The Definitive Guide to Living in the Capital , Cairo , Egypt

بالفيديو والصور.. جولة في متحف الفن الإسلامي
بواسطة
Cairo 360

في سبتمبر 2010 تم إعادة فتح متحف الفن الإسلامي بعد ما كان مغلق للتجديدات لمدة 8 سنين واتكلف حوالي 10 مليون دولار، والنتائج كانت مبهرة، والقاهرة كسبت متحف جديد في الشكل والمضمون. مشروع التجديد كان ضخم جدًا وإجتمع فيه معماريين مصريين وأجانب وفنانين ومتخصصين ترميم وتصميم متاحف. المشروع الهائل أخرج المتحف بشكل رائع من جوة وبرة، بقت زيارته تجربة فريدة ومن الصعب تلاقي زيها في القاهرة.

قبل ما نلقي نظرة على القطع الأثرية في المكان لفت نظرنا الديكور الداخلي والسقف والشبابيك العالية واللون الرمادي في أزرق للحوائط والأراضيات الرخامية اللامعة والإضاءة الجيدة، كل ده مخلي المتحف  مختلف عن متاحف كتير في القاهرة غالبًا ما بتكون إضاءتها مش كافية.

المتحف بيضم مجموعة من أروع وأهم الفنون والقطع الأثرية الإسلامية في العالم، تم تجميعها من الشرق الأوسط وبلاد تانية، من أيام الخلافة الأموية لحد الإمبراطورية العثمانية. مئات المعروضات المبهرة.

في الغرفة اللي بعد المدخل مباشرة فيه لوحات توضيحية مكتوب عليها معلومات عن كل عصر من عصور الخلافة الإسلامية: «الأموي» و«العباسي» و«الفاطمي» و«الأيوبي» و«المملوكي» و أخيراً «العثماني». كل لوحة عليها خريطة بتوضح توسعات الدولة وحدودها في شمال أفريقيا والشرق الأوسط ومعلومات عن أفراد العائلة الحاكمة ونسلهم وإنجازات الحكام وإسهاماتهم المعمارية والفنية، (ويذكر ان الكتابة بالإنجليزية ما كانش فيها أي غلطات إملائية أو نحوية، ودي مشكلة في متاحف كتير في مصر).

المتحف مقسوم جناحين، الجناح الشِمال فيه خامات من جميع أنحاء العالم الإسلامي: قطع نسيج، سجاد، شبابيك خشب، مشربيات، خزفيات وفي أدوات كانت بتستخدم في الجراحة و أزايز عطور صغيرة. الجناح ده متنظم زمنياً حسب قِدم وحداثة الحاجات وحسب خامات القطع المعروضة. كل قطعة أثرية مكتوب تحتها الخامة المصنوعة منها والفترة اللي إتعملت فيها في التاريخ الإسلامي. ومن أجمل المعروضات نافورة رخامية بترجع للقرن الـ 15 الميلادي لدولة المماليك ودي تم ترميمها مؤخراً عشان يبان ألوانها البراقة وتصميمها الفريد.

الجناح التاني على اليمين بيضم القطع الأكبر حجماً اللي متاخدة معظمها من آثار القاهرة القديمة.

ممكن تخرج من المتحف من آخر الناحية اليمين للمبنى وبعد بوابة الخروج فيه ساحة مفتوحة وفيها المبنى الإداري بتاع المتحف. وعلى فكرة المتحف مؤهل للزوار على كرسي متحرك.

عنوان المتحف: شارع بورسعيد، ميدان باب الخلق.

تليفون: 23901520

تقدروا تستمتعوا كمان بالفيديو ده، واللي بيجمع أهم مقتنيات المتحف. (اضغطوا هنا)

مقترح