The Definitive Guide to Living in the Capital , Cairo , Egypt

ميدان التحرير هو الأشهر في مصر، وشهرته وصلت للعالمية، وخلال الأيام دي بيشهد الميدان تطوير شامل ضمن خطة تطوير بتشهدها القاهرة الخديوية، وحاليًا بيتم استرجاع مكانته علشان يكون مزار أثري يليق بتاريخه، وبتشمل خطة التطوير تزيينه بمسلة فرعونية، وهيحيط بيها 4 تماثيل كباش من الأقصر، وده غير أعمال التشجير والتجميل للمحلات والعمارات والمباني اللي حواليه.

ميدان التحرير كان بينافس ميدان شارل ديجول في فرنسا، واتعمل خصيصًا في عهد الخديوي إسماعيل، وله مكانة تاريخية وقصص غريبة،  وبعد ثورتي 25 يناير و30 يونيو، رجع اسمه تاني يتردد بعد تهميش ونسيان لسنين، وفي السطور الجاية هنقولكم 5 معلومات مهمة عن ميدان التحرير.

1- ميدان التحرير في الماضي كان أقرب لمستنقع بسبب فيضان النيل، وبعد كدة استغله نابليون بونابرت في بناء معسكرات للعساكر، واتسمى وقتها “الثكنات الإنجليزية”.

2- تحول الميدان لمساحة خضراء مفتوحة بلغت 500 فدان في عصر محمد علي، وكان حوله قصور الملوك والأمراء.

3- ميدان التحرير شهد ثورات سياسية مختلفة، بدأت مع أحداث ثورة 1919 واللي اندلعت من ميدان التحرير، ومظاهرات 1935 و1946 ضد الاستعمار الإنجليزي، وفي 25 يناير 1952 كانت مظاهرات ضد الملك فاروق احتشدت في الميدان، وفي 25 يناير 2011 بدأت مظاهرات ضد الرئيس الراحل محمد حسني مبارك، وفي 30 يونيو شهد الميدان مظاهرات حاشدة وغير مسبوقة في تاريخ مصر ضد الرئيس الراحل المنتمي لجماعة الإخوان محمد مرسي.

4- كان بيتوسط ميدان التحرير نافورة مياه مميزة، كانت طفرة في وقتها على مستوى العالم، وكان الميدان مافيش حواليه عمارات كتير، وبالتالي كان مكشوف تمامًا من كل الاتجاهات.

5- ميدان التحرير كان اسمه زمان ميدان “الإسماعيلية” نسبة إلى الخديوي إسماعيل اللي أسسه على التراث الفرنسي.