The Definitive Guide to Living in the Capital , Cairo , Egypt

معالم وسياحة -
مقترح

سياسة وفن وتاريخ.. رحلة لـ 4 من أجمل قصور القاهرة الأثرية

قصر الدوبارة قصر المنيل قصر عائشة فهمي قصر عابدين قصر محمد علي قصور أثرية في القاهرة قصور القاهرة التاريخية
سياسة وفن وتاريخ.. رحلة لـ 4 من أجمل قصور القاهرة الأثرية
بواسطة
Cairo 360

القاهرة فيها مجموعة عظيمة من القصور التاريخية الجميلة، اللي مافيش زيها في العالم كله، لكن المشكلة إن كتير من القصور دي مجهولة لكتير من المصريين. وممكن يكون السبب هو نقص الدعاية لها، أو لأن البعض فاكر إن زيارتها مهمة صعبة.. والحقيقة إن الأمر ده لازم يتغير.. علشان كدة هنعرفكم على 4 من أجمل قصور القاهرة اللي اتحولت لمتاحف مميزة.. وهي في انتظاركم لزيارتها في أقرب وقت، ونوعدكم.. مش هتندموا!

تعالوا نبدأ:

قصر عابدين

بيقع قصر عابدين في ميدان الجمهورية في وسط القاهرة، وبيُعتبر واحد من أهم المعالم الأثرية في مصر، مش لمكانته التاريخية وبس، لكن كمان لقيمته الفنية والمعمارية. لأن قصر عابدين واحد من أهم التحف المعمارية والمزارات السياحية في القاهرة لحد النهارده.

بناء القصر كان أمر من الخديوي إسماعيل بعد تولّيه الحُكم مباشرة في سنة 1863، واسمه بيرجع لعابدين بك أحد قادة الجيوش المصرية، وبيضمّ قصر عابدين أكتر من 500 غرفة بالإضافة إلى الأجنحة والقاعات، منها الجناح البلجيكي اللي خُصِّص لاستقبال ضيوف مصر المُهمّين، وكمان بيضمّ قاعات تانية منها قاعة محمّد علي اللي بتُعدّ أكبر القاعات وأضخمها، ده غير وجود متحف خاص بمُقتنيات أسرة محمّد علي باشا، وعدد آخر من الكنوز والمُقتنيات الفنية.

كمان بيحتوي قصر عابدين على مكتبة فيها أكثر من 55 ألف كتاب ومسرح فيه مئات الكراسي لسة بيُستخدَم لحد النهارده.

 

قصر عائشة فهمي

بيقع قصر عائشة فهمي في الزمالك. بناه سنة 1907 فهمي علي باشا كبير ياوران الملك فؤاد، لبنته عائشة، وأُطلِق عليه إسم “قصر الخلد”. انتقلت ملكيّته في العام 1985 إلى وزارة الثقافة، وتمّ تسجيله كمبنى أثري عام 2010.

بيتكوّن قصر عائشة فهمي من غرفٍ كثيرة اتحوَلت لصالات لعرض لوحات أبرز الفنانين التشكيليين، كمان بيتكوَّن الطابق الثاني في القصر من غرف لها طابَع أثري، منها الغرفة اليابانية التي تمّ إهداؤها للأميرة عائشة فهمي وبتحوي على نقوش وعبارات باللغة اليابانية، كمان يتميّز القصر بالجِداريات المصنوعة من الحرير والكتّان.

أُعيدَ افتتاح القصر مؤخّرًا أمام الزوّار بعد عملية ترميم طويلة استمرت حوالي 10 سنين.

 

قصر المنيل

بيُطلّ قصر الأمير محمّد علي المعروف بمتحف قصر المنيل على جزيرة الروضة بالمنيل. وبيعد من أجمل متاحف القاهرة، وتصميمه على طراز إسلامي مقتَبس من العمارة الفاطمية والمملوكية.

بيتكوَّن القصر من طوابق وقاعات مختلفة لاستقبال الضيوف وكمان مسجد صغير، وبيُعد رغم صِغر حجمه تحفة معمارية. ومن الحاجات المميزة فيه هو إن سقف المسجد مزين بعرائس على شكل رؤوس أفاعي كوبرا.

بيُعد قصر المنيل أحد المتاحف اللي مفتوحة أمام الزوار برسوم دخول بسيطة جدًا معظم أيام الأسبوع، كمان بتُقام فيه المعارض اللي بتحكي قصة الأمير محمّد علي توفيق واستعراض لأبرز صوَره وتراثه من خلال أرشيفه الفوتوغرافي ومُقتنياته.

 

قصر الدوبارة

بيُعتَبر قصر الدوبارة الموجود في جاردن سيتي من أهم القصور الأثرية، وده لمكانته السياسية، لإنه احتل مع قصر عابدين أهمية كبيرة، وده لكون قصر عابدين كان مقر الحُكم الرسمي لأسرة محمّد علي، في الوقت اللي استخدمت فيه السفارة البريطانية قصر الدوبارة كدار للحماية ومقّر للمندوب البريطاني.

وبيعود قصر الدوبارة للأميرة أمنية إلهامي زوجة الخديوي توفيق إسماعيل، وكان بناء القصر ده نواة لإنشاء حيّ “الباب العالي” اللي بيُعرَف حاليًا باسم حي جاردن سيتي.

صمَّم القصر وبناه المعماري الإيطالي “أنتونيو لاشياك” وبعدها اتحول لمدرسة “المير دي ديو” للبنات.

 

اللي فات ده كان مجرد نماذج بسيطة من عشرات القصور الموجودة في القاهرة.. منتظرين إيه لزيارتها؟

مقترح