The Definitive Guide to Living in the Capital , Cairo , Egypt

الصورة: عصام محمد

 

على الرغم من إن “المتاحف” كلمة بتوحي بالتاريخ والزمن اللي فات، إلا إنها بتعبر عن “حضارة” اتبنت وكانت ولازالت موجودة.. علشان كده صعب تلاقي بلد عندها حضارة وتاريخ وماعندهاش متاحف عظيمة.

المتاحف كمان كتاب تاريخ مجسم وكبير.. كتاب مش ممكن يكدب عليك، لإنك في الآخر بتشوفه بعينيك، وممكن كمان تلمسه بإيديك، وده معناه إنك بتدخل في فجوة زمنية وبتدخل في رحلة تاريخية، مع كل أثر أو عمل فني عينك بتقع عليه.

تعالوا بينا نبدأ مع بعض رحلة تاريخية لـ9 متاحف موجودة في القاهرة، زيارتها ماتتفوتش، ولازم تدخلوها ولو لمرة واحدة في حياتكم، لإن حقيقي هيفوتكم كتير لو ما زورتوهاش:

 

متحف جاير أندرسون:

مؤخرًا في ناس كتير بدأت تعرفه وتسمع عنه، وبيضم اتنين من البيوت التاريخية الموجودة في القاهرة، وتحديدًا في حي السيدة زينب وبترجع للقرن الـ17 وهما بيت “الكريدلية” اللي اتبنى سنة 1632، وبيت “آمنة بنت سالم” اللي اتبنى سنة 1540.

طيب  إيه حكاية “جاير أندرسون” دي؟ وجت منين التسمية دي للمنطقة؟ “جاير أندرسون” هو رائد بريطاني متقاعد قام بترميم البيتين دول بنفسه وعلى نفقته الخاصة في ثلاثينيات وأربعينيات القرن العشرين، وفرشهم من جوه بالمفروشات والأعمال الفنية القديمة، وعرفانًا بالجميل ده، أطلق اسمه على المكان.

 العنوان: أحمد بن طولون، السيدة زينب.

مواعيد العمل: 9 صباحًا – 4 مساءً.

 

متحف الجمعية الجغرافية المصرية:

واحد من أقدم المتاحف في مصر، أسسه الخديوي إسماعيل سنة 1875 بهدف تشجيع استكشاف الأقاليم في مصر وأفريقيا، هتلاقوا فيه خرائط ومنشورات وقطع أثرية من القرن الـ18 لحد القرن الـ20 وهتتعرفوا فيه على طرق التدخين القديمة المختلفة، وهتلاقوا كمان توثيق لأشهر الألعاب الشعبية المصرية.

المتحف بيضم مجموعة متنوعة من الملابس والمجوهرات، وعدة الحلاقين المتجولين، ده غير تماثيل ومجسمات لقناة السويس ومراحل بناءها، بالإضافة لقاعة مخصصة للكتب القديمة النادرة، اللي بيرجع تاريخ بعضها للقرن الـ16.

وبيشتغل من 10 صباحًا حتى 2:30 ظهرًا، ماعدا الخميس والجمعة.

العنوان: 109 شارع القصر العيني، بالقرب من ميدان التحرير.

رقم التليفون: 0227945450.

 

متحف الفن الإسلامي:

صعب ما تدخلوش ولو لمرة واحدة في حياتك، وده لإنه بيضم مجموعة كبيرة من الفنون الإسلامية المختلفة، سواء في العمارة أو غيرها من الفنون اللي اتجمعت من معظم دول العالم زي شمال أفريقيا، مصر، الأندلس، الصين، وإيران.

العنوان: ميدان باب الخلق, شارع بورسعيد, أمام مديرية أمن القاهرة.

التليفون: 23909930.

مواعيد العمل: يوميًا من 9ص إلى 5 م.

 

المتحف القبطي:

وده كمان من المتاحف اللي صعب ماتعديش عليها، وبيضم مجموعات ثمينة من التحف الأثرية اللي بتوثق التاريخ القبطي في مصر، وصل عددها لـ 16 ألف قطعة، ما بين مجموعة المخطوطات، والأقمشة والمنسوجات، والعاج، والأخشاب، والمعادن، والفخار.

العنوان: شارع ماري جرجس، مصر القديمة.

