The Definitive Guide to Living in the Capital , Cairo , Egypt

الصور: الصفحة الرسمية للمتحف المصري الكبير على فيسبوك

مصر بتحط اللمسات الأخيرة قبل الافتتاح الرسمي للمتحف المصري الكبير، اللي بيعتبر من أهم المشاريع الثقافية في تاريخها.

المتحف بيبعد شوية خطوات بس عن أهرامات الجيزة، وبيمتد على مساحة 500 ألف متر مربع، وده بيخليه أكبر متحف أثري في العالم مخصص لحضارة واحدة.

في الشهور اللي فاتت، المتحف فتح أبوابه جزئيًا للتشغيل التجريبي، وده شمل البهو العظيم والمسلة الضخمة والدرج الكبير. كمان تم الافتتاح الجزئي للجمهور يوم 16 أكتوبر 2024.

أما عن قاعة الملك توت عنخ آمون، فهي هتكون متاحة بالكامل مع الافتتاح الرسمي، واللي هتضم أكتر من 5390 قطعة أثرية فريدة، منها حاجات بتتعرض لأول مرة!

المتحف المصري الكبير بيضم حوالي 100 ألف قطعة أثرية، من بينهم المجموعة الكاملة لكنوز الملك توت، واللي زي ما قولنا أول مرة هتتعرض كلها قدام الزوار.

موعد الافتتاح الرسمي؟

رئيس الوزراء د. مصطفى مدبولي أعلن إن الافتتاح الرسمي للمتحف هيكون يوم 3 يوليو 2025. يوم عالمي بكل معنى الكلمة، هيشهد عرض مجموعات ضخمة من القطع الأثرية، وكمان فتح قاعات توت عنخ آمون للجمهور لأول مرة.

التحضيرات شغالة بأعلى مستوى لضمان تقديم تجربة ثقافية مميزة، من تجهيز قاعات العرض الدائمة وتحديث نظم الإضاءة والتكييف، لتدريب الكوادر البشرية.

كمان بيتم تطوير الطرق المحيطة بالمتحف لتسهيل وصول الزوار.

المتحف المصري الكبير مش بس مشروع سياحي، ده مشروع وطني بيهدف لتأكيد مكانة مصر كوجهة ثقافية عالمية، وهيستقبل ملايين الزوار سنويًا، وهيخلق آلاف فرص العمل المباشرة وغير المباشرة، وده أكيد هيساهم في تعزيز الاقتصاد الوطني.