The Definitive Guide to Living in the Capital , Cairo , Egypt

أخيراً وبعد طول انتظار وبشكل رسمي، أعلنت وزيرة السياحة المصرية الدكتورة “رانيا المشاط” عن موعد افتتاح المتحف المصري الكبير واحد من أهم محاور الحملة الترويجية للسياحة في مصر، واللي هيكون في الربع الأخير من السنة الجاية 2020، وده خلال حوار ليها على “صدى البلد”.

الوزيرة قالت في كلامها كمان إن الدولة حريصة على إنها تكون موجودة ومشاركة دايمًا بجناح كبير في البورصات السياحية الكبيرة حوالين العالم، وإن الوزارة بتخصص جزء في الأجنحة المصرية المشاركة في المعارض السياحية الدولية للترويج للمتحف المصري الكبير .

من الأخبار الحلوة كمان إن منتدى الاقتصاد العالمي في تقريره الخاص بـ”التنافسية والسفر” صنف مصر كرابع أعلى دولة شهدت تطورات في قطاع السياحة والسفر، واللي ساهم في ده هو تقدم مصر أكتر من مركز في السياحة المستدامة اللي ليها اهتمام كبير من الدولة متمثل في المحميات الطبيعية والسياحة الخضراء، ده غير إن 10% من الفنادق المصرية معاها علامة النجمة الخضراء، يعني صديقة للبيئة.

مصر كمان حصلت على المركز الأول على مستوى أفريقيا في مجال الترويج للمقاصد السياحية، وده كان أحد أهم أسبابه تخصيص الوزارة دعم مالي للشركات المشاركة في فعاليات بورصة لندن السياحية 2019 (World Travel Market) والمقامة حاليًا في العاصمة البريطانية في الفترة من 4 لـ 6 نوفمبر بمشاركة 5000 شركة عارضة من أكبـر منظمى الرحلات ووكلاء السياحة والسفر من مختلف دول العالم، وبحضور أكثـر من 30ألف زائر من المهتمين والمتخصصين فى مجال السياحة والسفر، وده غير المشاركة الجماهيرية والإعلامية الكبيـرة خلال فترة انعقاد المعرض، إلى جانب زيارة عدد كبير من النجوم العالمين لمصر في الفترة اللي فاتت، وده يعتبر في حد ذاته ترويج غير مدفوع الأجر، وبيدي مصداقية وثقة كبيرة للسائح.