The Definitive Guide to Living in the Capital , Cairo , Egypt

معالم وسياحة

ركن فاروق.. خروجة ملكية بريحة التاريخ في حلوان

استراحة الملك فاروق حلوان ركن الملك فاروق
ركن فاروق.. خروجة ملكية بريحة التاريخ في حلوان
بواسطة
Omar Abd-elmaqsoud

في أقصى جنوب القاهرة، وتحديدًا في “حلوان” وعلى مساحة 12 ألف متر مربع، هتستمتع بفسحة أو نزهة أقل ما يقال عنها إنها “نزهة ملكية” في “استراحة الملك فاروق” أو المعروفة باسم “ركن فاروق”.

حكاية الاستراحة دي إنها كانت أحد استراحات ملك مصر “فاروق الأول” واللي كان بيبنيها علشان يقضي فيها أوقات فراغه، وصُممت من أيامها على مساحة 12 ألف متر مربع، على شكل مركب على شاطئ النيل، ومثبت على سطحه ستائر على شكل أشرعة المركب، إلا أنه مازارهاش غير مرتين في حياته، كانت الزيارة الأولى وقت افتتاحها سنة 1942، وساعتها أهداه واحد من تجار حلوان لوحة، لسة موجودة على جدران الاستراحة لحد النهارده، وممهورة بآية الكرسي.

سنة 1953 أصبحت الاستراحة ملك للدولة، وده قبل ما يتم ضمها لوزارة الآثار في السبعينيات، وده نظرًا لاحتوائها على مقتنيات نادرة جدًا للعيلة المالكة وهدايا ورثها الملك فاروق من أسرة محمد علي، ومن أبرزها ساعة ذهب فيها 12 فص من الزمرد النادر، وشرائح ذهب، مكتوب عليها باللغة الفرنسية إهداء للملك بمناسبة عيد جلوسه على العرش.

ده غير إن فيها لوحة فنية نادرة بتمثل موكب المحمل الشريف اللي كان بيوصل كسوة الكعبة لمكة المكرمة من مصر وهو بيمر بأحياء القاهرة المختلفة، وشايل الكسوة على الجمال.

الصورة من وكالة الأناضول
الصورة من وكالة الأناضول

عدت السنين، وقررت السلطات المسؤولة فتح الاستراحة أمام الجمهور، وتحويلها لمتحف، وجمعت فيها معظم مقتنيات العيلة المالكة اللي كانت موجودة في القصور والاستراحات الموجودة في محافظات مصر المختلفة، ومنها قصر عابدين في القاهرة، وقصر رأس التين في الاسكندرية.

الاستراحة بما إنها على النيل، فكانت بتبص على النيل من أدوارها التلاتة، ده غير إنها مزودة بمرساة نهري مصمم لاستقبال اليخوت، ده غير حديقة خاصة فيها أحواض من الحجر الجيري، و33 شجرة مانجو من ألبانيا.

مع الوقت، كانت الاستراحة بسبب جمالها وفخامتها، شاهدة على تاريخ طويل من تصوير أعمال سينمائية بارزة، كانت علامة فارقة في صناعة السينما المصرية، ومنها فيلم “نهر الحب” من بطولة “عمر الشريف” و”فاتن حمامة”، ومرورًا بالجزء الثاني من مسلسل “الجماعة” ومسلسل “حارة اليهود”.

مقترح