The Definitive Guide to Living in the Capital , Cairo , Egypt

الصور: صفحة المتحف على فيسبوك

المتحف المصري الكبير مش مجرد مكان للزيارة، دي تجربة متكاملة بتجمع بين عراقة الماضي وروعة التصميم الحديث. من أول ما بدأ التشغيل التجريبي، والمكان بقى من أكتر الأماكن اللي بتجذب الزوار، خصوصًا في العطلات الرسمية. المتحف بيعرض مجموعة ضخمة من كنوز الحضارة المصرية القديمة، في مبنى معماري مدهش على بعد خطوات من أهرامات الجيزة.

الناس بقت بتسافر مخصوص علشان تزوره، مش بس من مصر، لكن كمان من بلاد تانية. والمثير إنه مش بس للكبار، لأ كمان فيه متحف أطفال بيخلي الصغيرين يعيشوا مغامرة مصرية قديمة لا تتنسي!

أسعار تذاكر المتحف المصري الكبير 2025

وزارة السياحة والآثار حددت أسعار التذاكر كالتالي:

للمصريين: 200 جنيه.

للطلبة والأطفال وكبار السن المصريين: 100 جنيه.

للعرب والأجانب: 1200 جنيه (ما يعادل 25 دولار).

لطلبة وأطفال العرب والأجانب: 600 جنيه.

أسعار تذاكر متحف الأطفال داخل المتحف

المتحف بيقدم كمان تجربة تفاعلية للأطفال تساعدهم يفهموا تاريخ بلدهم بشكل ممتع ومبسط، والتذاكر كالتالي:

للأطفال المصريين: 150 جنيه.

للأطفال العرب والأجانب: 750 جنيه.

للأطفال العرب والأجانب المقيمين: 375 جنيه.

ولازم يكون فيه مرافق بالغ مع الأطفال من سن 6 لـ9 سنين.

وبالمناسبة: الشخص غير المصري المتزوج من مصرية أو العكس، وأولادهم، ليهم الحق ياخدوا تذكرة مصرية.

أسهل طرق المواصلات للمتحف المصري الكبير

لو بتسأل توصل إزاي؟ فيه كذا خيار مناسب من مختلف مناطق القاهرة:

1. مترو الأنفاق: خُد الخط التاني اتجاه المنيب وانزل في محطة “فيصل” أو “الهرم”، وبعدها اركب عربية متجهة لميدان الرماية، المتحف على بعد خطوات.

2. ميكروباص الرماية من رمسيس: من موقف رمسيس مباشرة لحد ميدان الرماية، وبعدها تمشي شوية للمتحف.

3. أتوبيس نقل عام من رمسيس: فيه أتوبيس بيطلع من رمسيس للمريوطية وبيعدي على المتحف في طريقه.

4. من مدينة نصر: فيه ميكروباصات للرماية بتطلع من المدينة، توصل بيها وتتمشى للمتحف.

5. خط المترو الرابع (قريبًا): خلال الشهور الجاية، أول ما يشتغل الخط الرابع للمترو، هيبقى عندك محطة باسم المتحف المصري الكبير توصلك لبابه مباشرة!

وأخيرًا..

المتحف المصري الكبير تجربة ماتتفوتش، سواء كنت مهتم بالتاريخ، أو عاوز تفسح ولادك في مكان مفيد وجميل. احجز تذكرتك، وخطط زيارتك من دلوقتي.