The Definitive Guide to Living in the Capital , Cairo , Egypt

معالم وسياحة

عملات مصر أجمل بعدسة بيشوي فايز

عملات مصر أجمل بعدسة بيشوي فايز
بواسطة
Mostafa Fathi Abdelfadil

في جيب كل مصري ومصرية فلوس، لكن ما حدش فكر قبل كده يبص على العملات الورقية اللي معاه بنظرة مختلفة، ما حدش سأل نفسه إيه الآثار اللي مرسومة على العملات المصرية، لكن بيشوي فايز الشاب المصري اللي بيعشق التصوير، قرر يعمل ده، مسك كل عملة ورقية وعرف مرسوم عليها إيه.. وقرر يلف مصر علشان يصور العملة الورقية مع الأثر التاريخي الحقيقي اللي مرسوم عليها، والنتيجة النهائية كانت مبهرة.. والصور انتشرت على الفيسبوك بشكل كبير.. علشان كده قررنا في كايرو 360 نقابل بيشوي ونتكلم معاه عن مشروعه التصويري المهم:

ليه فكرت تصور العملات الورقية مع الآثار؟

أنا بقى لي 3 سنوات تقريبًا عمال ألف مصر علشان أوثق كل مكان جميل فيها، وباستخدم كاميرا محترفة بعدسة عين السمكة أو الـ Fisheye ودي باختصار عدسة بتديك صورة دائرية بنسبة 180 درجة، ولأني مصور فبحب أركز مع التفاصيل، علشان كده كنت بابص للفلوس نظرة مختلفة عن نظرة المواطن العادي، وقررت اعمل مشروع بيدمج ما بين العملات وما بين الأماكن الحقيقية اللي مرسومة على العملات، وبدأت بالجنيه المصري اللي مرسوم عليه معبد أبو سمبل، سافرت أسوان مخصوص علشان أصور الجنيه مع المعبد الحقيقي، الموضوع كان متعب وصورت أكثر من 300 صورة علشان اعرف أخرج النتيجة مضبوطة، لكن مشروع العملات هو جزء من مشروع أكبر لتوثيق مصر كلها بعدسة عين السمكة.

هل كنت متوقع نجاح الفكرة؟

أنا مؤمن أن كل إنسان بيتعب لازم هيكون لتعبه نتيجة، وكل ما الإنسان بيفكر بطريقة إبداعية كل ما هينجح أكثر، أنا عملت مجهود كبير علشان أوثق الأماكن المصرية، كان هدفي أقول لكل العالم أن مصر جميلة، والناس حبت الفكرة لأنهم حسوا أن وراها مجهود كبير.

مشروع تصوير العملات مع الآثار خد منك وقت قد إيه؟

مشروع تصوير مصر كلها اخد مني حوالي 3 سنين، ومشروع تصوير العملات مع الآثار الحقيقية اخد مني حوالي 3 شهور لأن كنت بروح كل مكان أكثر من عشر مرات، وبصور المكان الواحد 100 مرة علشان أعرف اخرج الصورة مضبوطة.. الموضوع كان مرهق ومش سهل، واختارت عدسة عين السمكة لأنها بتخرج الصور حلوة.. وده خلى ناس كتير تفتكر أني استخدمت فوتوشوب لتعديل الصور، لكن الحقيقة أن ده ما حصلش، الصور خرجت كده بدون فوتوشوب أو أي برامج لتحرير الصور.

إيه مشروعك الجديد؟

أنا مستمر في توثيق مصر بالكاميرا وبعدسة عين السمكة، عاوز أخلي الناس تتفرج على مصر بطريقة مختلفة، البلد مليانة أماكن جميلة مش موجودة في العالم كله، وللأسف مصريين كتير مش عارفين بلدهم كويس، مثلاً محمية كهف وادي سنور في بني سويف، لما رحت صورت المكان ما كنتش مصدق أن المكان الرائع ده في مصر، لما رفعت الصور على الفيسبوك الناس ما كانتش مصدقة، كانوا فاكرين أنها من بلد تانية.

هل فكرت تعمل كتاب مطبوع لتوثيق صورك؟

أنا بالفعل باجهز لكتاب مصور، هيكون مليان صور جميلة من كل أنحاء مصر، وهيصدر قريب إن شاء الله، وأول نسخة هتكون هدية لموقع كايرو 360.

 

مصر مليانة أماكن جميلة.. وشباب أجمل.. شباب مجتهد، متحمس، مليان أمل.. وبيشوي نموذج لشاب مصري يستحق كل التحية.

مقترح