مواعيد العمل: 9 صباحًا – 4 مساءً.

 

المتحف الحربي بالقلعة:

هو في الأصل كان قصر موجود جوه قلعة صلاح الدين، وتم تحويله بعد كده لمتحف بيضم مقتنيات بتحكي عن تاريح مصر العسكري، من أول العصر الفرعوني لحد العصر الحديث. ده غير مجموعة متنوعة من الأسلحة المختلفة.

 

المتحف المصري:

واحد من أشهر وأقدم متاحف القاهرة، وغني عن التعريف، وأغلبنا لازم يكونوا راحوه، سواء في أجازة أو في رحلة مع المدرسة. المتحف موجود في ميدان التحرير، وبيضم مجموعة ضخمة من القطع الأثرية الأهم في العالم، بيوصل عددها لـ 150 ألف قطعة، مقسمة حسب ترتيبها الزمني، من أول حقبة ما قبل التاريخ، مرورًا بمجموعة الدولة الوسطى، لحد مجموعة الدولة الحديثة.

 

متحف البريد المصري:

المفروض إنه موجود حاليًا في مبنى البريد الرئيسى في القرية الذكية، لكن في توجه بإنه يتنقل للمقر الرئيسي للبريد في العتبة، وهتلاقوا فيه كنوز تاريخية ومقتنيات نادرة وتراثية ترجع لـ150 سنة فاتت.

الملك فؤاد الأول هو صاحب الفضل في إنشاؤه سنة 1934 وده كان بمناسبة استضافة مصر للمؤتمر العاشر للبريد العالمى علشان يوثق تاريخ البريد المصري.

المتحف فيه أقسام كتيرة، منها القسم التاريخى اللي فيه مجموعة من أوراق البردى “الرسائل القديمة” والوثائق وعقود نقل البريد واللوائح البريدية، وفيه قسم طوابع البريد منها طوابع مصرية و عربية وأفريقية وأوروبية وآسيوية وأمريكية واسترالية، وقسم تاني للأدوات اللي بيستخدمها البريد زي الموازين والشنط والمفاتيح والصناديق.

العنوان: ميدان العتبة.

مواعيد العمل: 8:30 صباحًا – 1 مساءً.

 

متحف الموسيقار محمد عبدالوهاب:

من اسمه هتعرفوا إنه تخليد لذكرى واحد من أهم الشخصيات الموسيقية اللي مرت علينا مش بس في مصر، لأ ده في عالمنا العربي كمان.

هتلاقوا في المتحف، مكتبة مليانة كتب نادرة، وهتلاقوا كمان معظم مقتنيات موسيقار الأجيال “محمد عبدالوهاب” واللي منها الكرسي الهزاز بتاعه، وجهاز الجرامافون والبيك آب الخاصين بيه، ومجموعة من ملابسه، وأهم شهادات التقدير والأوسمة والنياشين اللي حصل عليها، والبيانو اللي كان بيعزف عليه، والنوتة الموسيقية لأغانيه، غير صوره النادرة.

مواعيده من 9 صباحًا حتى 3 عصرًا ماعدا الجمعة والسبت.

العنوان: المعهد العالي للموسيقى العربية – شارع رمسيس – بجوار مترو جمال عبد الناصر.

 

متحف مصطفى كامل:

كان في الأساس ضريح بيضم رفات الزعيم الراحل “مصطفى كامل” وزميله “محمد فريد” وافتتح رسميًا كمتحف سنة 1952، وتم تصميم المبنى على الطراز الإسلامي، ومن أبرز معالمه القبة الإسلامية، وفيه هتقدروا تعرفوا قصة كفاحه ضد الإنجليز، وهتتعرفوا على مجموعة من كتب النادرة عن مصر، ورسائل بخط إيد “مصطفى كامل” وصور لمراحل من حياته، ومجموعة من متعلقاته الشخصية، وكمان لوحات زيتية مميزة بتوثق لحادث دنشواي الشهير، وكمان فيه مجموعة نادرة من الوثائق والصور للحظات تاريخية مهمة.

المتحف شغال يوميًا من 8 صباحًا حتى 6 مساءًا ماعدا الجمعة والسبت.

العنوان: ميدان صلاح الدين – حي القلعة – الأباجية.

رقم التليفون: 0225109943.