The Definitive Guide to Living in the Capital , Cairo , Egypt

الحقيقة أن الأماكن التاريخية الكثيرة على أرض مصر بتخليك تحس أنها مش مجرد بلد، دي متحف مفتوح! في كل مكان تاريخ وحضارة ومباني عظيمة، وبرضه حاجات غريبة! ومن أغرب الأماكن التاريخية في مصر، المئذنة المائلة، اللي البعض بيشبه فكرتها بفكرة برج بيزا المائل، المئذنة اللي بنتكلم عليها موجودة في محافظة المنيا بصعيد مصر، وعمرها أكثر من 1000 سنة، وهي مئذنة خاصة بمسجد الجنيدي، الشهير بالمسجد العتيق.

مئذنة مسجد الجنيدي بتقع على بعد 30 كيلو متر شمالي مدينة المنيا، والمئذنة دي بناها الفاطميين بشكل مائل علشان تقاوم حركة الرياح الشديدة على مر العصور وعلشان تفضل عايشة آلاف السنين، ونقدر نقول إن فكرتهم نجحت، لأن المئذنة جرى بنائها سنة 368 هجريًا، يعني بيتجاوز عمرها حاليًا الـ 1000 سنة.

للأسف المسجد مش تابع لهيئة الآثار، بسبب التغيرات الكثيرة اللي دخلت عليه خلال عقود طويلة نتيجة لحالته الإنشائية السيئة، لكن المئذنة نفسها تاريخية وفضلت زي ما هي من وقت ما اتبنت ولحد النهارده.

الفاطميين بنوا المئذنة المائلة بالشكل ده وبدقة هندسية شديدة علشان ماتتأثرش بالرياح اللي كانت بتضرب المنطقة اللي اتبنى المسجد على أرضها.

وبتتكون المئذنة المائلة في مسجد الجنيدي من أكثر من طابق، بإجمالي طول يصل إلى 33 متر، وبتمتاز بوجود الزخارف الإسلامية، ودرجة ميلها بتصل إلى 21 درجة تقريبًا.