The Definitive Guide to Living in the Capital , Cairo , Egypt

المتاحف العلمية من المزارات المهمة في مصر، وبننصح كل أب وأم يروحوا مع أولادهم في رحلة لمتحف علمي من المتاحف الموجودة في القاهرة. والمتحف الجيولوجي المصري واحد من أفضل الأماكن اللي بتقدم علم الجيولوجيا للكبار والصغار بطريقة سهلة وبسيطة. تعالوا نتعرف أكثر على واحد من أهم المتاحف العلمية في الشرق الأوسط.

المتحف الجيولوجي متحف علمي مهم في القاهرة، تم تأسيسه سنة 1901، وكان تابع لهيئة المساحة الجيولوجية واللي حاليًا اسمها “هيئة الثروة المعدنية”، وأول من تولى أمانة المتحف كان تشارلز وليم أندروز حتى عام 1904، ومن بعده تولى هنري أوربورن لمدة سنتين، أما أول مصري شغل منصب أمين عام للمتحف فهو الدكتور حسن صادق.

المتحف كان موجود في منطقة زهراء المعادي ولكن بسبب مترو الأنفاق تم هدمه سنة 1982 ونقله لمكانه الحالي في منطقة مصر القديمة، وبالتحديد في زهراء مصر القديمة، وهو الأول من نوعه في الشرق الأوسط وأفريقيا، والمبنى كان مبني على الطراز اليوناني والروماني، وبيضم حفريات حيوانات فقارية وثديية اتجمعت سنة 1898 من محافظة الفيوم، وفيه مختبرات متخصصة للدراسات، وكمان هتلاقوا فيه مجسمات حفريات فقارية نادرة لتسهيل الدراسة عليها والحفاظ على العينات الأصلية.

كمان المتحف الجيولوجي فيه مكتبة تاريخية بتضم مراجع وكتب من سنة 1778 وهي متاحة للجمهور، وفيه صالات لعرض المعادن والصخور، والأحجار الكريمة والكهرمان والصدف مشغول، وكمان هتلاقوا جواه في العرض ياقوت وسافير طبيعي وصناعي، ومجموعة من الحفريات الفقارية، ده غير هيكل عظمي لحوت مكتمل، وعظام متحجرة، والمفاجأة أن المتحف فيه نيزك من المريخ وقع بالقرب من محافظة البحيرة سنة 1908، وهو واحد من 33 نيزك معترف بيهم رسميًا في العالم أنهم من المريخ.

تقدروا تعرفوا أكتر عن المتحف من هنا.

العنوان: كورنيش النيل – أثر النبي – مصر القديمة.