The Definitive Guide to Living in the Capital , Cairo , Egypt

لو نفسك تهرب من حر القاهرة وتأخد عيلتك في فسحة مختلفة ومليانة متعة ومعلومات، يبقى لازم تزور المتحف المصري بالتحرير. والنهارده مش هنتكلم عن الكنوز العظيمة اللي فيه، ولا التماثيل المبهرة اللي جواه، لكن هنتكلم عن مكان مش واخد حقه رغم إنه في نفس المكان.. متحف الليجو المخصص للأطفال!متحف صغير بس مليان مفاجآت، ومش بس بيحبب الصغيرين في تاريخ مصر القديمة، ده كمان بيخليهم يعيشوا مغامرة بين المعابد والمومياوات والملوك العظماء.. وكل ده من قطع الليجو الملونة!

رحلة ممتعة بين قاعات متحف الليجو

متحف الليجو متقسم لـ6 قاعات، وكل قاعة فيها قصة شيقة بتشد انتباه الأطفال:

القاعة الأولى: العالم الآخر
تعرف الطفل على فكرة الحياة بعد الموت عند المصري القديم. بيشوفوا نماذج لتحنيط المومياوات، وأدوات كانت بتتحط في المقابر، وكمان قناع توت عنخ آمون متصمم بالكامل من الليجو.

القاعة الثانية: الحرف والصناعات
من النجارة للزراعة لصناعة الطعام.. الأطفال هيتعرفوا على حياة المصري القديم، وكمان يشوفوا نماذج للحلي وأدوات التجميل والألعاب، وحتى الآلات الموسيقية القديمة.

القاعة الثالثة: أبو الهول والأهرامات
نموذج ضخم من الليجو لتمثال أبو الهول مع خلفية للأهرامات، بتعرف الطفل على تطور الحضارة المصرية بشكل مبسط وممتع.

القاعة الرابعة: الكتابة
إزاي الكتابة غيرت مجرى التاريخ؟ القاعة دي بتشرح الفرق بين ما قبل وما بعد معرفة الكتابة، وإزاي المصري القديم سجل تاريخه.

القاعة الخامسة: ملوك مصر العظام
نموذج للملوك العظماء زي رمسيس الثاني وحتشبسوت وتوت عنخ آمون.. وكلها معمولة من الليجو بشكل مبهر.

القاعة السادسة: المعبودات والآلهة
نموذج للآلهة المصرية القديمة، زي إيزيس وأوزوريس وآمون، وبعضها على شكل طيور وحيوانات، بتعرف الأطفال على المعتقدات الدينية القديمة.

طيب مين عمل نماذج الليجو دي؟

متحف الطفل تم افتتاحه سنة 2010 في حفل خاص حضره صاحب السمو الملكي أمير الدنمارك هنريك، والدكتور زاهي حواس الأمين العام السابق للمجلس الأعلى للآثار، والدكتورة وفاء الصديق المديرة السابقة للمتحف المصري بالتحرير. 

نماذج قطع LEGO أهدتها للمتحف سفارة الدنمارك. لكن كمان المتحف بيضم نماذج تعليمية أنتجتها وحدة الإنتاج التابعة لوزارة السياحة والآثار المصرية.

المتحف جزءًا من بدروم المتحف المصري بالتحرير، وبيضم زي ما قولنا ست قاعات للعرض ركزت على الكتابة، الدين، بناء الأهرامات، والموت والحياة الأخرى. وبيضم كمان نماذج لتوت عنخ آمون ورمسيس الثاني وأبو الهول.

مش بس فرجة.. متعة ولعب وتعليم!

المتحف بيقدم فعاليات وورش مجانية للأطفال لتعليمهم إزاي يبنوا نماذجهم الخاصة بالليجو، وكمان بيهتم جدًا بالأطفال ذوي الهمم وخاصة فاقدي البصر، وبيوفر لهم تجربة حسية ممتعة عشان يتعرفوا على الحضارة المصرية.

لو عاوز خروجة مختلفة ومليانة متعة ومعلومات لأولادك، ماتفوتش متحف الليجو جوه المتحف المصري بالتحرير. فسحة هتخلي ولادك يحبوا المتاحف، ويتعلقوا بتاريخ بلدهم بشكل مش هيقدرهولهم أي كتاب.

التذكرة بـ30 جنيه للكبار، و10 جنيه للصغيرين، وتقدر توصل للمتحف عن طريق أي مواصلة رايحة ميدان التحرير. المتحف مفتوح يوميًا من 9 الصبح لـ12 الظهر، ومتحف الليجو دخوله مجاني مع نفس التذكرة!