The Definitive Guide to Living in the Capital , Cairo , Egypt

ضمن سلسة نورت مصر اللي بنسعى من خلالها أننا نساعد كل ضيوف العاصمة في اكتشاف مدينتنا بشكل مختلف ومميز، وبما أن حي مصر الجديدة، أو “هيليوبوليس” زي ما كان اسمها زمان، مش مجرد حي راقي في القاهرة، ولكنه مدينة كاملة لها تاريخها، وتصميمها المعماري الفريد اللي بيجمع بين الطراز الأوروبي والأصالة المصرية، وبنقدر نشوف ده في قصورها القديمة ومبانيها الأثرية، وخلال السطور اللي جاية هنقولكم على مجموعة من الأماكن الشهيرة والمخفية في حي مصر الجديدة سواء كانت أثرية أو فنية وثقافية، وكمان مطاعم وكافيهات لها تاريخ.

وقبل ما نتكلم عن تاريخ مصر الجديدة خلينا نعرفكم أن سنة 1905، اختار البارون إمبان البلجيكي وشريكه المصري باغوص نوبار باشا منطقة نائية في شمال شرق القاهرة علشان يبنوا فيها مدينة الأحلام، والبداية كانت بتأسيس شركة “واحات عين شمس”، اللي بقت بعد كده “شركة مصر الجديدة للإنشاء والتعمير”، لتأسيس خط سكة حديد، ومن هنا بدأ الحلم يتحقق فوق أنقاض مدينة هليوبوليس القديمة، وقدروا بالفعل يحوّلوا الصحراء لحياة كاملة فيها كل فئات الشعب.

كنوز أثرية ومعمارية

قصر البارون

بناه المليونير البلجيكي البارون إدوارد إمبان أحد مؤسسي حي مصر الجديدة وهو تحفة معمارية فريدة، وتصميمه كان للمهندس البلجيكي أندريه برشلو، على الطراز المعماري الهندي والآسيوي، وفيه روح من الأساطير القديمة، وهو مفتوح للزيارة وسعر التذكرة 60 جنيه للمصريين و180 جنيه للعرب، وخلينا نقول أنه من أبرز المعالم اللي لازم تزوروها في القاهرة كلها، وهو مكون من بدروم به سكن لخدم القصر وغرف مختلفة بممرات وأبواب داخلية، وطابق أرضي فيه غرفة استقبال وطعام وغرفة بلياردو، وطابق أول فيه 4 غرف رئيسية وكل غرفة بتراث وحمام منفصل وبتتميز بديكوراتها الفريدة، والسطح اللي التصوير فيه حكاية خاصة في الأجواء المشمسة الهادية، تقدروا توصلوا له عن طريق سلم حلزوني مخصص للصعود.

أما الحديقة التي تحيط بالقصر فهي بتدي رونق خاص للزيارة وهتلقوا فيها أشجار تقدروا تتظللوا فيها وكراسي مخصصة للجلوس وكمان فيها كافيتريا على هيئة أتوبيس لندن الكلاسيكي، وكمان هتلقوا نموذج لترام مصر الجديدة السابق ومجموعة من السيارات القديمة الكلاسيكية.

مواعيد العمل من 9 صباحًا حتى 6 مساءً.

العنوان: شارع العروبة، “صلاح سالم”، مصر الجديدة.

كنيسة البازيليك

كان يطلق عليها “كنيسة البارون” وتم تصميمها على يد المهندس الفرنسي ألكسندر مارسيل عام 1910 بالمال الخاص للبارون إمبان، وتم تصميمها على الطراز البيزنطي وتعد صورة صغرى من كاتدرائية آيا صوفيا في اسطنبول وكان البارون امبان بيطلق عليها اسم “نوترادام دي تونجر” ودفن بها بناءًا على وصيته، وبعد وفاته تبرعت اسرة ابنه لويس بها للكنيسة الكاثوليكية في مصر، وهي موجودة في أول شارع الأهرام بالكوربة وليس لها تذاكر زيارة وتكون مفتوحة للزيارة في أوقات غير محددة رسميًا ويمكنكم التصوير أمامها والاستمتاه بتفاصيل واجهتها المميزة.

السلطانة ملك

هو قصر السلطان حسين كامل واتشهر باسم زوجته السلطانة ملك، وتم بناءه عام 1907 على يد البارون إمبان وكان هدية للسلطان حسين اللي رفض الهدية وأصر على شراءه، وهو من تصميم المهندس الفرنسي ألكسندر مارسيل، وبني على شكل مثلث بتحده 3 شوارع رئيسية “الثورة – البارون – العروبة”، وتم تصميمه من الخارج على طراز العمارة الإسلامية وبه شبه من قباب المساجد المملوكية والمقرنصات والمشربيات والعقود وغيرها من الرموز الإسلامية، وفي داخل القصر كان التصميم مختلف بشكل مميز ونجح المصمم في دمج العناصر الإسلامية بالأوروبية، والقصر بيتكون من بدروم وطابقين والبدروم فيه المطبخ وغرف التخزين، والطابق الأول فيه غرف الاستقبال والثاني لأجنحة النوم وغرف المعيشة.

حاليًا القصر بقى مركز للابداع الرقمي وريادة الأعمال وغير معروف السماح به الزيارة أم لا ولكن بالتأكيد تقدروا تزوروا المبنى خارجيًا والاستمتاع بتفاصيله والتصوير أمامه، وهو موجود في شارع صلاح سالم “العروبة” أمام قصر البارون.

