The Definitive Guide to Living in the Capital , Cairo , Egypt

لما رحنا الغردقة من كام سنة عدينا من جنبه وعيوننا ما كانتش عاوزة تتشال من عليه ومن على اليافطة الكبيرة المكتوبة بالأزرق “Dolphin World”، للأسف الوقت ماكانش كافي أننا نروح ونشوفه، ولما سافرنا تاني كان أكيد على قائمة برنامجنا للفسح والزيارات.

دولفين وورلد – Dolphin World مكان بيُقدم فيه عروض للدولفين وحيوانات تانية زي الفقمة وأسد البحر وكلب البحر، موجود فى أول طريق خليج مكادى فى الغردقة، وسواء كنت فى الغردقة أو فى الجونة أو سهل حشيش الوصول له سهل جدًا، الطريق مش هيكمل معاك ساعة بحالها.

المسرح على شكل نص دايرة زي المسارح الرومانية، والمكان بيغلب عليه اللون الأزرق لون البحر، أول ما تدخل فيه كافيتريا أسعارها لطيفة ممكن تطلب حاجة تشربها قبل العرض لأن الدخول الساعة 3 بالضبط، بيُقدم يوميًا ماعدا يوم التلات من الساعة 3 لـ 4 عصرًا، ولازم تحجز بالتليفون قبل ما تروح، العرض بيقدمه شاب مصري وبنت أجنبية باللغات الإنجليزية، والروسية، والألمانية.

أبطال العرض أولهم حيوان الفقمة (عِجل البحر) اسمها “ليلا”، ودي الفقمة الوحيدة في إفريقيا والشرق الأوسط بتلعب بالكورة وتنفخ البلونة وتغني وتلعب ضغط ودمها خفيف جدًا، يليهم أسد البحر وكلب البحر “ديموس” اللي عرفنا أنه بياكل يوميًا 40 كيلو سمك، وختام العرض أحلى كائنات في الدنيا 3 دلافين هم “جريسيم” و”سابرينا” و”فيونا” اللي عملوا حركات أكروباتية ونطوا في الهوا وغنوا، العرض كله فيه تفاعل مع الجمهور ومسابقات، ده غير أن اللوحة اللي رسمها الدولفين اتعمل عليها مزاد للبيع.

سعر التذكرة 130 جنيه وللأطفال من 4: 11 سنة بـ 65 جنيه وتحت 4 سنين ببلاش، كمان ممكن تتصور مع الدولفين أو أبطال العرض التانيين، السعر للمصريين بـ 100 جنيه (في يوم زيارتنا)، لكن سعر التصوير متغير بيعلنوا عنه في نهاية العرض.

فيه كمان عروض خاصة بتتعمل للمدارس والحضانات الصبح من الساعة 10 صباحًا: 12 ظهرًا وبيكون معاها شو عرايس، أحلى حاجة بقى أنك ممكن تعوم مع الدولفين بعد العرض بس بأسعار خاصة، الـ 5 دقايق بـ 600 جنيه، ولمدة 10 دقايق بـ 900 جنيه.

الجميل بقى في دولفين وورلد أن الموضوع مش مقتصر على الترفيه بس، هناك بيقدموا كمان خدمة الاتصال العلاجي بالدولفين تحت رعاية متخصصين، يعنى إيه؟

أثبتت دراسات علمية أن الأطفال اللي عندهم توحد عندهم قدرة على التواصل مع الدولفين بشكل قوى جدًا، سبحان الله الدولفين بيعتبر سونار طبيعي (موجات فوق صوتية) بتعمل حافز إيجابي للجهاز العصبي لدماغ الطفل وبيساعد على تحسينه.

لو عاوزين تعرفوا معلومات أكتر عن الخدمة العلاجية دى اتصل بـ01222424289  أو 01222424298، ولو عاوزين تتابعوا العروض وتعرفوا معلومات عن ديموس وجريسيم وسابرينا وفيونا ممكن تدخل على صفحتهم على الفيسبوك. وشوفوا فيديو كايرو 360 من هنا.