The Definitive Guide to Living in the Capital , Cairo , Egypt

تصوير: محمد صالح، المصدر

 

يمكن أغلبنا مايعرفش إن عندنا في مصر متحف متخصص للسكة الحديد، بيحكي تاريخ وتراث خطوط السكة الحديد في مصر، وبيضم بين حيطانه آثار ومقتنيات نادرة وغالية جدًا ولا تقدر بتمن، بتحكي عن عظمة النوع ده من وسائل المواصلات، باعتبارها واحده من أقدم وسائل المواصلات في العالم.

النهارده هناخد لفة معاكم في المتحف ده، وهنتعرف على أهم 5 معلومات عن متحف السكة الحديد الموجود في “ميدان رمسيس”:

1- المتحف عمره 87 سنة ( من 26 أكتوبر سنة 1932) وافتتح لاستقبال الزوار في 15 يناير 1933، ويعتبر علامة من علامات التراث المصري الأصيل، وده لإنه بيخلد ذكريات ثاني أقدم سكة حديد في العالم، ده غير إنه بيحكي علاقة المصريين بالسكة الحديد كوسيلة مواصلات وسفر، باعتبارها كانت الوسيلة الأفضل والأحدث للسفر لمسافات بعيدة في وقت اكتشافها.

2- المتحف بيضم 700 نموذج ومعروض للقطارات والسكة الحديد، ده غير مجموعة ضخمة من الوثائق والخرائط والبيانات الإحصائية ومستندات بتظهر تطور النقل والسكة الحديد، ابتداءًا من عقد إنشاء أول خط سكة حديد بين القاهرة والإسكندرية، والموقع بين عباس باشا حاكم مصر وروبرت استيفنس ابن مخترع القاطرة البخارية عام 1851، مرورًا بكافة الوثائق التانية المتعلقة بالسكة الحديد وتطويرها على مستوى مصر والعالم.

3- في المتحف فيه نموذج لأول فكرة قاطرة ظهرت سنة 1783، ولأول قاطرة مشيت في مصر سنة 1854، ده غير نماذج للقاطرات والعربات والصالونات الخاصة المختلفة سواء جديدة أو قديمة، واللي بتبين تطور السكة الحديد المصرية.

4- فى جناح مستقل لوسائل النقل التانية (مش بس قطارات)  منها مثلًا طائرات بمراحل تطورها، ومراكب شراعية، ونماذج صور للحيوانات اللي بتستخدم كوسيلة نقل ومواصلات قبل إنشاء السكة الحديد وبعدها، وكان بيستخرج لها رخصة، زي الحمار.

5- في بانوراما لخط السكة الحديد بالكامل، بيحكي مراحل تطور طباعة التذكرة، وكيفية طباعتها، والأدوات المستخدمة فى طباعتها.