The Definitive Guide to Living in the Capital , Cairo , Egypt

تقريبًا مافيش حد من عشاق السفر والرحلات والمغامرات ما يعرفش متسلق الجبال وأول مصري يتسلق جبل إيفرست، المغامر “عمر سمرة”.

“سمرة” بدأ فعلياً أول مجلة متخصصة بتتكلم عن السفر والرحلات وسماها “سفرية” وبتتناول وجهة نظر المسافر العربي، في الشرق الأوسط وشمال أفريقيا، وبتصدر بالعربي والانجليزي، وهتلاقوا فيها عدد من قصص ومغامرات المسافرين من كل الدول العربية،واللي بيسافروا لكل حتة في الدنيا، بالإضافة لدليل كامل لمدن في مصر ولبنان والإمارات، وخطوات استخراج االفيزا والتأشيرات لأكتر من 20 دولة حوالين العالم.

المجلة الجديدة لحد دلوقتي “أونلاين” على أمل إننا نشوفها مطبوعة قريب، وبتحكي تقريبًا عن كل ما يتعلق بالسفر، من أول زي  ما قولنا خطوات استخراج الفيزا، لحد تأثير السفر في حياة اللي بيسافروا، واللي مش مقتصر على المتعة اللحظية بس، لكنه كمان بيغير بشكل كبير وملحوظ في تفكير وثقافات البشر، وبيخليهم أكثر تقبلاً للاختلاف والتنوع، وبيقبلوا الآخر بشكل أفضل، وده تحديدًا الرسالة الأساسية للمجلة، واللي هيحاول “سمرة” وفريقه إنهم يوصلوه لأكبر عدد ممكن من سكان الشرق الأوسط وشمال أفريقيا. 

“سفرية” مجلة مش بس قايمة على التجربة، والقصص والمواضيع اللي موجوده فيها، واللي بتخص المسافرين المصريين والعرب، لأ دي كمان هتتناول حلول للمشاكل اللي بتقابلهم كمسافرين من الشرق الأوسط، ويوصلوها لناس بتحب السفر لكن ماقدروش لحد دلوقتي يتخطوا العقبات ويسافروا، بالإضافة إلى قسم مهم جدًا من أقسام المجلة، وهو سفر البنات واللي هتساعدهم المجلة فيه، لاختيار أفضل الأماكن اللي تناسبهم، وكل الحاجات والأدوات والاحتياطات اللي تخلي عملية السفر أسهل بالنسبة ليهم، فيقدروا يوصلوا لآخر نقطة خيالهم يحلم بيها، ويستعيدوا توازنهم في مواجهة مجتمع بيفرض وصايته عليهم.

العدد التجريبي لـ “سفرية” نزل في أغسطس 2018، وكانت البداية في الأصل لما شابين بيحبوا السفر والمغامرات “أحمد فارس” و”مونيكا جرجس”، اقترحوا على “عمر سمرة” يعملوا سوا “أول مجلة “أونلاين” مش بس بتحكي قصص المسافرين من الشرق الأوسط، كمان بتحل المشاكل اللي بتقابلهم زي الفيزا والسفر بميزانية محدودة، خاصةً في الوقت اللي بيعاني فيه سوق السفر من غياب محتوى قوي يساعد ويشجع الشباب العربي في رحلاتهم ويستكشفوا العالم والطبيعة من حواليهم، “عمر” بيقول: الفكرة كانت جميلة جدًا لكن صعبة، ويمكن ده اللي حمسني، طلوع الجبال بيعلمك إن أجمل الحاجات بتيجي للي بيتحدوا الصعب”.

النهاردة مجلة  “سفرية – Safareya” بيزور صفحتها أكتر من  24 ألف شخص مختلف شهريًا، وانتشارها على “الفيسبوك” خلى المحتوى بتاعهم يوصل لأكتر من 3 مليون شخص على مدار الفترة اللي فاتت، وابتدت تغير فعلاً طريقة تفكير الناس في السفر، وابتدت تساعدهم يقوموا من على الكنبة ويكتشفوا العالم، وده باين من تعليقات الناس، ده غير إنها ابتدت تعلم شباب كتير ازاي يتغلبوا على مشاكل الفيزا والفلوس، واللغة، من ناحية عشان الموضوع ممتع، ومن ناحية تانية عشان “لو قدرنا نساعد ونجهز 5 أشخاص بس للسفر، هنكون قدرنا نخلي العالم مكان أفضل لمدة حياة الـ 5 أشخاص دول، وحياة كل اللي هيأثروا فيهم”.

علشان تزور صفحة “سفرية” بالعربي على الفيس بوك.. دوس هنا. 

ولوعايز تزور صفحة “سفرية” بالإنجليزي على الفيس بوك .. دوس هنا.