The Definitive Guide to Living in the Capital , Cairo , Egypt

الفترة دي القاهرة بتمر بمرحلة من أهم مراحل تاريخها من حيث التطوير والتجديد والاهتمام بالأماكن المهمة اللي فيها.. وخلال الفترة الجاية، الحكومة المصرية هتقوم بتطوير مجموعة من المناطق المهمة في القاهرة التاريخية.. تعالوا نعرف الأماكن دي وأبرز ملامح التطوير.

منطقة باب زويلة

بحسب تقرير حديث نشره موقع اليوم السابع، هيتم تطوير منطقة باب زويلة اللي بتضم العديد من المباني التاريخية المهمة، زي: “مسجد الصالح طلائع، وسبيل محمد علي، وتكية الكلشني، وبيت الشيخ القاياتي، ومسجد إينال اليوسفي، ومسجد الكردي، وبيت الشبشيري، ومدرسة القربية، وزاوية فرج بن برقوق، وربع الدهيشة”.

 منطقة الحاكم

هيتم كمان تطوير منطقة الحاكم واللي بتتضمن مجموعة من المباني التاريخية، ومنها: “وكالة كحلا، ووكالة قايتباي، وباب وكالة قيسون، وباب النصر، وباب الفتوح”.

تطوير منطقة الحسين

مصر هتقوم كمان بإعادة تأهيل وترميم للمنطقة السكنية حول مسجد الحسين، وهيتم عمل مشروع خان الحسين للحرف اليدوية، وفندق 4 نجوم، ومنطقة بازارات، ومطاعم، ومنطقة مدرسة حرفية للتعليم والتدريب على الحرف اليدوية، بالإضافة لفندق المسافر خانة

 منطقة درب اللبانة

هيتم كمان تأهيل وإحياء منطقة “درب اللبانة”، من حيث إعادة استخدام بعض المباني علشان تكون مزارات سياحية وفنية ودينية، وهيتم إنشاء مركز لعرض الأفلام الوثائقية ومناطق خدمات.

منطقة الحطابة

الحكومة المصرية هتطور كمان منطقة الحطابة واللي بتشمل عدد من مباني العصرين المملوكي والعثماني، بالإضافة لمباني تاريخية ودينية مميزة، وحوالي 67 ورشة حرفية أغلبها يدوية.

منطقة سوق السلاح

من المناطق اللي هيتم تطويرها كمان، منطقة “سوق السلاح”، اللي هيتعمل فيها طريق لعرض جميع الفصول التاريخية اللي مرت على القاهرة التاريخية بداية من العصر الفاطمي المتمثل فى المقامات القديمة ولحد العصر الحديث، مرورًا بالعصر المملوكي والعثماني.

أسوار القاهرة

هيتم كمان تطوير السور الشمالي للقاهرة من “باب الفتوح” ولحد “باب النصر”.