The Definitive Guide to Living in the Capital , Cairo , Egypt

كلنا عارفين إن المتحف المصري الكبير أصبح تقريبًا جاهز للافتتاح، ومتوقع يفتح أبوابه في النصف الثاني من 2022، لكن مش كتير مننا يعرفوا إن فيه 3 متاحف مهمين تانيين جاهزين لفتح أبوابهم للجمهور في السنة دي.. في الموضوع ده هنعرفكم على المتاحف دي.

بحسب تصريحات إعلامية حديثة للدكتور مؤمن عثمان، رئيس قطاع المتاحف بوزارة السياحة والآثار، مصر بتستعد لافتتاح 3 متاحف مهمين في 2022، وهي متحف عواصم مصر بالعاصمة الإدارية الجديدة، واللي أصبح بالفعل جاهز للافتتاح، ومتحف قصر محمد علي في شبرا، اللي هيتم افتتاحه خلال أسابيع قليلة، بالإضافة للمتحف اليوناني الروماني بالإسكندرية، واللي بيعتبر من أكبر المشاريع السياحية في مصر الفترة دي.

الدكتور مؤمن عثمان كشف كمان إنه هيتم تطوير متاحف تانية إقليمية زي متحف الإسماعيلية، ومتحف كوم أوشيم في المنوفية، ومتحف الجزيرة في أسوان، وبالتالي نقدر نقول إن سنة 2022 هتكون سنة المتاحف العظيمة.

وقال “عثمان” إن قصر محمد على هو من متاحف القصور، وبيعتبر تحفة فنية ومعمارية ومن القصور المبنية في مصر على طراز مختلف، وكان يستخدم كمكان للنقاهة، وفيه 4 غرف بس بخلاف أي قصور تانية في القاهرة.

وعن المتحف اليوناني الروماني، وضح “عثمان” إنه في غاية الأهمية ومن المتاحف الكبرى والقومية في مصر، ومن أول المتاحف اللي اتبنت في مصر سنة 1892م، وبيرصد التاريخ المصري من وقت دخول اليونان مصر من القرن الرابع إلى السادس قبل الميلاد، وفيه حوالى 60 ألف قطعة، هيتم عرض 20 ألف قطعة أثرية منها.