Mohammed Sabry
خلال الفترة اللي فاتت كنا بنسمع عن أعمال التطوير والبناء، اللي بتتم في المتحف المصري الكبير. المتحف مكانه في الهرم، وهيضم أكبر كمية من الآثار، منها اللي هيتعرض لأول مرة. وخلال السطور اللي جاية هنقول لكم على آخر التفاصيل اللي وصلنا لها عن المتحف.
المشرف على مشروع المتحف طارق توفيق أكد أن المتحف هيضم 50 ألف قطعة أثرية في العرض الدائم. و50 ألف هتكون في المخازن، للدراسة والمعارض المتغيرة. يعني بمجمل 100 ألف قطعة أثرية.
صورة تخيلية
افتتاح المتحف هيكون في 2020، ومساحته الكلية بتزيد عن 117 فدان. والمبنى نفسه على مساحة 165 ألف متر مربع. وهيتم عرض 20 ألف قطعة أثرية لأول مرة خلال الافتتاح.
نجم المتحف هيكون الملك توت عنخ آمون. اللي هتتعرض آثاره الكاملة لأول مرة. حوالي 1800 قطعة من مجموعته، من أصل 5000.
بالنسبة لافتتاح المتحف، كان المقرر يكون في 2022. لكن جت توجيهات قيادية بتسريع أعمال الإنشاء وافتتاحه في 2020، علشان يقوم بدوره في تحريك النشاط السياحي في مصر. ويرجع السياحة لأفضل حالاتها.
تكلفة إنشاء المتحف بتوصل لمليار دولار. وتم صرف نص المبلغ. ومصر بتمول المشروع بقروض ميسرة من اليابان.
أما عن المتحف المصري في التحرير، هيفضل محتفظ بكل القطع الأثرية اللي فيه. باستثناء نقل مجموعة آثار الملك الذهبي توت عنخ آمون.
