The Definitive Guide to Living in the Capital , Cairo , Egypt

المتحف المصري ممكن يبقى أكبر متحف في القاهرة وبيضم أكبر مجموعة من القطع الأثرية القديمة، لكن لو هننظر من ناحية إظهار تاريخ مصر الغني، يبقى فيه كذا متحف تاني في البلد ممكن يسرقوا منه الأضواء. واحد من الأماكن المستخبية دي هو متحف «الجمعية الجغرافية المصرية» في جاردن سيتي.

متحف الجمعية الجغرافية المصرية أسسه الخديوي إسماعيل في سنة 1875 عشان يشجع فهم وإستكشاف الأقاليم المختلفة في مصر وأفريقيا. المتحف بيعرض خرائط، منشورات، وقطع أثرية أغلبها بيرجع للعصر الـ 18 ولغاية أوائل القرن الـ 20. ورغم أن أغلب القطع في المتحف بتشرح نفسها، بس ممكن برضه واحد من العاملين هناك يصاحبك في جولتك. بيبقى عندهم كم هايل جداً ومبهر من المعرفة بخصوص القطع اللي في الأربع قاعات اللي في المتحف.

الجولة في المتحف بتبدأ من قاعة الهوايات والتقاليد المصرية، ودي شاملة كل حاجة من أدوات التدخين ولغاية الألعاب. فيه علب عددها كبير ومليانة ملابس، مجوهرات، وتمائم، وفي قطع أثرية أكبر ومعقدة زي العربية اللي كانوا بينقلوا فيها العرايس، وعدة حلاق متنقل. القاعة الثانية هي ممر كبير فيه مجموعة مخلوطة من المنشورات الحديثة، تماثيل لناس لابسين ملابس فخمة تقليدية من أقاليم مختلفة في مصر، ومعروض كمان شنطة فيها أدوات كانت بـ تستخدم في القرن الـ 18.

القاعة الثالثة من أكتر الأماكن الساحرة في المتحف، مليانة قطع ترجع لبعثات الجمعية في الوقت ده. باب القاعة متزين بنابين عاج لفيل، وفي نص القاعة فيه صندوق كبيرة فيه تمساح! والحوائط بتاعة القاعة مليانة بدروع ورماح من قبائل في كل أنحاء أفريقيا.

قاعة قناة السويس لون حوائطها أزرق، وكانت مهداة للجمعية من شركة قناة السويس، وفيها خرائط وماكيتات لنقاط العمل في القناة. القاعة ممكن تبقى أفضل لو فيها معلومات مكتوبة أكتر، لكن ده لا يقلل من متعة الفرجة في المكان.

المكتبة اللي فوق وقاعة العرض اللي بـ تشتري تذاكر عشانها لوحدها مش ضمن المتحف فعلياً، لكن أكيد يستاهلوا شوية من وقتك عشان تتفرج عليهم. الحوائط العملاقة بتاعة قاعة العرض مرصوص عليها كلها كتب، بعضها يرجع تاريخها للقرن الـ 16. المكتبة فيها مجموعات متنوعة من الموسوعات، إحصائيات، وتعدادات للسكان من القرن الـ 20 في مصر ودول تانية. فوتوغرافية الطبيعة لصحاري مصر متعلقة علي ستاندات رسم، ومعروض كمان عدد من الخرائط القديمة.

 

زيارة تلف فيها المتحف كله هتاخد حوالي ساعة واحدة من وقتك ومش هتكلفك فلوس كتير، يعني متحف مناسب أنك تزوره لو عايز تبعد عن الزحمة وتشوف بديل مميز للمتحف المصري.