The Definitive Guide to Living in the Capital , Cairo , Egypt

مصر دولة مدهشة، مهما كنت متصور إنك عارف كل تفاصيلها، هتكتشف كل يوم إنه لسة فيها جديد.. يعني هل تعرف مثلًا إن بلدنا فيها متحف اسمه “النيل” بيوثق تاريخ نهر النيل ورحلته عبر 11 دولة أفريقية؟ مش بس كده، ده المتحف بيعرض كمان بأسلوب عرض مبهر الجوانب الثقافية لجميع دول القارة السمراء.

تعالوا نتعرف أكتر على متحف النيل من خلال 8 معلومات فيهم الخلاصة:

1 – متحف النيل موجود بالقرب من خزان أسوان في مدينة أسوان الساحرة بجنوب مصر، وهو على مساحة بتزيد عن 2000 متر مربع، وافتتح في أوائل سنة 2016، وبيقع في قلب المركز الثقافي الأفريقي بأسوان التابع لوزارة الموارد المائية والري المصرية.

2 – المركز بأكمله كان اسمه متحف النيل، لكن تم تغيير الاسم إلى المركز الثقافي الأفريقي في مارس العام 2019 بعد إعلان أسوان عاصمة الشباب الأفريقي وإقامة ملتقى الشباب العربي الأفريقي بها، وده بحسب تصريح لمدير عام المتحف المهندسة إيرين فايز مع وكالة أنباء شينخوا الصينية.

3 – بيتكون مبنى المتحف بشكل رئيسي من دورين، الأول بيضم قاعات بتحكي تاريخ نهر النيل والمشاريع اللي نفذتها مصر في أسوان لاحتواء فيضانه، ومنها بناء خزان أسوان والسد العالي.

4 – المتحف فيه كمان غرفة بتحتوي على ماكيت لمبنى المتحف بأكمله، بالإضافة لقاعة حابي اللي اسمها على اسم إله النيل عند المصريين القدماء، وبتتزين القاعة بـ 6 تماثيل للإله حابي.

5 – بيحتوي المتحف كمان على قاعة اسمها دول حوض النيل، معروفة باسم قاعة “الباثيو”، ودي بيغلب عليها أجواء الغابات الأفريقية مع المؤثرات الصوتية للمياه الجارية والحيوانات البرية، وبتتوسط القاعة نافورة بتمثل نهر النيل، ويحيط بيها 11 عمود بيحمل كل منها علم دولة بيمر بها النهر، وسط النباتات الطويلة ونماذج لحيوانات برية زي التمساح والفيل.

6 – فيه كمان في المتحف فاعة فيها نماذج مصغرة وخرائط لخزان أسوان والسد العالي، وقاعة تانية بتعرض خريطة حوض النيل والمشاريع المتعلقة بالنيل في مصر وبتستعرض تاريخ وزراء الري المصريين لحد النهارده.

7 – أما الطابق الثاني، فبيتميز بالأجواء الثقافية الأفريقية وهتلاقوا فيه معلومات عن كل البلاد الأفريقية مقسمة إلى 5 مناطق: شمال وجنوب وشرق وغرب ووسط أفريقيا.

8 – المتحف فيه كمان قاعة تفاعلية مخصصة للأطفال، بتعرض أفلام رسوم متحركة أبطالها التمساح وفرس النهر، واللي بيحكوا عن نهر النيل وأهمية الحفاظ على مياهه وحمايته من التلوث.

 

عنوان المتحف: جنوب أسوان.