The Definitive Guide to Living in the Capital , Cairo , Egypt

الشتاء بيكون له مذاق مختلف لما يكون نتيجته “ثلج”، وده اللي حصل في مدينة سانت كاترين في سيناء، واللي الثلج كان مغطيها، والشكل العام كان جميل، وقام المصور يحيي الزيني بتوثيق المشهد ده في مجموعة صور مميزة بتظهر جمال سانت كاترين في الشتاء.

الزيني اللي صور مدينة سانت كاترين وهي مكسوة بالأبيض بعد تغطية الثلج لها، وصف علاقته بالكاميرا في حواره مع موقع سي إن إن عربية بأنها علاقة زواج، لأنه مش بيسيبها في أي مكان رايحه رغم ثقل وزنها مع المعدات، وأضاف أن تصويره لسانت كاترين وسقوط الثلج عليها مش جديد لأنه عاشق للطبيعة وتصوير مناظرها المختلفة.

وقال يحيي الزيني إنه استعد لتصوير سقوط الثلج بعد ما أعلنت الأرصاد عن احتمالية سقوطه في النشرة الجوية، وعلى طول أخد عربيته وطلع على سانت كاترين ووصلها قبل الفجر، وانتظر سقوط الثلج وصوره، وكمان طلع لايف علشان يثبت للناس أن كلامه حقيقي وجمال الصور طبيعي 100%.