The Definitive Guide to Living in the Capital , Cairo , Egypt

الأيام دي، بتحتفل القاهرة، بالذكرى المئوية لميلاد أشهر مصور فوتوغرافي في مصر طوال القرن العشرين، وهو المصري الأرميني “فان ليو”، اللي قدر بكاميرته يصور أهم الشخصيات في مصر وفي نفس الوقت يوثق لنا فترة مهمة جدًا من تاريخ القاهرة.

اسمه الحقيقي “ليفون ألكسندر بويادجيان”، أما اسم الشهرة فهو “فان ليو”. اتولد في نوفمبر من سنة 1921، في ذروة الفترة اللي أعقبت مذابح الأرمن، وده السبب اللي خلى أسرته تهرب لمصر سنة 1925، وفي المحروسة، عاشت أسرته في مدينة الزقازيق بمحافظة الشرقية 3 سنين، وبعدها انتقلت للقاهرة سنة 1930، وفي العاصمة اشتغل الأب موظف في شركة الترام.

انضم “فان ليو” للدراسة في الجامعة الأمريكية بالقاهرة سنة 1940، لكن عشقه للتصوير الفوتوغرافي خلاه ميكملش دراسته فيها ويمشي في طريق التصوير اللي عشقه بجنون، وافتتح ستوديو مترو في وسط القاهرة.

وثق “فان ليو” بكاميرته فترة عظيمة من فترات مصر، ونجح إنه يصور أهم شخصياتها ونجومها، واتشهر وقتها بإنه ساحر الظلال والضوء.

أبرز الشخصيات اللي قام “فان ليو” بتصويرهم هم الرئيسين محمد نجيب وجمال عبد الناصر، وعميد الأدب العربي  طه حسين، أنور وجدي، داليدا، رشدي أباظة، زبيدة ثروت، سامية جمال، المخرج شادي عبد السلام، المطرب محمد عبد المطلب، الممثل العالمي عمر الشريف، سيدة الشاشة فاتن حمامة، ونجوم أكتر.

رحل “فان ليو” عن دنيانا سنة 2002.