The Definitive Guide to Living in the Capital , Cairo , Egypt

مصر محظوظة بأهلها المبدعين، اللي طول الوقت عندهم أفكار مدهشة! ومن النماذج المصرية المميزة، “محمد سيد نور” المصري الصعيدي اللي اتخرج من كلية الصيدلة لكنه عشق التراث والتاريخ والفوتوغرافيا، فقرر يبني بيته بنفس طريقة أجدادنا في الصعيد، واستخدم الطين في البناء، فأصبح بيته في قرية الشيخ علي، التابعة لمركز أدفو بأسوان بصعيد مصر، على مساحة تقدر 490 متر هو أول متحف أهلي للتراث في الصعيد.

تعالوا نتعرف أكتر على حكاية “محمد سيد نور” وبيته المميز:

رحلة متحف “محمد سيد نور” اللي بيضم 200 قطعة من التراث المعبر عن البيئة الصعيدية، ماكنتش رحلة سهلة، لإن “نور” اعتمد على نفسه في بناء البيت خلال 7 سنوات هم فترة التنفيذ والبناء والزخرفة، لكن النتيجة النهائية كانت مبهرة، وأصبح البيت جنة حقيقية لكل عشاق التاريخ والتراث الصعيدي.

بيحكي “نور” في تصريحات صحفية إنه لما كان عمره 17 سنة وشاف بيت المهندس الإنجليزي سومرز كلارك اللي قريب من قريته الصغيرة في أدفو، واللي بناه المهندس الكبير الراحل حسن فتحي باستخدام الطين، أصبح عنده حلم بناء بيت من الطين بنفس الطريقة.

بدأت رحلة “نور” في البحث عن مهندس يقوم بتصميم بيت من الطين، لكنه ماوصلش لحد، فقرر المواطن المصري يصمم البيت بنفسه، وبدأت رحلة الدراسة وجمع المعلومات واللي استغرقت 7 سنين.

استعان “نور” بالعمال المحليين في الصعيد، واللي كانت لهم خبرات عظيمة في البناء بالطين، بعدها بدأت مرحلة التنفيذ بقطع الطوب على طريقة قدماء المصريين القديمة، وهي استخدام الطين والتبن والتخمير في الماء لمدة أسبوع على الأقل، وبالطريقة دي تم تنفيذ 130 ألف طوبة تم استخدامهم في بناء البيت.

وعن متحفه المنزلي، بيقول “نور” إنه جمع 200 قطعة متنوعة من التراث الصعيدي، بداية من الفخار بالمباخر والأصداف، ومفاتيح الأبواب والمنازل القديمة، وغيرها من تراث الصعيد القديم، وقام بتعليم أطفاله طريقة المحافظة على التراث داخل بيته، وعلمهم التعامل باحترام مع كل الضيوف اللي حابين يزوروا البيت في أي وقت.

لو قررتم زيارة أسوان في يوم لازم تحطوا في جدول رحلتكم زيارة بيت محمد سيد نور في قرية الشيخ علي، التابعة لمركز أدفو بأسوان.