The Definitive Guide to Living in the Capital , Cairo , Egypt

في سلسلة نورت مصر اللي بنسعى ليها أننا نسلط الضوء على الأماكن المميزة في القاهرة واللي ممكن كتير من المصريين المغتربين ونازلين إجازة مايعرفوهاش أو العرب اللي القاهرة بتكون وجهتهم خلال فصل الصيف والخريف النهاردة قررنا نسلط الضوء على منطقة “الزمالك” وهي منطقة غنية بكل حاجة حلوة ومميزة، مش مجرد كافيهات ومطاعم شيك ومحلات غالية، لأ خالص لأن جزيرة الزمالك فيها أسرار وكنوز كتير هتبعدكم عن الزحمة والضوضاء، وعلشان كده قررنا نطلع لكم من قلبها أماكن هتحبوها من قلبكم وهتكتشفوا أسرار الزمالك زمان ودلوقتي.

 نزهة عبر الزمن    

خلينا نبدأ الحكاية بقصر الأمير عمرو إبراهيم أو كما هو معروف عنه باسم “متحف الخزف الإسلامي”، شيد القصر عام 1921 ميلادية عن طريق حفيد محمد علي باشا، وعناصره المعمارية مستوحاة من الطراز المغربي والتركي والأندلسي مع تأثر خاص بالطراز الأوروبي الكلاسيكي، وتم تصميم القصر عن طريق المهندس المعماري الأرماني جارو بليان وهو كان مسئول عن بناء القصور الملكية العثامنية.

القصر ده تحفة فنية معمارية هتنبهروا بيه بمجرد ما تدخلوا، ويطلق عليه متحف السيراميك الإسلامي، ولكن بعيدًا عن المتحف ومحتوياته المميزة اللي بتنتمي للعصور الإسلامية المختلفة هتلقوا تفاصيل القصر الأصلية اللي بتجمع بين أكثر من طراز عالمي ومصري هتحسوا أنكم رجعتوا لعصر ألف ليلة وليلة، ولازم تركزوا مع أشکال المقرنصات والعقود والقباب والنوافذ وزخارف الأرابيسك والأطباق النجمية وبلاطات القيشاني، والکتابات العربية الموجودة بکثرة على جدران القصر من الداخل والخارج.

سعر تذكرة الدخول 20 جنيه  للمصريين و370 جنيه للعرب، وتقدروا تزوروه في 1 الشيخ المرصفي، عمر الخيام، الزمالك، وهو مفتوح يوميًا من 9 صباحًا حتى 4 مساءً ما عدا الجمعة إجازة.

عائشة فهمي

القصر ورثته الأميرة عائشة فهمي ابنة على باشا فهمي كبير ياوران الملك فؤاد الأول من أخيها بعد تخارج باقي أخواتها، وتم تشييده عام 1907 على يد المهندس الإيطالي أنطونيو لاشاك، وهو مقام على مساحة 2700 متر ويتكون من بهوين وبدروم وسطح، والقصر ده له حكايات وقصص غريبة بداية من مقتل علي علي باشا بعد مشكلة بينهم بعد شهور قليلة من الزواج، وكمان القصر شهد 3 زيجات للأميرة ولم تنجب نهائي وهو ما جعل البعض يطلق على القصر “الملعون”.

يتكون قصر عائشة فهمي من طابقين وبدروم وبهو وحديقة واسعة تطل على النيل، ويتميز بطراز معماري فريد، وتضم حجراته زخارف بديعة على الجدران والأسقف، كما أن الممرات والسلالم لها رونق خاص بزخارف وديكورات متميزة، وهو حاليًا أصبح معرض فني مميز والقصر ما زال يحتفظ برونقه وتاريخه وتصميمه ومفتوح للزيارة مجانًا يوميًا من الساعة 9 صباحًا حتى 2 مساءً ما عدا الجمعة من الساعة 5 حتى 9 مساءً، وهو موجود في 1 شارع عزيز أباظة – أمام فندق ماريوت – الزمالك.

برج القاهرة

منه هتشوفوا القاهرة كلها بنيلها وأهراماتها وتاريخها الفاطمي والخديوي، تم بناءه بين عامي 1956 و1961 ميلادية، باستخدام الخرسانة المسلحة، وتم تصميمه من قبل المهندس نعوم شبيب على شكل زهرة اللوتس الفرعونية المصرية ويصل ارتفاعه إلى 187 متر وهو أعلى من الهرم الأكبر بالجيزة بحوالي 43 متر، وبيتكون من 16 دور، ويستند البرج على قاعدة من أحجار الجرانيت الأسواني اللي استخدمها قدماء المصريين في تشييد المعابد والمقابر، وهتلقوا داخل البرج لوحة جدارية من الفسيفساء بتجسد معالم شهيرة من مختلف دول العالم، وفي نهايته المطعم الدوار اللي بيتيح للزوار الاستمتاع بمشهد بانورامي لمدة ساعة لأنه بيدور بزاوية 360 درجة، وفي نهاية البرج وتحديدًا بسطحه يوجد تليسكوبات لمشاهدة معالم القاهرة العظيمة.

