The Definitive Guide to Living in the Capital , Cairo , Egypt

الصورة: محمد نبوي

الفترة دي، بتحتفل محافظة القاهرة بمرور 14 سنة على افتتاح شارع المعز بعد تطويره، وهو الشارع اللي بيضم عدد كبير من الآثار الإسلامية، واللي كان بيطلق عليه زمان الشارع الأعظم أو قصبة القاهرة أو قصبة القاهرة الكبرى، وهو شارع تاريخي بيمثل قلب مدينة القاهرة القديمة.

تعالوا نتعرف أكتر على حكاية الشارع ده.

1 – مع نشأة مدينة القاهرة خلال عهد الدولة الفاطمية في مصر، بدأ شارع المعز، اللي كان وقتها شارع رئيسي بيمتد من باب زويلة جنوبًا وحتى باب الفتوح شمالًا فى موازاة الخليج، وأطلق عليه في البداية الشارع الأعظم، وبعدا اتغير اسمه لـ قصبة القاهرة، وقسم الشارع ده مدينة القاهرة لقسمين شبه متساويين وكان المركز السياسي والديني للمدينة.

2 – أطلق على الشارع اسم المعز لدين الله في سنة 1937 تكريمًا لمنشئ القاهرة، وبتمتد التسمية دي من باب الفتوح إلى باب زويلة، شاملة شوارع باب الفتوح، أمير الجيوش، النحاسين، بين القصرين، الصاغة، الأشرفية، الشوايين، العقادين، المناخلية، والمنجدين، السكرية إلى باب زويلة. وبترجع التسمية الحالية إلى الخليفة الفاطمي المعز لدين الله وهو أبو تميم معد بن المنصور إسماعيل بن القائم بأمر الله محمد بن المهدي عبد الله الفاطمي، اللي بيرجع أصله إلى جزيرة صقلية بينما ولد بمدينة المهدية سنة 319هـ وبتنسب إليه القاهرة المُعزية.

3 – كان ترميم شارع المعز لدين الله الفاطمي جزء من برنامج الأمم المتحدة الإنمائي، واللي كانت انطلاقة لمشروع القاهرة التاريخية لحماية آثار القاهرة التاريخية من التعديات والأضرار اللي اتسبب فيها زلزال 1992.

4 – بيعتبر شارع المعز لدين الله الفاطمي أقدم الشوارع الموجودة في مصر، وبيوصل عمره لألف سنة تقريبًا وبيضم مجموعة مميزة من الأثار الإسلامية الفريدة اللي بتمتد بطول جانبي الشارع العريق.

5 – أصبح شارع المعز بعد أعمال تطويره واقتصار الحركة فيه على السير على الأقدام، وجهة لعشاق الآثار الإسلامية وهواة فن التصوير الفوتوغرافي، ومزار بيجتذب مختلف الفئات العمرية من الأطفال والكبار من أبناء البلد والوافدين اللي بيحسوا فيه بعبق التاريخ وعظمته و بهائه.