The Definitive Guide to Living in the Capital , Cairo , Egypt

عمر مراد

مصدر الصور

الفن بيخلينا نحس بقيمة الحاجة مهما كانت عادية، والفن أنواعه كتير وأشكاله مختلفة، ولما بيختلط الفن مع العراقة التاريخية في مبنى يبقى كدا عدى الجمال بمراحل، زي قصر”الطاهرة” الموجود بجوار قصر الاتحادية.. تعالوا نتعرف أكثر على قصر الطاهرة وتاريخه.

 

في 1924 ابنة الخديو إسماعيل” أمينة هانم” اشترت قطعة أرض وعملت عليها فيلا صغيرة، ولكن بعد فترة قصيرة طلبت إنها تتحول لقصر، وأشرف على البناء المهندس الإيطالي”أنطونيو لاشيك” ودا كان أعظم المهندسين اللي في مصر وقتها وساب بصمة في أماكن كثيرة فيها، زي المبنى القديم لوزارة الخارجية اللي موجود في التحرير، وكمان المبنى الرئيسي لبنك مصر بوسط البلد، ومدرسة الناصرية ومحطة الرمل في الإسكندرية.

بالرغم من مساحة القصر الصغيرة، قدر “لاشيك” يستغل كل متر علشان يطلع بجمال فوق الجمال. القصر بعد موت “أمينة هانم” انتقل ملكيته لابنها محمد طاهر وسمى القصر على اسمه “قصر طاهر باشا”، في الوقت ده كان طاهر رياضي مشهور، وكان أول واحد يمسك رئاسة اللجنة الأولمبية.

 الحرب العالمية الثانية بدأت،  وأعلن طاهر باشا وقتها تأييده للألمان، ودا كان سبب إنه يتحط تحت الإقامة الجبرية من الإنجليز ويتسجن في سيناء، لحد ما أنتقل لفيلا بالزمالك يسكن فيها واضطر يبيع القصر واللي اشتراه وقتها خاله الملك فاروق بمبلغ 4000 جنيه وقدمه كهدية لزوجته وضم له كمان مساحة كبيرة  كانت حواليه، ولقبوه بقصر الطاهرة ودا كان لقب ملازم للملكة فريدة زوجة الملك فاروق، حصلت خلافات بعد كدا بين فاروق وزوجته وانفصلت عنه واخده منها مقابل أرض اخدتها في الشرقية.

تعالوا ندخل القصر

كل حاجة داخل القصر مميزة، بداية من سقفه اللي مصنوع من المرمر الأبيض واللي لما الشمس بتيجي عليه بيعكس الضوء كأنه قمر في ليلة الـ14، وسجاد من أنواع فاخرة من العالم على الأرض مايتقدرش بثمن، وكمان أطقم شمعدانات كتير وغالية وتحف آثرية كتير وقطع من الأثاث الغالي اللي موزعة جوة القصر بنظام وعدالة وكل اللي فات حكاية واللي جاي حكاية تانية وهي حكاية أجمل ترابيزة بلياردو في العالم وشهدت على كتير من الأحداث السياسية اللي غيرت تاريخ مصر.

 

إيه حكاية الترابيزة دي؟

الترابيزة دي كانت هدية من ملك فرنسا لويس فيليب لمحمد علي  وهي مصنوعة من خشب الأبنوس مطعم بالبرونز والعصيان من نفس خشب الأبنوس ومطعمة بالعاج ونقلها الملك فاروق من قصر محمد علي بشبرا لقصر الطاهرة.

طب إيه أهم الأحداث السياسية اللي مرت بالقصر؟.. أقام ولي عهد إيران “محمد رضا بهلوي” بقصر الطاهرة عام 1939 لما وصل مصر للزواج من الأميرة “فوزية” شقيقة الملك “فاروق”.

وفي أكتوبر 73 خطة حرب أكتوبر برئاسة الرئيس السادات وجميع الخرائط والتخطيط واللي هتلاقيه في الصور التاريخية كانت على الترابيزة دي.

كمان المكان أتصور جواه وفي حديقته المميزة العظيمة أفلام كتير زي فيلم الأيدي الناعمة.

الحكومة المصرية صادرته بعد انتهاء الحكم الملكي وحصل محاولة كتير من بنات فاروق لاسترداده، لحد ما طلعت الحكومة المصرية في 2015 قرار بأن القصر وجميع ملحقاته أثرا تاريخيًا.