وخلال زيارتكم للبرج متنسوش زيارة شجرة الزمالك التاريخية والتصوير جنبها وهي من الأشجار المعمرة وعمرها 155 سنة، ويعمل البرج يوميًا من الساعة 9 صباحًا حتى 12 منتصف الليل، وتذكرة الزيارة 70 جنيه الأيام العادية و100 جنيه للويك إند والعطلات الرسمية للمصريين و250 جنيه للعرب والأجانب، وسعر المنظار المحمول 50 جنيه، والمشاهدة من التليسكوب 10 جنيه، وهو موجود في 1 شارع البرج – الجزيرة – الزمالك.

حديقة الأسماك

حديقة قديمة وتاريخية، تصميمها فريد على شكل كهوف بتشبه حوت تأسست سنة 1867 بأمر من الخديوي إسماعيل، وهتلقوا جوا الحديقة مغارات مائية وممرات ضيقة للتمشية فيها في تجربة شيقة وفريدة، وتشتهر كمان بأشجار ونباتات نادرة مازالت موجودة جواها.

حديقة الأسماك موجودة في شارع الجبلاية بجوار كوبري أبو الفدا، ومواعيد الزيارة من 9 صباحًا حتى 4:30 عصرًا، وسعر تذكرة 5 جنيهات.

روح الزمالك الثقافية

مكتبة القاهرة الكبرى

الحقيقة ان الزمالك دايمًا بتخلينا محتارين لأنها دايما في كل مكان بتجمع مكان واحد في اتنين وده اللي موجود في مكتبة القاهرة الكبرى اللي ممكن نتكلم عنها كمكان ثقافي أو كقصر أثري لأن المكتبة موجودة داخل قصر الأميرة سميحة كامل واللي اشترت القصر سنة 1942 وعاشت فيه حتى 1984 واتحول لمكتبة سنة 1995، وخلال جولتكم بالقصر هتستمتعوا بتفاصيل مبهرة ومميزة في كل ركن من أركان القصر وكمان هتستمتعوا بأكثر من 750 ألف كتاب متنوع في المكتبة الرئيسية بالبدروم وهتحسوا أنكم بتغوصوا في عالم القراءة والثقافة.

وفي الدور الثاني هتلقوا الأقسام المتخصصة والدوريات اللي بتضم الصحف المصرية المختلفة وكتب عربي وانجليزي لدوريات وقسم للمقتبس وقسم للمورد، وقاعة للفنون الجميلة بكل أقسامها وفنونها وقاعة مركز أبحاث مصر والقاهرة مخصصة لكل باحث ومطلع ودارس.

أما الدور الثالث فهو مخصص للعلوم بكل أنواعها بداية من الأعشاب حتى الفضاء والتكنولوجيا والطب ومتاح فيها كتب علمية عربي وانجليزي.

ومتنسوش تقفوا في التراث اللي بيطل على النيل علشان تستمتعوا بالفيو المميز بتاع القصر، والمكتبة موجودة في 15 شارع أحمد مظهر بحي الزمالك وسعر التذكرة 20 جنيه فقط، وفتوحة يوميًا من 9 حتى 2 مساءً.

دار الأوبرا المصرية

أهم مركز ثقافي في القاهرة وفي مصر كلها، وبيستضيف عروض باليه، أوبرا، حفلات موسيقية كلاسيكية ومسرحيات على مدار السنة، ودايمًا هتلقوا فيه عروض مختلفة ومميزة ومهرجانات، وأسعار التذاكر بتختلف من عرض للتاني وفيه عروض بتكون مجانية على مسرح الهناجر وكمان هتلقوا جوا دار الأوبرا متحف الفن الحديث اللي بيضم جواه عدد غير محدود من الاتجاهات الفكرية الفنية للمدارس الواقعية والتجريدية والسيريالية والتكعبية والدادية، ومجموعة لأعمال الفنانين المختلفة وبيشتغل من 10 صباحًا حتى 4 عصرًا، وسعر التذكرة 10 جنيهات للمصريين و20 جنيه للعرب والأجانب.

