5 نصايح مهمة لو عاوز تربي كلب
Mohammed Sabry
ناس كتير بتحب تربي الحيوانات في بيتها، وأغلبهم بيختاروا الكلب. وده بيرجع لأنه حيوان لطيف ومسلي، وكمان ممكن تستتخدمه في مسائل الحراسة أو مساعدة شخص عاجز مثلا. بس دايما بتكون هناك مشكلة رخمة حبتين، هي إزاي يتعاملوا مع الكلب ويربوه ويدربوه بشكل سليم. علشان كده النهار ده كايرو 360 بيقول لكم على أهم 5 نصايح تساعدكم على تربية كلب في البيت:
حجم البيت المناسب
البيت هنا نقصد بيها بيت الكلب أو القفص اللي بينام فيه. طبعًا لازم يكون حجمه مناسب لحجم الكلب، مش كبير أوي ومش صغير أوي. ودي ممكن تقدرها بنفسك من خلال مجموعة من الأحجام المختلفة.
مكان الحمام بتاعه
أول ماتشتري كلب لازم تعرفه المكان المخصص للحمام بتاعه. هتخرجه برة البيت وتحاول توجه لمكان محدد، علشان بعد كده يبقى عارف مكانه لو انت مش معاه. ولازم تاخد بالك من علامات احتياجه للحمام زي إنه يبدأ ينبح، أو يتحرك بسرعة، أو يلهث، أو يشمشم في المكان حواليه.
الأوامر الصوتية
الكلب هيتحاج وقت علشان يقدر يفهم انت عايز تقول له إيه، فلازم تخلي الأوامر قصيرة وبسيطة ومعاها إشارة من إيدك. مثلا لما تقول له “لأ” حرك إيدك باعتراض. أو تخليه يسيب حاجة وتشاور له على حاجة تانية. وماتنساش في كل مرة ينفذ الأمر لازم تكافأه بحاجة.
الفُسح والخروجات
الخروج والتجول مع الكلب أمر ضروري. لازم تتمشى مع الكلب في الشارع باستمرار، وكمان لو بتخرج بالعربية لازم تاخده معاك علشان يتعود على الطريق وشكل العربيات والناس في كل حتة.
الاختلاط بالحيوانات التانية
لو عندك حيوانات تانية في البيت لازم تحط الكلب في مكان لوحده في البداية. بعد كده ممكن تخلي الحيوانات مع بعض وتكون بتراقبهم بنفسك، علشان تتأكد أنهم خلاص بقوا أصدقاء. ماتنساش تاخد الكلب بتاعك لأي حديقة أو مكان مخصص للكلاب من وقت للتاني. ده طبعًا هيساعده أكتر في عملية الاختلاط.
دي شوية أساسايات لتربية الكلاب. وطبعا هي بتحتاج وقت ومجهود. تقدروا تجربوا الطرق دي وتعرفوا أكتر من خلال صفحات الفيسبوك اللي بيعملها مدربين محترفين، ودي واحدة منهم.
مقترح
الحياة في كايرو
هل ممكن تكنولوجيا بسيطة تنقذ أرواحنا؟ رائد أعمال مصري يقترح نظام ذكي للحد من حوادث الطرق
Bosch GPS +10
تسوق