التمشية في الكوربة

رحلة التمشية في منطقة الكوربة الشهيرة هي تمشية في وسط معالم معمارية تاريخية وأثرية مميزة، وميدان الكوربة يعرف باسم ميدان الـ3 بنايات وصمم بهندسة معمارية فريدة، وهتتعرفوا على جمال وعراقة حي مصر الجديدة منها، والكوربة بني على شكل مثلث يبدأ من شارع الأهرام بداية من قصر الاتحادية حاليًا “فندق هليوبوليس سابقًا”، وحتى كنيسة البازيليك، وهتستمتعوا بالتفاصيل المميزة لكل مبنى وواجهته وهتتعرفوا على تاريخ مكتوب في كل طوبة اتأسست بيها المنطقة مع العلم أن سبب تسميته “الكوربة” هي أن الترام عندما كان يصل هناك ويستعد للالتفاف والعودة كان الكمسري البلجيكي الجنسية ينادي “الكورب” وتعني الدوران فسميت بـ”الكوربة”.

ثقافة وفن

مكتبة مصر الجديدة

أهم مكان ثقافي في مصر الجيدة وبيضم مكتبة للطفل ومكتبة عامة ومركز كمبيوتر ولغات والزيارة متاحة للجميع بسعر 5 جنيه للكبار مصريين أو عرب، وكمان فيه اشتراكات سنوية ومتاح للمصريين والعرب، والمكتبة بتقدم خدمات “نادي السينما – القراءة – استعارة كتب – انترنت – رحلات – مكتبة سمعية وبصرية – صالون ثقافي” ده غير الحفلات والفعاليات اللي بتقدمها طوال الوقت للكبار والأطفال.

مواعيد العمل يومًا من 10 صباحًا حتى 8 مساءً ما عدا الجمعة من 1 ظهرًا حتى 7:30 مساءً.

العنوان: 42 شارع العروبة – مصر الجديدة.

متحف الطفل

أنشئ عام 1985 في حي مصر الجديدة على مساحة 1200 متر مربع كجزء من مشروع مشترك مع المتحف البريطاني، وشارك في إعداد المتحف خبراء من جميع أنحاء مصر والعالم في جميع المجالات لمساعدة الأطفال وبيقدموا تدريبات وورش وفاعليات فنية وثقافية مختلفة، وموجود فيه مركز العلوم ومتحف الطفل وعرض القبة السماوية.

وكمان هتستمتعوا بشرح كل حاجة في المتحف ومركز العلوم والقبة سواء بالعربي أو الانجليزي من خلال مرشد مخصوص وسعر الدخول يبدأ من 50 جنيه للفرد يشمل زيارة الحديقة ومنطقة الألعاب فقط، والقبة السماوية سعر الزيارة 85 جنيه بتذكرة منفصلة، وكذلك أدوار المتحف ومركز العلوم، ومتوفر في كل جولة مرشد متخصص ولو محتاجين مرشد باللغة الإنجليزية بيتم توفيره بزيادة 120 جنيه.

مواعيد العمل من 8 صباحًا حتى 7 مساءً ما عدا الويك إند حتى 9 مساءً.

العنوان: 34 شارع أبو بكر الصديق – مصر الجديدة.

مطاعم وكافيهات تاريخية

بالميرا الصغرى

مطعم من المطاعم المميزة والتاريخية في منطقة الكوربة وتأسس سنة 1946 وكان زمان قبلة للمشاهرير والملوك وما زال محافظ على رونقه وفخامته وحتى زواره المميزين، وتقدروا تعرفوا أكتر عنهم من خلال تجربتنا هنا.

العنوان: تقاطع الكوربة مع الأهرام – مصر الجديدة

لو شانتي

من أعرق مطاعم مصر الجديدة لو شانتي وهو تأسس عام 1976 وبيقدم أطباق سويسرية متميزة ويستحق التجربة جدًا، ومازال المطعم قبلة للمشاهير والشخصيات العامة، ويفضل الحجز قبل ما تزوروا المكان.

العنوان: شارع بغداد – الكوربة

أبو حيدر

الشاورما عنده بتتكلم مصري بكل حب، وهو أقدم حد بيقدم شاورما مصري، ومش بيقدموا غير شاورما وعصير مانجا وللأسف المكان زحمة جدًا طول الوقت ولكن التجربة تستحق أنكم تزوروه ولكن اعتبروا ان مفيش مكان للقعدة وهتعرفوا أن الأكل في الشارع قدام أبو حيدر أو في العربية عادي جدًا في مصر الجديدة.

شارع صلاح الدين – روكسي.

جروبي

أقدم كافيهات مصر الجديدة وافتتح في عشرينات القرن الماضي وبيتميز بالديكور الكلاسيكي اللي بيرجكم بالزمن وبيقدموا مشروبات وحلويات متميزة.

العنوان: 37 شارع إبراهيم اللقاني، مصر الجديدة.

Bouchée

بيقدموا مجموعة متميزة من المخبوزات الفرنسية بطعم فريد ومختلف وكمان الأجواء بتاعتهم كلاسيكية كأنكم موجودين في قلب باريس النابض.

العنوان: 22 شارع بغداد – الكوربة.