The Definitive Guide to Living in the Capital , Cairo , Egypt

معالم وسياحة

عمره أكتر من 100 سنة.. 7 معلومات مهمة عن المتحف الحيواني بالجيزة (صور)

المتحف الحيواني بالجيزة سعر تذكرة المتحف الحيواني متاحف القاهرة متاحف حديقة الحيوان
عمره أكتر من 100 سنة.. 7 معلومات مهمة عن المتحف الحيواني بالجيزة (صور)
بواسطة
Mohamed Talaat

مصر فيها متاحف مهمة، لكن للأسف مش واخدة حقها إعلاميًا، وناس كتير ممكن تكون ماتعرفش بوجودها في بلدنا، ومن المتاحف المهمة دي، المتحف الحيواني، اللي موجود داخل حديقة الحيوان بالجيزة، واللي بيتميز بتصميمه الرائع ومقتنياته المميزة.

هنا، هنعرفكم على 7 معلومات مهمة عن المتحف العظيم ده:

1 – المتحف الحيواني بالجيزة هو ثالث متحف من نوعه في العالم كله، وتم افتتاحه لأول مرة سنة 1914، وتم تجديده 3 مرات، الأولى كانت سنة 1963، والمرة الثانية كانت في 1988، وبعدها تم إغلاقه لمدة 10 سنين، قبل ما يتم  تطويره وافتتاحه للجمهور مرة تانية سنة 2015.

2 – سعر تذكرة المتحف 10 جنيه بس، وبتديك الحق تزور أدواره الثلاثة اللي بتحتوي على 10 بيئات مختلفة منهم  الرطبة، الأفريقية، الصحراوية، البحرية، عالم الأمازون، عالم القرود، بيئة الكيسيات، وعالم المفترسات.

3 – المتحف بيحتوي على مقتنيات كتيرة جدًا، منها تمساح نيلي محنط، ومجموعة هياكل عظمية، ونماذج محنطة للغزلان والحمار الوحشي بيعود أصلها إلى آلاف السنين ووبترجع للبيئة الأفريقية.

4 – المتحف فيه كمان نماذج محنطة للكوبرا المصرية وهياكل عظمية للإنسان والشامبنزي والنسناس.

5 – من المقتنيات المميزة في المتحف الحيواني، تمساح فرعوني بيتعدى عمره 5 آلاف سنة، تم العثور عليه محنط في واحدة من المقابر الفرعونية.

6 – الطابق الثالث من المتحف فيه الطيور بتقسيماتها العلمية المختلفة، زي الدجاج السلطاني والنعام الأمريكي والأوز الهندي وأبو منجل.

7 – بيضم المتحف 1352 طائر مُحنط، 555 من الثدييات، و259 من الزواحف، و115 من الجماجم، 49 من الرءوس، و35 من الهياكل العظمية، بينهم قطع نادرة لحيوانات ماتت قبل حوالي 110 سنة وكانت موجودة في حديقة الحيوانات.

مقترح