The Definitive Guide to Living in the Capital , Cairo , Egypt

الصورة الرئيسية: Abdalla Ibrahim

الخروجات في القاهرة حلوة، بس الأحلى لما نسافر ونغيّر جو، نرفّه عن نفسنا، ونهرب شوية من ضغط الشغل والحياة. وبما إن إجازة عيد الأضحى 2025 هتكون 5 أيام، فحبينا نرشّح لكم 5 أماكن برّا القاهرة تقدروا تستمتعوا فيهم بالمياه الصافية والهواء النقي… لو الجو سمح.

في البداية، مهم جدًا تتابعوا أخبار هيئة الأرصاد قبل ما تسافروا، علشان تعرفوا هتلبسوا إيه وتخططوا صح، خصوصًا إن الجو اليومين دول متقلّب. كمان لو ناويين تباتوا، احجزوا بدري سواء فنادق أو شقق، علشان تلاقوا مكان كويس وسعر مناسب. ولا تنسوا ترتبوا مواعيد التحرك والوصول والأنشطة اللي هتعملوها هناك علشان تطلعوا بأحلى تجربة.

الفيوم: الطبيعة على أصولها

مياه، شلالات، بحيرة تاريخية، تزحلق على الرمال، ركوب خيل، بيتش باجي، أكل فلاحي… كل ده متاح وجميل في الفيوم. والمميز فيها إنها قريبة من القاهرة، وسهلة في التنظيم، وهتعيشوا فيها مغامرة وطبيعة مختلفة عن أي مكان تاني حوالينا.

بورسعيد: رخيصة ومليانة طابع خاص

مدينة ساحلية بأسعار مناسبة، شوارعها بتلمّح بتخطيط تاريخي وأصل، وركوب معدية بور فؤاد وسط النوارس تجربة تستحق التصوير، حرفيًا هتتنقلوا من قارة لقارة وأنتم بتاكلوا الطيور بإيديكم! ومتنسوش تمروا على محلات الحلويات والشيكولاتة الشهيرة، وتجربوا أحلى سمك.

العين السخنة: البحر النضيف على بُعد خطوتين

بعد الفيوم، العين السخنة هي الأقرب، بس بتكلفة أعلى شوية. هتلاقوا فيها شواطئ نظيفة ومنظمة، أكوا بارك، جولات جلاس بوت، سنوركلينج، وشعب مرجانية بتخطف العين. المكان مثالي لإجازة سريعة بس فيها رفاهية.

إسكندرية: عشق البحر وأصيله

مهما سافرنا ورحنا وجينا، تفضل إسكندرية ليها طعم تاني. البحر هناك بيضحك في الغروب، والهواء بيشيل عن القلب، وتقدروا تزوروا قلعة قايتباي، المتحف اليوناني الروماني، متحف المجوهرات، وتتصوّروا على كوبري ستانلي أو في الأماكن الجديدة اللي فتحت على البحر. وطبعًا متفوتوش أكلة سمك جامدة من مطاعم مميزة (مش مشهورة بس)، مع عيش لحمة وألبان مايتنسيش.

الإسماعيلية: هدوء ومانجا وقناة السويس

أول حاجة تعملوها في إسماعيلية؟ تاكلوا مانجا طازة! وكمان تقدروا تشاركوا في حصاد المانجا في مزارع مفتوحة. بجانب كده، أكل السمك هناك له طعم تاني. زوروا متحف الإسماعيلية، وبيت ديليسبس (اللي اتحول لفندق)، واتفرجوا على المراكب العملاقة وهي بتعدي في قناة السويس. الشواطئ هناك هادية وجميلة، والمدينة تستحق تبقى جزء من خطتكم.