Mostafa Fathi Abdelfadil
لسنوات طويلة كانت فكرة كتير مننا عن السعودية إنها دولة خالية من أماكن الترفيه والاستمتاع، جامدة، صعب ننبسط فيها.. لكن الحقيقة إن الفكرة دي كان فيها ظلم كبير لدولة مليانة أماكن تاريخية وأثرية وثقافية مهمة جدًا.
مؤخرًا السعودية اتغيرت تمامًا، وأصبحت دولة مدركة أهمية السياحة، وبتشتغل بمجهود كبير على بناء مشاريع مهمة تخلي السائح يستمتع ويلاقي كل اللي نفسه فيه، والجميل إن ده بيحصل في نفس الوقت اللي البلد محافظة فيه على ثقافتها وعاداتها وتقاليدها الجميلة، وده هيخليكم تستمتعوا ببلد سياحي على أعلى مستوى، وفي نفس الوقت هتكتشفوا هوية خاصة مليانة بالتفاصيل المدهشة.
فريق كايرو 360 سافر مؤخرًا الرياض.. علشان نشوف بنفسنا إيه اللي بيحصل في مهرجان الرياض اللي كل العالم بيتكلم عنه، والحقيقة إن تجربتنا كانت إيجابية، ممتعة، وغنية جدًا.
بننصح كل الناس تضع السعودية ضمن خريطة الأماكن المهمة اللي لازم يزوروها.. وفي السطور الجاية هنعرفكم على بعض الأماكن الرائعة اللي لازم تزوروها وأنتم في الرياض.
حي الملز
الملز هو حي تابع لبلدية الملز بمدينة الرياض وسط السعودية. والحي ده موجود وسط المدينة، وبيعتبر من أقدم أحياء مدينة الرياض النموذجية، ده غير إنه بيعتبر المركز الحكومي، علشان بتتجمع فيه الوزارات الحكومية.
في حي الملز هتلاقوا حديقة الملك عبد الله بن عبد العزيز، ودي واحدة من أجمل الحدائق في السعودية، معرفوة بإن اسمها هو منتزه الملك عبدالله.
بتبلغ مساحة المنتزه حوالي 318000 متر مربع، وهتلاقوا فيها كتير من الأنشطة الترفيهية والتعليمية، ده غير الاحتفالات الجميلة، اللي بتحييها فرق من كل العالم.
الهدف من الحديقة دي هو توفير موقع متميز في قلب مدينة الرياض يوفر لسكان المنطقة وللسياح تجربة خروج مميزة، ماتتنسيش بسهولة، والحديقة فيها مسطحات مائية فيها نوافير جمالية ومسطحات خضراء، ده غير مناطق لعب الأطفال وواحة العلوم، وكمان ساحة المناسبات للعروض والمهرجانات.
عجبنا جدًا في الحديقة ربط كل الأنشطة بممرات مشاة روعي فيها ذوي الاحتياجات الخاصة، ودي حاجة لاحظناها في أغلب المناطق في الرياض، وده شيء أسعدنا جدًا.
وينتر وندر لاند
دي من الأماكن الجميلة والجديدة في الرياض، والحقيقة إن السعودية أثبتت من خلال المدينة دي إنها قادرة على تحقيق المستحيل، لإن المكان تم بنائه باحترافية شديدة جدًا في وقت قياسي.
المكان أقرب لمدينة ملاهي عالمية ضخمة مليانة ألعاب وأنشطة مدهشة، ومساحتها 200 ألف متر مربع.
هتلاقوا في وينتر وندر لاند حلبة التزلج، اللي بتعتبر أكبر حلبة تزلج في الشرق الأوسط بعروض حية للمتزلجين والموهوبين في التزلج على الجليد، ده غير معرض عجائب العالم اللي بيضم مجسمات ضخمة مشيدة بقطع من الليجو، ويقدر الزائر أنه يشارك في بناء المجسمات دي بنفسه.
وفي كمان فندق الهروب اللي هتلاقوا فيه داخل غرفة الهروب ألغاز ووقت محدد لفك الرموز والشفرات، فيه كمان كرنفال الرعب اللي بيضم خيمة الرعب، والسيرك المرعب، أما اللي عندهم مهارات كروية، فممكن يشاركوا في فوت بارك.
وموجود كمان معرض ريال مدريد اللي هتشوفوا من خلاله ملعب ريال مدريد برنابيو الافتراضي، وتقدروا تشوفوا جوائز النادي اللي حصل عليها عبر تاريخه.
وعجبنا جدًا هناك مارفل إكسبرينس السعودية، ودي حاجة هتعجب كل اللي نفسه يكون واحد من الرجال الخارقين مثل الرجل الحديدي أو كابتن أمريكا وغيرهم.
منطقة البوليفارد
ودي منطقة لكل عشاق المطاعم المميزة، وهناك تقدروا تجربوا تستمتعوا بأكبر نافورة راقصة في العالم، وتستمتعوا في نفس الوقت بأجمل الأكلات السعودية والعالمية.
بيعتبر مشروع بوليفارد الرياض أقرب لمجمع تجاري مفتوح في الهواء الطلق بمساحة 20 ألف متر مربع، وبيضم المشروع مساحات تجارية خارجية مخصصة للمطاعم والمقاهي العالمية بإطلالة على حدائق ومسطحات مائية مصممة بشكل فني أنيق ومزودة بخدمة صف السيارات و خدمة كبار الشخصيات.
كمان بيضم المشروع كتير من خصائص الحياة العصرية، زي تخصيص رصيف طولي للمشي بطول 500 متر؛ بالإضافة إلى نادي صحي ومكاتب تجارية فاخرة.
وادي نمار
ده بقى من أجمل الأماكن في الرياض، اللي هتناسب عشاق المغامرات والتحديات، وده عبارة عن منطقة مفتوحة في الهواء الطلق فيها أنشطة كتيرة جدًا مناسبة للكبار والصغار، هتستمعوا هناك بجو السعودية الجميل، وهتلعبوا وتنبسطوا، وتدخلوا تحديات كتيرة جدًا.
هيعيش الزائر في وادي نمار متعة كبيرة مع مساحات جمالية، وبحيرة صناعية، وكورنيـش خـاص. كمان يقدر يتسلق الجبال، ويمارس التزحلق، إلى جانب عــروض موسيقية حية ورياضات مائية ومطاعم متنوعة.
مطعم القرية النجدية
وماتنسوش تروحوا القرية النجدية، وده مطعم تاريخي من أجمل المطاعم في الرياض اللي هترجعكم بآلة الزمن للماضي، وهتخليكم تجربوا أجمل الأكلات السعودية التقليدية.
وأخيرًا..
اللي فات ده مجرد نماذج قليلة جدًا من اللي هتكتشفوه في الرياض.. روحوا بنفسكم واستمتعوا بأحلى موسم في عالمنا العربي.
الحقيقة تجربتنا في موسم الرياض كانت مبهرة، ومهم نتكلم عن تحضر وأخلاق الشعب السعودي العالية، اللي خلتنا حاسين بالسعادة والراحة النفسية.
حقيقي موسم الرياض تجربة مهمة، لازم كل عشاق السياحة والسفر يخوضوها.. السعودية الجديدة مبهرة فعلًا!
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