ساقية الصاوي

مينفعش تكونوا في الزمالك ومهتمين بالثقافة ومتزوروش ساقية الصاوي اللي هي أهم مركز ثقافي خاص في مصر وبيقدموا حفلات ومعارض وورش وفاعليات مختلفة وكل فعالية لها تذكرة بسعر مختلف وبتبدأ من 20 جنيه، وهو موجود في شارع 26 يوليو أسفل كوبري 15 مايو.

الجزيرة للفنون

من الأماكن المميزة للخروج في الزمالك وخوض تجربة متميزة هي زيارة مركز الجزيرة للفنون وهناك هتلقوا مجموعة من الأنشطة الفنية والثقافية وورش عمل ودورات وندوات علمية ومكتبة صقافية، ده غير المعارض والعروض المسرحية وعرض الأفلام الوثائيقية والحفلات.

الدخول مجاني بدون أي رسوم ومواعيد العمل من 10 صباحًا حتى 10 مساءً ما عدا الجمعة وفي الشتاء حتى 9 مساءً.

العنوان: 1  شارع الشيخ المرصفي – بجوار فندق ماريوت – داخل متحف الخزف الإسلامي.

حيفا

جاليري حيفا من الأماكن الثقافية الحديثة ولكن بقى علامة من علامات الزمالك وهما بيقدموا مساحة راحة وهدوء للعمل والدراسة في أجواء هادئة تمامًا وكمان عندهم حفلات مسائية مختلفة تقدروا من خلالها تستمتعوا بأجواء الأندرجراوند المميزة، ومفيش تذكرة دخول ولكن كل خدمة لها سعرها والحفلات بسعر مختلف تمامًا حسب نوع الحفلة والفرقة، وعنوانهم ٣ شارع بابا شارو- متفرع من ٢٦ يوليو- الزمالك.

أكلة وقعدة

 المطاعم والكافيهات في الزمالك متنوعة ومميزة ولو حبينا نتكلم عنها مش هيكفينا 20 مقال ولكن خلينا نختصر ده في ترشيحات قليلة ممكن تكون مناسبة لكم، ونبدأ بـمركب نايل سيتي واللي هتلقوا فيها مجموعة مختلفة من المطاعم زي ستديو مصر وماما، وكافيهات زي ستاربكس وكلهم على النيل وبيقدموا تجربة جودة وخدمة ممتازة، وموجودة في 1 شارع النهر – الزمالك.

أبو السيد

مطعم الملوك والأميرات، ومشهور من خمسينات القرن الماضي، وبيقدم أكل مصري أصيل زي ما قال الكتاب، وعندهم ديكورات مميزة مش هتلقوها في مكان تاني مهما حاول كتير يعمل زيها، وهو من التجارب اللي تستاهل أنكم تجربوها، وعنوانهم  157 محور 26 يوليو، تقاطع شارع محمد مظهر – الزمالك.

سيموندس

موجود من سنة 1898 في الزمالك وهو أقدم محل حلويات فيها ولسه موجود زي ما هو بأطعمته ومذاقه المميز الأصيل، وموجود في 112 شارع 26 يوليو.

عمر الخيام

موجود داخل فندق ماريوت الزمالك وخلينا نقول لو فيه للفخامة عنوان فهي مطعم عمر الخيام بأكلاته العابرة للقارات والمميزة في الطعم والمكونات والتفاصيل والخدمة وطرق التقديم، ورغم غلاء أسعاره إلا أنه يستاهل كل جنيه من أجل تجربة فريدة تليق ببشوات العصر الخديوي المصري.

River bank

مطعم وكافيه مميز وبخدمة وطعم وجودة هتنبسطوا فيهم واحنا جربناه قبل كده أكتر من مرة ودايمًا بيفوق توقعاتنا، تقدروا تفطروا فيه أو تتناولوا الغداء والعشاء، وكمان متاح أنكم تطلبوا مشروبات فقط، وأسعارهم متوسطة ومناسبة جدًا مع الجودة، وبننصحكم تروحوا قبل غروب الشمس للاستمتاع بالنيل مع المأكولات والمشروبات.

أخيرًا الزمالك مش مجرد شوارع ومباني، الزمالك روح وتفاصيل مختلفة، لو عاوزين تكتشوفها انسوا كل حاجة مشهورة واتمشوا في الشوارع واستمتعوا بالعمارات القديمة وأسرار كل طريق بتمشوه لأنها تجربة مختلفة لازم تعيشوها مع الكنوز اللي موجودة في الزمالك.