مغامرة في قلب صحراء القاهرة.. محمية “قبة الحسنة” هترجعك 100 مليون سنة لورا!
أماكن تستحق الزيارة الخروجات غير التقليدية العصر الطباشيري جيولوجيا مصر حفريات مصر سياحة بيئية قبة الحسنة متحف مفتوح محمية طبيعية مغامرات في القاهرة
Cairo 360
المعلومات: موقع الهيئة العامة للاستعلامات
لو قلنالك إن فيه مكان قريب من القاهرة هتحس جواه إنك دخلت آلة الزمن، وبتتفرج على كوكب الأرض وقت ما كانت الديناصورات لسه عايشة.. هتصدق؟
المكان ده موجود فعلًا، وبيحمل أسرار عمرها ملايين السنين، وكل ده على بُعد خطوات من العاصمة المصرية!
فين المكان العجيب ده؟
محمية قبة الحسنة، في منطقة أبو رواش على طريق القاهرة – إسكندرية الصحراوي، وبالتحديد على بعد حوالي 8 كم بس من أهرامات الجيزة! المحمية مساحتها صغيرة نسبيًا (حوالي 1 كم مربع)، لكنها كنز طبيعي وتاريخي بكل معنى الكلمة، وأقصى ارتفاع فيها بيوصل لـ149 متر.
مكان هيرجعك للعصر الطباشيري
عارف يعني إيه “قبة الحسنة”؟ يعني أول وأوضح مكان حوالين القاهرة بتشوف فيه بعينك صخور من العصر الطباشيري العلوي! وده عصر بيرجع لـ100 مليون سنة فاتوا! يعني أنت حرفيًا واقف على أرض أقدم من أهرامات الجيزة بكتير!
حواليك كمان صخور من عصور تانية زي:
العصر الحجري (من حوالي 60 مليون سنة)
العصر الصخري (من حوالي 40 مليون سنة)
حفريات شكلها كأنها طالعة من متحف
اللي بيميز المحمية فعلًا هو إنها شبه متحف جيولوجي مفتوح، الحفريات هناك متجمعة في مستعمرات ومحفوظة بشكل نادر!
أشهرها حفريات المرجانيات، واللي بتدلنا بدقة على شكل الحياة والبيئة والمناخ في الزمن ده.
نبتة نادرة مش هتشوفها في أي مكان تاني في شمال مصر!
لو بتدور على الحاجات النادرة، يبقى لازم تشوف نبات اسمه “سلولاباكوا”، وده نبات شجيري قزمي نادر، مش بيزيد طوله عن 30 سم، لكنه مفيد جدًا كمصدر غذاء للحيوانات الرعوية، وبيعيش بس في قبة الحسنة.
ليه لازم تزور محمية قبة الحسنة؟
لأنها تجربة مختلفة عن أي خروجة تانية.. هتحس إنك في فيلم وثائقي! والمغامرة مناسبة للرحلات العلمية، أو حتى خروجة لمكان مختلف مع أصحابك، ده غير إن المحمية فيها مناظر طبيعية تخطف القلب وعدسة الكاميرا.
مقترح
معالم وسياحة
مغامرة في قلب صحراء القاهرة.. محمية "قبة الحسنة" هترجعك 100 مليون سنة لورا!
أماكن تستحق الزيارة الخروجات غير التقليدية +8
الحياة في كايرو
