The Definitive Guide to Living in the Capital , Cairo , Egypt

يوم ما بنفكر نكتشف مكان جديد في بلدنا بتبقى مغامرة جريئة لو قررنا نخرج بره القاهرة، وأغلبنا بيطير على الإسكندرية أو مطروح، ويوم ما بنروح شرم ولا الغردقة ولا دهب بتبقى كده جبرت، لكن قليل مننا بيغامر ويروح أماكن نقدر نقول عليها “مجهولة” عند معظمنا، وده اللي قرر يعمله المصور المصري “فارس حرز” لما قرر يدخل في مغامرة تصوير جديدة على الحدود المصرية وتحديدًا في “نويبع” وعلشان الدقة أكتر “رأس شيطان”.

وارد جدًا تلاقوا ناس كتير حواليكم أو أنتم نفسكم عارفين الإسم “رأس شيطان”، ويمكن كمان تكونوا عارفين موقعها الجغرافي، ومش بعيد تكونوا شوفتوا صورة أو اتنين للمنطقه وجمالها، لكن اللي شافه “فارس” بعيونه وسجله بكاميرته، أكيد هيختلف عن أي حاجه شوفتوها أو سمعتوا عنها قبل كده.

المناظر الطبيعية المبهرة اللي بتمتاز بيها صحراء سيناء، خلت كتير من السياح الأجانب في الفترة الأخيرة يحطوها على رأس جدول زيارتهم لمصر، بعد ما كانت مناطق مجهولة بالنسبة لكتير منهم، وبفضل “فارس” واللي زيه من المصورين اللي بيكشفوا جمال مصر، بقت الأماكن دي أماكن سياحية من الطراز الأول، وعلى مستوى عالمي.

“رأس شيطان” من أجمل الأماكن اللي ممكن الواحد يزورها أو يشوفها في مدينة نويبع، ومن وجهة نظر فارس إنها أنسب الأماكن اللي ممكن تهربوا ليها من زحمة المدينة وتعبها، وأحلى الأماكن اللي تنعزلوا فيها عن العالم وتستجموا لو حابين، وقال في كلامه مع CNN العربية إن طبيعة المكان هناك ساحرة، يعني نقدر نقول إنها “جنة الله على الأرض” والحلو فيها إنها عبارة عن مخيمات منصوبة على شاطئ خليج العقبة، وبيتقدم فيها مأكولات بدوية زي أسماك البحر الأحمر، والفراخ المحضره على الطريقة البدوية، ده غير أنشطة كتير ممكن نمارسها في منطقة رأس شيطان، وبأسعار أرخص بكتير من أي مكان تاني في سيناء.

على الخريطة هتلاقوا رأس شيطان بين نويبع وطابا في محافظة جنوب سيناء، ومشهورة جدًا بالشعب المرجانية الصلبة، والأخطبوط، وأسماك “البافر”، و”الجروبر القمرية” و”شقائق النعمان” بمختلف أشكالها وألوانها، وجه اسم “رأس شيطان” بسبب إن المنطقة بتبدأ بشاطئ وبتنتهي بشاطئ تاني، وكان إسمها الأصلي “رأس الشطان” وبعدين لإن الأجانب ماعرفوش ينطقوا الإسم فتحول لـ “رأس شيطان”.

فارس حرز بدأ بتوثيق المناطق الصحراوية في سيناء من 5 سنين تقريبًا، وكانت أولى رحلاته لدير سانت كاترين خلال رأس السنة الميلادية 2014، ومن ساعتها قرر إنه يزور سيناء كلها ويوثق جمالها المخفي عن عيون الناس.