بعد أكتر من 100 يوم على افتتاحه.. ليه 2026 هي السنة المثالية لزيارة المتحف المصري الكبير؟
آثار مصر الأهرامات الجيزة السياحة في مصر المتحف المصري الكبير توت عنخ آمون متاحف مصر
Mohamed Talaat
الصور: كايرو360
عدى أكتر من 100 يوم على لحظة مبهرة شافها ناس كتير في عالمنا على الهواء مباشرة. في 1 نوفمبر 2025، فتح المتحف المصري الكبير أبوابه رسميًا للعالم في حفل مبهر، ومع كل يوم بيعدي، المكان ده بيأكد إنه مش مجرد متحف جديد، لكنه تجربة ثقافية وإنسانية مختلفة، بتعيد تقديم حضارة قدماء المصريين بشكل معاصر، يليق بتاريخهم ويخاطب زوار من كل الأعمار.
النهارده، وفي فبراير 2026، نقدر نقول إن المتحف دخل مرحلة الاستقرار، والزيارة بقت أهدى، أوضح، وأغنى بالتجربة. وده بالضبط اللي يخلي 2026 سنة مثالية إنك تخطط جولتك هناك من غير زحمة الافتتاح ولا ارتباك البدايات.
في السطور الجاية، هناخدك في دليل عملي وبسيط بيجاوب على أسئلة مهمة؛ إزاي تروح المتحف، وهتشوف إيه هناك، والسؤال الأهم: إزاي تستمتع بالتجربة.
موقع المتحف المصري الكبير
المتحف المصري الكبير موجود في موقع استثنائي عند هضبة الأهرام، في الكيلو 5 على طريق القاهرة الإسكندرية الصحراوي، وده بيخليه قريب من أهم نقاط القاهرة والجيزة، على بعد 6 دقايق من ميدان الرماية، و10 دقايق من حدائق الأهرام، و16 دقيقة من ميدان لبنان، و20 دقيقة من الزمالك.
والموقع لوحده جزء من التجربة، لأنك بتتحرك بين تاريخين: الأهرامات من ناحية، وأكبر متحف حضاري في العالم من ناحية تانية.
مواصلات المتحف المصري الكبير 2026
الوصول للمتحف سهل مهما كانت وسيلة تنقلك:
أتوبيسات النقل العام
فيه خطوط أتوبيسات كتير بتوصل لميدان الرماية من أغلب ميادين القاهرة، ومن هناك بتلاقي مواصلات مباشرة لبوابات المتحف.
الميكروباص
من شارع الهرم، ميدان الرماية، ومحطة مترو الجيزة، الميكروباصات متوفرة طول اليوم.
مترو الأنفاق
محطة الجيزة على الخط الأول هي الأقرب حاليًا.. ومستقبلًا، محطة المتحف المصري الكبير على الخط الرابع هتكون نقلة كبيرة في سهولة الوصول، لكنها لسه ما افتتحتش رسميًا.
يعني سواء بعربية خاصة أو مواصلات عامة، الرحلة للمتحف بقت أبسط من أي وقت فات.
مواعيد زيارة المتحف المصري الكبير 2026
المتحف بيستقبل زواره يوميًا من 9 صباحًا لـ 9 مساءً، وآخر دخول الساعة 8 مساءً.
الجولات الإرشادية بتتعمل كل ساعتين تقريبًا، بالعربي والإنجليزي، وبتشمل: القاعات الرئيسية، والدرج العظيم، ومعرض توت عنخ آمون،
نصيحة مهمة: الحجز الإلكتروني المسبق شرط أساسي لزيارة المتحف!
رابط حجز تذاكر المتحف المصري الكبير 2025
الزوار يقدروا يحجزوا التذاكر بكل سهولة أونلاين عن طريق الموقع الرسمي للمتحف، واختيار التاريخ المناسب وبيانات الزيارة.
رابط الحجز المباشر: (اضغط هنا)
هتشوف إيه داخل المتحف المصري الكبير؟
المتحف بيضم أكتر من 100 ألف قطعة أثرية، موزعة على 12 قاعة عرض حديثة، بتقنيات إضاءة وعرض رقمي بتخلي القطعة تحكي قصتها بنفسها.
أهم مناطق المتحف:
المسلة المعلقة، أول مسلة من نوعها في العالم
حائط الأهرامات المؤدي لتمثال رمسيس الثاني
المبنى الرئيسي
قلب المتحف، وبيضم 12 قاعة عرض وأكثر من 50 ألف قطعة أثرية، من بينها:
العربات الحربية
الأسرة الجنائزية
كنوز الملك توت عنخ آمون المعروضة كاملة لأول مرة في مكان واحد
الدرج العظيم
درج بطول 25 متر، بيستقبل الزوار بمشهد مهيب، ومنه بتشوف:
الحديقة المتحفية
المعروفة باسم حديقة أرض مصر، وبتضم نباتات وأشجار كان ليها مكانة خاصة عند قدماء المصريين.
مركز الترميم
واحد من أكبر مراكز الترميم في العالم، على مساحة 32 ألف متر مربع، وبيضم 19 معمل متخصص، منها:
معمل المومياوات
معمل الميكروسكوب الإلكتروني
معامل الأحجار الكريمة، الخزف، الأخشاب، والآثار الجلدية
مراكز وخدمات إضافية
متحف الطفل
مركز المؤتمرات
متحف ذوي الاحتياجات الخاصة
مكتبة علم المصريات
سينما ثلاثية الأبعاد
منطقة ترفيهية على مساحة 25 فدان
فنادق قريبة من المتحف المصري الكبير 2026
لو حابب تخلي الزيارة تجربة متكاملة، فيه فنادق قريبة جدًا:
فندق كايرو بيراميدز، على بعد دقيقتين، وفندق بيراميدز بلازا على مسافة 5 دقايق، وفندق ريجنسي بيراميدز اللي بيبعد 6 دقايق عن موقع المتحف.
ليه 2026 وقت مثالي لزيارة المتحف؟
بعد مرور أكتر من 100 يوم على الافتتاح نقدر نقول إن التجربة بقت أوضح، والحركة بقت منظمة أكتر، وكل الخدمات اشتغلت بكامل طاقتها، والمتحف نفسه بدأ يعيش حياته الطبيعية كمكان للزيارة مش مجرد حدث.
خطط زيارتك للمتحف المصري الكبير في 2026، واستمتع برحلة نادرة في قلب حضارة لسه بتحكي للعالم حكايات مدهشة لحد النهارده.
مقترح
معالم وسياحة
بعد أكتر من 100 يوم على افتتاحه.. ليه 2026 هي السنة المثالية لزيارة المتحف المصري الكبير؟
آثار مصر الأهرامات +5
الحياة في كايرو
