The Definitive Guide to Living in the Capital , Cairo , Egypt

في قلب القاهرة الفاطمية، وتحديدًا في تكية محمد بك أبو الدهب اللي موجودة بالقرب من الجامع الأزهر وأمام وكالة الغوري هنلاقي المكان الأثري ده اللي هو تحفة معمارية بيرجع تاريخ تأسيسها لسنة 1774، تم اختيارها سنة 2019 علشان تكون متحف الأديب العالمي نجيب محفوظ الحائز على جائزة نوبل في الأدب سنة 1988، وتم اختيار تكية أبو الدهب التحديد لأنه قريب من منزله اللي أتولد واتربى فيه بحي الجمالية، وكمان لأن المنطقة عمومًا كانت مصدر إلهام الأديب العالمي وكتب كتير من رواياته فيه.

جولة رجل الساعة

من شدة انضباط نجيب محفوظ في الوقت كان يطلق عليه “رجل الساعة”، وكان يومه وروتينه معروف وسهل ويختار ويدقق مواعيده ليكون محافظًا عليها، وداخل المتحف هنعرف قصة حياة الأديب العالمي بداية من نشأته وحياته الشخصية، مرورًا بمشواره الأدبي، ووصولًا للجوائز اللي حصل عليها محليًا وعالميًا، وعلى رأسها جائزة نوبل في الآداب، ويأتي تأسيس المتحف علشان يخلد اسمه اللي رفع اسم مصر في المحافل الدولية، وبيضم مقتنياته الأدبية والشخصية وجوائزه وكلها مهداة من أسرته ومحبينه.

تفاصيل المتحف

فور دخول تكية أبو الدهب ستجدوا أن هناك طابقين لمتحف نجيب محفوظ، الطابق الأرضي وفيه قاعات الندوات والمؤتمرات وبيتعمل فيه معارض فنية وحفلات توقيع كتب وكمان فيه مكتبة عامة، وسمعية بصرية، ومكتبة نقدية هتلقوا فيها أهم الأبحاث والدراسات عن أعمال الروائي الكبير نجيب محفوظ، ده غير مكتبة لمؤلفاته بالعربي، ومكتبة تانية لمؤلفاته المترجمة للغات كتير واللي السفارات الأجنبية بتهدي جزء منها للمتحف.

أما الطابق العلوي فهو عبارة عن رحلة مليئة بالطاقة الايجابية من خلال الغوص في حياة نجيب محفوظ، وهو عبارة عن غرف مختلفة وكل غرفة بيكون لها اسم بيميزها، وهتلقوا في الدور العلوي قاعة بتوضح علاقة نجيب محفوظ بالحارة المصرية وقوة إلهامها له في أعماله، وقاعة فيها بيتعرض فيلم تسجيلي عن نجيب محفوظ وسر علاقته بالحارة بداية من نشأته في حي الجمالية وتجسيده لملامح الشخصية المصرية والأماكن اللي بيتغطي عليها الروح المصرية البسيطة الطيبة.

كمان فيه قاعة بتعرض آراء النقاد لكتابات نجيب محفوظ، وقاعة فيها أهم مقتنياته الشخصية زي بدلته وقبعته وحذاءه والبايب وعدة الحلاقة وبطاقته الانتخابية وصوره المميزة مع المشاهير العالميين والمحليين، وكمان هتلقوا أكثر من غرفة مخصصين كقاعات لعرض الأوسمة والشهادات والنياشين اللي حصل عليها

ومن ضمن القاعات المميزة هتلقوا مواد فيليمة لحوارات الأديب العالمي نجيب محفوظ مع الكاتب جمال الغيطاني في حلقات “تجليات مصرية” واللي فيها بيوضح فلسفته ورؤيته.

ومن أجمل القاعات اللي موجودة هتلاقوا جواها مكتب نجيب محفوظ ومجموعة من مكتبه القيمة والمميزة، وجنبها القاعة الأبرز والأقيم اللي فيها شهادة جائزة نوبل في الأدب وصورة طبق الأصل من الميدالية اللي بتحتفظ بيها أسرته، وكمان ممكن تقروا الخطبة اللي ألقاها وقت تسلم الجائزة، ده غير مجموعة من المقتنيات الخاصة زي كراسته اللي كان بيكتب فيها بعد محاولة اغتياله وملف عمله في وزارة الثقافة وغيرها.

المتحف، رغم مساحته المحدودة، بيحتوي على مجموعة ضخمة من المقتنيات الأدبية والشخصية اللي هتعرّفكم كل تفصيلة عن حياة الأديب العالمي. وكمان هتلاقوا مرشد متخصص مستعد يشرح لكم كل كبيرة وصغيرة.

الوصول للمتحف

خلنا نقولكم بلاش تروحوا بسيارتكم الخاصة لأن للأسف الركنة هناك صعبة جدًا وكمان استغلال وممكن توصل الساعة لحد 100 جنيه، أو تركنوها في جراج الأزهر وبعدها تتمشوا للمتحف، والأسهل أنكم تطلبوا سيارة من أحد تطبيقات النقل أو من خلال التاكسي لمنطقة الغورية “متحف نجيب محفوظ”، أو من خلال عربيات من أمام مترو العتبة واللي بتكون رايحة الحسين والغورية.

مواعيد الزيارة بتكون يوميًا ما عدا الثلاثاء من 9 صباحًا حتى 5 عصرًا، وحاليًا بدأت الزيارات الليلية يومي السبت والأحد وبتكون من الساعة 6 حتى 10 مساءً، وسعر تذكرة الدخول 5 جنيهات.

تقدروا تعرفوا أكتر عن المتحف من خلال صفحة الفيسبوك من هنا.