًا، ده لأن مافيش أي مظهر من مظاهر الحياة المصرية سواء قديمًا أو حديثًا إلا وهتلاقيله أثر فيها.. الآثار الدينية في الفيوم ضمت مساجد زي مسجد “قايتباي” بالمنبر بتاعه اللي بيعتبر تحفة فنية، وكمان المسجد المعلق اللي بيرجع تاريخه للعصر العثماني.. وضمت برضه أديرة زي دير الملاك “جابريال” اللي بيحتوي على كنيسة أثرية بتحمل نفس الاسم، وزي “دير العزب” اللي بيضم كنيسة باسم السيدة العذراء وكنيسة “أبو السيفين” بالإضافة لمتحف أثري للمقتنيات القبطية.

السواقي:

من المناظر المبهجة كمان والمعبرة عن الطابع الفلاحي للفيوم هي السواقي أو النواعير، ومعلوم أنها بقت مجرد مزار سياحي في وسط المدينة حاليًا بعدما بقى يتم الاعتماد على وسائل أخرى في الري.

الفيوم مدينة غنية فعلًا، وكلامنا ده كان محاولة بس للإشارة إلى وجود مزارات وأنشطة تانية غير الأنشطة والمزارات المستهلكة المعتادة، لكن ده لا يعني أننا استوعبنا كل المزارات ولا وفينا الكلام عنها.. ده غير أننا تجاوزنا الكلام عن الشلالات وعن وادي الريان لهدف وضحناه في البداية.. وتجاوزنا برضه الكلام عن بعض المخيمات السياحية الخاصة زي “زوارة” بوادي الريان و “قطراني” على بحيرة قارون وغيرهم.. المهم: طالما وصلت معانا لنهاية المقال ده يبقى لازم زيارتك الجاية للفيوم تكون مختلفة!

مصدر الصور: ويكيبيديا