The Definitive Guide to Living in the Capital , Cairo , Egypt

الصورة الرئيسية: Charlotte Harrison

الخروجات العامة في القاهرة بتحكي تاريخ وحضارة زي أي مكان في مصر، والنزهة العائلية في مصر مرتبطة دايمًا بالحدائق العامة وده لأنها بتستوعب كل الأسرة وبتخليهم يعملوا أنشطة وينبسطوا حتى لو الأذواق مختلفة، والنهاردة قررنا نقولكم على الخروجات التاريخية في القاهرة وهنعرفكم خلال السطور اللي جاية على 5 حدائق تراثية في القاهرة مليانة قصص وحكاوي وتاريخ.

حديقة الأورمان

الحديقة دي كنز نباتي حقيقي، تم إنشاءها عام 1875 ميلادية، في عهد الخديوي إسماعيل، وسميت “الأورمان” وهي تعني “الغابة” بالتركية، وتأسست علشان تكون مصدر استيراد وتجربة النباتات والفواكه النادرة من جميع أنحاء العالم، وحاليًا هي في مرحلة التطوير، وهيتم افتتاحها قريب جدًا وهترتبط بحديقة الحيوان.

العنوان: شارع الأورمان – بجوار جامعة القاهرة – الجيزة.

حديقة الحيوان

أقدم وأشهر حديقة حيوان في الشرق الأوسط، وتأسست عام 1891 في عهد الخديوي توفيق، وكانت في بداية تأسيسها مقر للحيوانات النادرة، وتحولت في عهد الخديوي توفيق لحديقة عامة، وتم إضافة مجموعة كبيرة من الحيوانات لها علشان تكون أول حديقة حيوان عامة في مصر، وبيتم تطويرها حاليًا لتواكب العصر الحديث وهيتم افتتاحها قريب مع حديقة الأورمان.

العنوان: شارع جامعة القاهرة – ميدان النهضة – الجيزة.

حديقة الأسماك

من الحدائق اللي لها طابع معاري فريد بس خلينا نتكلم عن الإسم عمومًا لأن الأصل في اسم الحديقة هي “حديقة الأكواريوم”  وهي كلمة لاتينية تعني مكان تجمع الأحياء المائية، وهي مصممة على شك ممرات وجسور مصنوعة من الطين المخلوط بمواد مختلفة علشان تظهر وكأنها كهوف صخرية طبيعية، وتم إنشاءها عام 1902 على يد الخديوي عباس، وده علشان تكون متنزه يجمع بين النباتات والأحياء المائية وصممت على شكل جبلاية وده الإسم الثانوي لها، ولكن يبقى الإسم الحالي هو الأشهر “حديقة الأسماك”.

العنوان: شارع الجبلاية – الزمالك – القاهرة.

حديقة الأندلس

تأسست حديقة الأندلس عام 1935 في عهد الملك فؤاد الأول علة يد محمد بك ذو الفقار، وهي من أقدم وأجمل الحدائق اللي ممكن تزوروها، وحاليًا بيتم تطويرها علشان تليق بتاريخها المميز، وتم تصميمها على الطراز الأندلسي، وهتلقوا فيها نقوش وزخارف شبيهة للقصر الأحمر في غرناطة واسمه “حديقة الفردوس”، وكمان هتلقوا جزء من الحديقة مصمم على الطراز الفرعوني واسمه “الحديقة الفرعونية”، وحاليًا غير متاحة للزيارة ولكنها هتفتح قريب بعد التطوير اللي شفناه بنفسنا وادى مساحة أكبر ليها مع توفير خدمات مميزة لرواد الحديقة في المستقبل القريب.

العنوان: شارع سراي الزمالك – بجوار كوبري قصر النيل – القاهرة.

حديقة الحرية

مش مجرد حديقة نقدر نقول أنها متحف مفتوح للزعماء والمفكرين، وتم افتتاحها للجمهور عام 1954، وفي الأصل كان إسمها “جنينة الخديوي” وتأسست سنة 1876 وكانت جزء من قصر الجزيرة، وبعد ثورة 1952 تم تطويرها علشان تكون حديقة عامة وسميت “الحرية” وتم وضع تماثيل لمشاهرير من الأدباء والسياسيين والمفكرين والشعراء زي نجيب محفوظ وأحمد شوقي وغيرهم.

سعر التذكرة لزيارة الحديقة 20 جنيه، ومعروف أنها بيقام فيها حفلات ومهرجانات مختلفة ومتميزة في بعض الأوقات.

العنوان: شارع أم كلثوم – أمام دار الأوبرا المصرية – القاهرة.