The Definitive Guide to Living in the Capital , Cairo , Egypt

السفر من أجمل التجارب اللي ممكن يمر بيها الإنسان خاصة الناس اللي بتحب تجرب وتكتشف ثقافات جديدة وتقابل ناس مختلفة، وفي السفر يحلى تجربة الأكل المحلي، وهنا بقى لازم تقف وتاخد بالك أنت هتأكل إيه لأن لو ما اختارتش صح يا إما هتصرف أغلب فلوسك على بطنك لو اخترت مكان غالي أو ممكن تختار مطعم صغير وييجي لك تسمم وما تستمتعش بالأجازة فعلشان تهرب من الأتنين اعرف من السطور الجاية نصائح مهمة هتنفعك علشان تختار المكان المناسب.

أول نصيحة بحسب مقال خدمي نشره موقع الرحالة، أوعى تمشي وراء الناس اللي بيقفوا قدام المطعم ويقعدوا يقولوا لك عندنا عروض مغرية لأن في الأغلب العروض دي بتبقى بكش وأي كلام، وحتى لو طلع الحساب زي ما قاللوا بتبقى كمية أقل من الطبيعي فخليك في المضمون وأبعد عنهم.

ثاني حاجة أبعد عن المطاعم اللي في المناطق السياحية لأنها بتكون غالية جدًا، يعني لو كنت في زيارة لمتحف أو معبد مثلًا مش لازم تاكل في المحلات اللي جنبه على طول، دايمًا اختار مطاعم بعيدة عن المزارات السياحية.

ثالث نصيحة يُفضل أنك تبقى عارف الطلب اللي هتطلبه ويكون له صورة علشان تبقى عارف المكونات، ممكن اسم يعبك في المنيو وتكتشف إنه أكلة غريبة جدًا مش هتقدر تاكلها.

رابع حاجة خلي بالك إن مش كل حاجة بتتحط على الترابيزة ببلاش خاصة أزايز المياه، فلازم تسأل إذا كانت الحاجة دي ببلاش ولا لأ وسعرها قد إيه وبعد كده قرر إذا كنت عاوزها ولا لأ.

خامس حاجة يا بطل حاول تختار المطاعم اللي في شوارع جانبية مش رئيسية لأنها بتكون أرخص كتير، بس طبعًا برضه لازم تبص في المنيو وتقرر الأفضل ليك من قبل ما تدخل وتقعد.

سادس نصيحة برغم إن ده مش معيار دايمًا بس كل ما المطعم كان زحمة كل ما ده كان علامة إن المطعم ده كويس وأكله حلو وأسعاره معقولة.

سابع حاجة حاول تختار المطعم اللي أغلب الزبائن فيه سكان محليين مش أجانب لأن ده معناه إنه مطعم حلو وأسعاره حلوة مش سياحي وأسعاره غالية.

ثامن حاجة راجع الحساب وراهم واجمعه بنفسك علشان ساعات بيتلخبطوا أو بيستهبلوا، على حسب يعني، المهم لازم تراجع وراهم.

تاسع حاجة بقى ورمانة الميزان اللي هنختم بيها اوعوا تدخلوا مطعم الترابيزات فيه مش نضيفة لأن ه معناه أن المطبخ كمان مش نضيف وده طبعًا نتايجه هتكون وخيمة على معدتك وسفريتك.

ياريت ما تستسهلوش وتختاروا أي مطعم والسلام لأن الأكل اللي بتاكله جزء من رحلتك واكتشافك معالم المكان ده غير أنك لو اخترت غلط ممكن تقضي باقي السفرية في السرير.