The Definitive Guide to Living in the Capital , Cairo , Egypt

سلسلة أفلام حرب النجوم أو Star Wars تعتبر واحدة من مناجم الدهب، اللي هوليود لازم تدخل فيها كل فترة، وتخرَج منها فيلم جديد. استغلالًا لنجاح السلسلة الأصلية اللي حققت ملايين مليارات الدولارات عالميًا. وقدرت تكون جمهور ضخم ليها مش بس في الولايات المتحدة لكن في كل مكان في العالم.

فيلم Solo: A Star Wars Story بيستعرض الأحداث بعد لقاء هان سولو وتشوباكا والمغامرات اللي بيخوضوها مع بعض. المغامرات اللي هتحط كتير من النقط على الحروف فيما يتعلق بالأحداث الخاصة بالسلسلة بعد كده.

ماقدرناش نبعد عن نفسنا فكرة أن الفيلم يعتبر محاولة استغلال لنجاح السلسلة، في تقديم أحداث جديدة تمت بعد أو قبل الأحداث الرئيسية. وبقدر أن دي فكرة مشروعة ومفهومة في السينما التجارية، لكن من ناحية تانية حسينا أن الفيلم كان ممكن يقدم فكرة أفضل من كده. أو أن الجودة النهائية للفيلم تكون أفضل من اللي شوفناه على الشاشة، خاصة على صعيد السيناريو والأحداث.

حسينا أن المخرج رون هوارد اهتم بتقديم فيلم له علاقة بحرب النجوم، أكتر من اهتمامه بتجسيد القصة اللي كتبها جون ولورانس كاسدان. لكن من ناحية تانية قدر يقدم مشاهد أكشن ومطاردات قوية ومميزة.

الأداء التمثيلي لأبطال الفيلم ألدن إرينيرك ودونالد جلوفر وإميليا كلارك وثاندي نيوتن ووودي هاريلسون كان جيد. وقدروا يقوموا بالشخصيات المطلوبة منهم باحترافية عالية، وبأداء مميز وقوي قادر على جذب الجمهور.

الخلاصة أنك لو كنت من محبي سلسلة أفلام حرب النجوم هيعجبك فيلم Solo: A Star Wars Story بشدة. أما لو كانت أفلام الخيال العلمي بشكل عام مش بتستهويك، الفيلم مش هيكون الخيار الأول بالنسبة لك في المشاهدة.

علشان تبقى عارف:

تم اختيار (وودي هارلسون) بعد (كريستيان بايل) ليقوم بدور معلم (هان سولو).