The Definitive Guide to Living in the Capital , Cairo , Egypt

كوباية الشاي بلبن الصبح مع البقسماط، ويا سلام على حبة بطيخ ساقين في عز الحر مع حتة جبنة بيضاء براميلي، أنك تعمل حاجات بسيطة بتحبها ده بالتأكيد بيساعدك أنك تستمر وسط دايرة الحياة والروتين والزحمة فبتعمل حاجات صغيرة تفرحك وتخليك تشحن من تاني، الحاجات دي مش سهل يفهمها غير المصريين خاصة لو أكلات مصرية زي الفسيخ والرنجة والبطيخ مع الجبنة والملوخية بالأرانب، وزي مافيه ناس الأكل هو متعتها الوحيدة فيه ناس السفر والفسح هو حلمها الأول والأخير حتى لو جوه مصر. علشان كده #كايرو_360 جمعت لكم أفضل أنشطة تعملوها جوه مصر تساعدكم أنكم تفصلوا وتستمتعوا بوقتكم.

شط إسكندرية وبحر الجمال والسحر

مافيش أجمل من أنك تاخد عربيتك أو تركب القطر وتطلع جري على إسكندرية، وفي خلال كم ساعة هتلاقي نفسك بتتمشى على الكورنيش وهواء إسكندرية الساقع يخبط في وشك  وينعشك، وصوت تدافع الأمواج بيفصلك عن كل حاجة، ومافيش مانع من كوباية شاي على البحر، أو آيس كريم  قبل ما تدب أكلة السمك التمام وترجع القاهرة تاني، ولو قررت تروح في الشتاء وكان من نصيبك إنها تشتي زي ما بيقولوا الإسكندرانية أوعى تستخبى من المطر وخليك كم دقيقة تحتيه استمتع بيه وهو بيغسلك من همومك.

كمان لو خدت جولة وأتمشيت في شوارع وسط البلد هناك شكل المباني يجنن ويا سلام لو كان حظك حلو وكان فيه عرض أوبرا هتستمع بيه لأقصى درجة وما تتخضش من تمثال نوبار باشا هو صحيح هو كان أول رئيس وزراء في تاريخ مصر الحديث بس تاريخه معروف يعني واللي يدور يلاقي، المهم شكل الأوبرا نفسه ياخد العقل المبنى القديم والإضاءة بليل وممكن تتصوروا هناك.

 

جولة في متاحف الأقصر بالـ Air Balloon

الأقصر بلدنا بلد سواح بقى فيها المصريين بيتمتعوا بآثار بلدهم، بعد ما نسبة السياحة قلت في مصر ده ساهم أن الٍأسعار تبقى مناسبة أكتر للمصريين، ومن الحاجات اللي أسعارها قلت كانت الجولة اللي بتتعمل في الأقصر بالـ Air Balloon علشان تستمعوا بأجمل تجربة في حياتكم، بتحجزوا بالتليفون لو أنتم مش تبع شركة، وتحجزوا مع أي شركة بتقدم الخدمة دي وتقدروا تقارنوا بين الأسعار من خلال الإنترنت، وبتروحوا على حوالي الساعة 5 أو 4 الفجر قبل شروق الشمس، وبتاخدكم مراكب  بيتقدم فيها شاي سخن ووجبة خفيفة لأن الجو بيكون برد.

وبعد كده بتاخدكم أتوبيسات على المكان اللي هيطلع منه الـ Air balloon وبتتقسموا مجموعات وبتدخلوا في حاجة أشبه بصندوق مربع كبير معمول من الخوص المقوى أو الخشب وفي النص فيه حاجة أشبه بأنبوبة الغاز بتطلع نار كل 3 ثواني وبتبدأ ترتفع في السماء قبل أول شعاع نور ما يظهر، طبعًا ألوان المنطاد أو الـ Air balloon بتبهرك لأنها بتكون ملونة ومبهجة خاصة كمان أنك وأنت طالع بتشوفهم حواليك وممكن تتصور معاهم، الموضوع مش بيقلق أو يخوف خالص خاصة للناس اللي بتخاف من المرتفعات لأنها بتكون أمان. مع بداية الجولة بتشوف معبد الكرنك والأقصر وبيبدأ يعرفك المرشد على تاريخ المعابد وكمان بتمر على حقول زراعية وعلى الصحراء والنيل، تجربة تستحق كل جنيه بتدفعه فيها وهي فعلًا ما كنتش غالية مقارنة باللي بتحس بيه، تجربة مختلفة ما تتنسيش.

الغطس في البلو هول في دهب

فيه مثل معروف عند أهل دهب بيقول :” من ذهب دهب عقله ذهب” وده بيحصل لك فعلًا لما بتروح هناك ما بين الأنشطة اللي بتعملها وجمال البحر والجبال بتتسحر من الطبيعة فعلًا، بس من أكتر التجارب اللي صعب تنساها هي الـ Snorkeling  لغير المحترفين والغطس للمحترفين في البلو هول  في دهب. البلو هول من الأماكن النادرة اللي مش موجودة غير في تقريبًا 5 أماكن في العالم كله منها في مصر، وده بيكون بسبب مُذنب سقط من الفضاء على الأرض سبب عمق كبير جدًا واتكونت بمرور السنين شعب مرجانية وكهوف بتعيش جواها الأسماك وبتجذب السياح من آخر بلاد العالم، والغطس هناك للمحترفين بس لأن العمق بيكون كبير جدًا والكهوف بتجذب الغواصين أنهم يكتشفوها واللي بتكون على عمق كبير من سطح المياه فبالتالي ممكن تخليهم ينشغلوا باكتشاف أعماق المكان وينسوا المدة المحددة لانتهاء الأكسجين أو يتحبسوا جوه كهف.

مشاهدة أنواع الطيور المختلفة في الـ Magic lake في الفيوم

مشاهدة الطيور من الأنشطة اللي مشهورة بيها الفيوم، وبتكون الصبح بدري في الأغلب بالأتفاق مع المتخصصين اللي بيقدموها لأنهم بيفضلوا يشرحوا كل أنواع الطيور اللي بتشوفوها ومواسم هجرتها، خلوا بالكم لو في الصيف يكون معاكم  زجاجة مياة وجاكت خفيف ولو معاكم كاميرا محترفة هتصوروا أجمل صور على الطبيعة لفصائل طيور نادرة.

سيدنا الحسين وزينب خاتون

أما لو عاوزين تخرجوا في القاهرة وتحسوا بروح القاهرة زمان، فمافيش مكان أحسن من منطقة الحسين تقرأوا الفاتحة وتقعدوا في الفيشاوي اللي بيقدم أحلى شاي بالنعناع ومشروبات مصرية أصيلة، كمان فيه فطاطري الحسين اللي بيعمل فطائر تأكلوا صوابعكم وراها حرفيًا، وأكيد مش هتقدروا تقاوموا أنكم تاخدوا لفة في المكان وتشتروا حاجات  نادرة من خان الخليلي واللي مش هتلاقوا زيها في أي مكان، كمان على الناحية  التانية فيه زينب خاتون اللي ساعات بتقدم عروض عود غير أن بيكون فيها دورات تعليمية منتظمة ، وبرضه فيها قاعدة لطيفة  تقدروا  تستمتعوا بها سواء لو عاوزين تشربوا عصائر أو فطير بكل أنواعها.