The Definitive Guide to Living in the Capital , Cairo , Egypt

مطار القاهرة الدولي.. صرح عملاق في العاصمة، وتقريبًا مافيش مواطن مصري مادخلهوش، سواء كنا مسافرين أو بنودع حد مسافر.. وعلى مدى سنين طويلة، شوفنا تطويرات وتحسينات مرت عليه، لكن عمرنا ما سألنا نفسنا عن تاريخه والقصة وراء إنشاؤه..  والنهارده في ذكرى تأسيسه.. هنستغل الفرصة العظيمة دي علشان نعرف أكتر عنه:

1- الحكاية بدأت سنة 1942 لما القوات الجوية الأمريكية والجيش البريطاني قرروا يعملوا مطار عسكري على بعد 5 كيلومتر من مطار ألماظة علشان يخدم قوات التحالف المشاركة في الحرب العالمية الثانية، وتم تسميته ساعتها باسم “مطار باين فيلد” كتخليد لاسم “جون باين” أول طيار أمريكي مات في معارك الحرب العالمية الثانية.

المطار في وقتها كان من أكبر المطارات في المنطقة، وكان بيضم مدرجين للطيارات، وبرجين مراقبة جوية و4 ورش صيانة للطيارات.

2- فى 1945 وبعد انتهاء الحرب العالمية الثانية اتحولت مصلحة الطيران المدني المصرية، من إدارة صغيرة تابعة لوزارة الحربية لـ “مصلحة” مصرية مستقلة  وبناءً على القرار ده تم نقل كل المطارات المصرية اللي كانت تحت الإدارة البريطانية ومنشآت الطيران ومسؤولياته للجانب المصري في 1946.

3- أول قرار لمصلحة الطيران المدني المصرية كان تحويل مطار “باين فيلد” لمطار مدني دولي، وتوسعة صالات السفر والوصول علشان يستوعب أعداد أكبر من الركاب المسافرين والقادمين، وتخصيص مطار ألماظة للرحلات الداخلية.

4- بعد قرار مصلحة الطيران المدني بتحويل مطار “باين فيلد” من عسكري لمدني، كانت الخطوة الثانية هي تغيير اسم المطار من مطار “باين فيلد” لمطار “فاروق الأول” وكان بيستقبل حوالي 200 ألف راكب في الوقت ده.

5- بعد ثورة يوليو اتغير اسم المطار من مطار “فاروق الأول” لـ “ميناء القاهرة الجوي” وبعد كده اتعمل مبنى جديد سنة 1957 وتم افتتاحه بشكل رسمي زى النهارده 18 مارس 1963 وكان في وقتها بيستوعب 5 مليون مسافر في السنة.