The Definitive Guide to Living in the Capital , Cairo , Egypt

تصوير: حاتم مشير

لو كنتم من عشاق الورود بصفة خاصة، والنباتات بصفة عامة، فأكيد هتكونوا من جمهور معرض زهور الربيع اللي بيتعمل كل سنة في حديقة الأورمان، واللي هينطلق السنة دي من يوم السبت الموافق 14 مارس 2020، وهيستمر لمدة شهر كامل، يعني هينتهي يوم 14 أبريل 2020.

ولو كنتم هتروحوا السنة دي معرض زهور الربيع، فيه معلومات مهمة لازم تكونوا عارفينها عن حديقة الأورمان النباتية بالجيزة، واللي بتعتبر من الحدائق النباتية النادرة في مصر، وبتضم أكبر مجموعة نباتية، وفيها حوالي 100 فصيلة بتشتمل على 300 جنس بيتبعها 600 نوع.

بيرجع تاريخ حديقة الأورمان لعهد الخديوي إسماعيل، وبالتحديد لسنة 1875، وكان الهدف من إنشائها هو إمداد القصور الخديوية بالفاكهة والموالح والخضروات، وأغلب نباتات الحديقة في بدايتها تم الحصول عليها من جزيرة صقلية.

واللي كتير مايعرفوهوش هو إن الحديقة كانت جزء من قصر الخديوي إسماعيل، واللي كان إسمه وقتها سراي الجيزة، وكان الخديوي مهتم جدًا بالحديقة، وعلشان كدة أصدر أوامر باسترياد أشجار ونباتات مزهرة من جميع أنحاء العالم، وده السبب في إن الحديقة فيها أندر نباتات في العالم لحد النهارده.

الل قام بتصميم الحديقة، مهندسين من فرنسا، وأشرف على تنفيذها المهندس (ج. دليشفاليري) وكان معاه كبير البستانيين في مصر وقتها إبراهيم حمودة.

مساحة الحديقة وقت إنشائها كانت 95 فدان، وكانت بتضم 3 أجزاء، وهم الأورمان، والحرملك وبيقع حاليًا في الجزء الغربي لحديقة الحيوان، والسلاملك وبيقع حاليًا في الجزء القبلي من الحديقة.

تم فصل الأومان عن حديقة الحيوان سنة 1890، وفضلت تابعة لقصر الخديوي لحد سنة 1910، وبعدها استلمتها وزارة الزراعة، ولما تم التخطيط لشارع الجامعة سنة 1934 اتاخد الجزء الجنوبي منها وتم ضمه لحديقة الحيوان، وبكدة أصبحت مساحتها 28 فدان بس.

وكلمة أورمان كلمة تركية معناها الغابة أو الأحراش.

والحديقة فيها قسم لتبادل البذور مع جميع الحدائق والمراكز البحثية في العالم، وحاليًا هي بتتبع الإدارة المركزية للتشجير والبيئة التابعة لوزارة الزراعة.