The Definitive Guide to Living in the Capital , Cairo , Egypt

الصورة الرئيسية: Dilip Poddar

الصورة الداخلية: Abdullah Elhariry

 

مع اقتراب افتتاح المتحف المصري الكبير اللي طبقًا لتصريحات حكومية أنه قرب، وكمان تم فتحه جزئيًا، هتتوجه الأنظار للمتحف الجديد. لكن الحقيقة إن المتحف المصري الموجود في ميدان التحرير، هيظل قيمة كبيرة ومكان يستحق الزيارة والاهتمام، والمتحفين مع متحف الحضارة، بيعتبروا أعظم أماكن بتحوي كنوزنا المصرية القديمة.

في السطور الجاية هنقول لكم على كل اللي محتاجين تعرفوه عن المتحف المصري في التحرير علشان تزوروه بشكل مستمر، خصوصًا إن أبوابه هتفضل مفتوحة حتى مع افتتاح المتحف المصري الكبير.

 

المتحف المصري بالتحرير تأسس سنة 1835 وافتتح رسميًا عام 1902، وهو من أكبر وأشهر المتاحف العالمية، مبنى على الطراز الروماني، وهيستقبلكم المتحف بالنباتات البردية وزهرة اللوتس، وهتلقوا ملوك وكهنة في بداية الدخول، وتصاميم لأعمدة مصرية قديمة هترجعكم للعصر القديم اللي ممتد من 7000 سنة، وفيها أسرار العالم كله انبهر بيها.

وبيحتوي المتحف المصري على كنوز لا تقدر بثمن، وبترصد كل الأسر والعصور الفرعونية ويتكون من دورين، الأول موجود فيه الآثار الثقيلة زي التوابيت والتماثيل اللي معروضة بناءً على التسلسل التاريخي، والدور العلوي اللي فيه مجموعات أثرية مختلفة، أهمها أشهر مجموعة عالمية “توت عنخ آمون”، وكمان كنوز تانيس، ده غير قاعتين للمومياوات الملكية، وتعد صلاية الملك نعرمر وتمثال الملك خوفو وقناع الملك توت عنخ آمون من أهم مقتنيات المتحف المصري.

تقدروا تزوروا المتحف المصري في ميدان التحرير وتستمتعوا بأجمل الآثار وأقيمها، وتتصوروا كمان صور تبقى ذكرى دائمة وهو شغال يوميًا من الساعة 9 صباحًا، وتذكرة الدخول للمواطن المصري 30 جنيه، والطالب 15 جنيه، ودخول قاعة الموميات بـ40 جنيه للكبار و20 جنيه للطلبة، أما سعر التصوير الفوتوغرافي بالكاميرا بدون فلاش 20 جنيه، وتصوير الفيديو التذكاري 300 جنيه، والتصوير بالموبايل مجانًا.